«دانەكەرلەۋشى دەگەن ماماندىقتىڭ ماڭىزى زور ەكەنىن ەڭ العاش سول جەردە كوردىم», دەيدى جاندوس. وعان دەيىن دە ەلەكترمەن پىسىرەتىن اپپاراتتى الىپ, تۇرمىسقا, تىرشىلىككە قاجەت جۇمىسىن ءوزى تىندىرا بەرەتىن اۋىل بالاسى شەتەلدىك كومپانياداعى تالاپتى ارىپتەستەرىنىڭ شەبەرلىگىن كورىپ, تاڭداي قاعىپتى. ايتارى جوق, كاسىبىن شەبەر مەڭگەرگەن ناعىز ماماننىڭ ءار قيمىلى اسەرلى بولادى ەكەن, ەلەكترودتى الىپ تۇرىپ, تاسقاراڭعى اينەكتىڭ ارتىنان ءار شوقىعانى شەدەۆر بولىپ تۇسكەندە تاڭعالماسقا شارا جوق.
جاندوس دانەكەرلەۋشى ماماندىعىنىڭ ناعىز جاۋاپتى جۇمىس ەكەنىن, مايتالمان ماماننىڭ ماشىعى ىقىلاستى ىجداعاتپەن, تالاي جىلعى تاجىريبەمەن كەلەتىنىن ءتۇيسىندى. ءسويتىپ, «ەنەرگەتيك» وقۋ ورتالىعىنا جازىلىپ, بۇل كاسىپتىڭ تەورياسىنا بويلادى. كۋرستى تامامداعان سوڭ KCG كومپانياسىنا جۇمىسقا تۇردى. بۇل جەردە دە جاندوسقا تاعىلىمدى ۇستاز, تاجىريبەلى تالىمگەر كەزدەستى.
«وسى ونەردى ۇيرەتكەن مۇراتبەك مۇحامبەرديەۆ پەن ەرنياز ۇدىرەەۆتەردى ەشقاشان ۇمىتپايمىن. ولاردان دانەكەرلەۋ تەحنيكاسىن, ءادىس-ءتاسىلىن عانا ەمەس, ماماندىققا دەگەن ماحابباتتى, جاۋاپكەرشىلىكتى دە ۇيرەندىم», دەيدى جاندوس.
ادام ءبىر كاسىپتى تەرەڭ مەڭگەرگەن سايىن اينالاسىنا قاجەت مامانعا اينالادى. اۋەلى اينالاسىنا ەسىك-تەرەزە, قاقپا جاساپ, تاجىريبە جيناعان جاندوس 2015 جىلى «Yasin stroy kz» دەگەن ءوز فيرماسىن تىركەدى. ياسين – تۇڭعىش ۇلىنىڭ ەسىمى. باستاپقىدا كەز كەلگەن تاپسىرىستى قابىلدادى. ويتكەنى ءوز اتىڭدى دالەلدەۋ, مويىنداتۋ, حالىق سەنىمىنە يە بولۋ وڭاي ەمەس. بىرتە-بىرتە ۇلكەن جوبالارعا قول سوزدى. قۇرىلىستا سەندۆيچ-پانەل دەپ اتالاتىن تەحنولوگيا سالاسىن مەڭگەردى. باسىندا باتىس قازاقستان وبلىسى اۋماعىندا جۇرسە, كەيىن كورشىلەس اقتوبە, اتىراۋ وبلىستارىنان دا تاپسىرىس تۇسە باستادى. مىنە, بۇگىندە ءۇش قاباتتى ساۋدا ۇيلەرىن, كۇردەلى عيماراتتاردى قينالماي تۇرعىزا بەرەتىن قابىرعالى مەكەمەگە اينالدى.
ء«ىس تەتىگىن مامان شەشەدى» دەگەن. بىراق ءاربىر ماتەلدىڭ ءمانىن ءوز باسىڭنان وتكەرگەندە انىق تۇيسىنەدى ەكەنسىڭ. قازىر جانىمدا سىننان وتكەن 6-7 ازامات بار. ءبىز بىرگە ۇيرەندىك, بىرگە وستىك. بۇگىندە كەز كەلگەن تاپسىرىس الىپ, كەز كەلگەن كۇردەلى عيماراتتى تۇرعىزا الاتىنىما سەنەمىن. ويتكەنى ۇجىمىمىز جۇدىرىقتاي جۇمىلعان, بەساسپاپ ماماندار», دەيدى جاندوس.
باتىس قازاقستان وبلىسى
