فوتو: سۋ رەسۋرستارى جانە يرريگاتسيا مينيسترلىگى
كەزدەسۋدە ن.نۇرجىگىتوۆ ۆەدومستۆونىڭ سوڭعى ەكى جىلدا اتقارعان جۇمىستارى تۋرالى ايتتى. قاتىسۋشىلار سۋ رەسۋرستارىن باقىلاۋ تەتىكتەرىن جانە سۋ ۇنەمدەۋ مادەنيەتىن قالىپتاستىرۋعا باعىتتالعان جوبالاردى جۇزەگە اسىرۋداعى ىنتىماقتاستىقتى تالقىلادى. سول ورايدا ۇكىمەتتىك ەمەس ۇيىم وكىلدەرى ءوز ۇسىنىستارىن ءبىلدىردى. بۇل ۇسىنىستار XII ازاماتتىق فورۋمىندا ەسكەرىلەدى.
سالا مينيسترلىگىنىڭ ءباسپاسوز قىزمەتىنىڭ مالىمدەۋىنشە كەزدەسۋ قورىتىندىسى بويىنشا سۋ رەسۋرستارى جانە يرريگاتسيا مينيسترلىگى جانىنان ۇەۇ-مەن ءوزارا ءىس-قيمىل جونىندەگى ۇيلەستىرۋ كەڭەسىن قۇرۋ تۋرالى شەشىم قابىلداندى.
ء«بىزدىڭ مينيسترلىك ۇكىمەتتىك ەمەس سەكتورمەن ىنتىماقتاستىقتى ءتيىمدى ءارى تۇراقتى سۋ ساياساتىنىڭ اجىراماس بولىگى دەپ سانايدى. مىسالى, جاڭا سۋ كودەكسىنىڭ باستى ماقساتتارىنىڭ ءبىرى – قوعامنىڭ سۋ رەسۋرستارىن باسقارۋعا بەلسەندى قاتىسۋىن قامتاماسىز ەتۋ. باسسەيندىك كەڭەستەر ارقىلى سۋ پايدالانۋشىلار, بيزنەس, ەكولوگيالىق ۇيىمدار مەن عىلىمي ورتا وكىلدەرىنە شەشىمدەرگە ىقپال ەتۋ مۇمكىندىگى بەرىلدى. قوعامنىڭ ءرولىن كۇشەيتۋ – سۋ سالاسىنداعى شەشىمدەر جەرگىلىكتى جەردەگى ناقتى ماسەلەلەردى كورىپ وتىرعان ازاماتتاردىڭ پىكىرىن ەسكەرە وتىرىپ قابىلدانادى دەگەن ءسوز», دەدى مينيستر ن.نۇرجىگىتوۆ.
ءمينيستردىڭ ۇەۇ وكىلدەرىمەن كەزدەسۋى 15-16 قازاندا وتەتىن XII ازاماتتىق فورۋمعا دايىندىقتىڭ ەكىنشى كەزەڭى اياسىندا ءوتتى. ازاماتتىق فورۋم – مەملەكەت پەن ازاماتتىق قوعام اراسىنداعى اشىق ءارى كونسترۋكتيۆتى ديالوگقا ارنالعان ۇلتتىق الاڭ. ول ەكى جىلدا ءبىر رەت وتكىزىلەدى جانە مەملەكەتتىك ورگانداردىڭ, ۇكىمەتتىك ەمەس ۇيىمداردىڭ, حالىقارالىق قۇرىلىمداردىڭ, بيزنەس وكىلدەرىنىڭ, ساراپشىلار مەن عىلىمي قاۋىمداستىقتىڭ باسىن قوسادى. دايىندىقتىڭ العاشقى كەزەڭىندە, مامىردان قىركۇيەككە دەيىن ەلىمىزدىڭ 20 وڭىرىندە قوعام وكىلدەرىمەن كەزدەسۋلەر ءوتتى. ونىڭ ناتيجەسىندە فورۋم قاتىسۋشىلارىنىڭ ۇسىنىستارىن جۇزەگە اسىرۋعا باعىتتالعان ءىس-قيمىل جوسپارلارى قابىلداندى.
