فوتو: اۋىل شارۋاشىلىعى مينيسترلىگى
ناۋقاننىڭ 80%-دان استامى اياقتالىپ, 156 شارۋاشىلىق جۇمىستى تولىقتاي اياقتاعان. ورتاشا ونىمدىلىك گەكتارىنا 15,9 تسەنتنەردى قۇراپ, استىقتىڭ ەلەۋلى بولىگى جوعارى ساپامەن ەرەكشەلەنەدى.
اتالعان ناتيجەگە قولايلى تابيعي جاعدايلارمەن قاتار, اگرارلىق سالا وكىلدەرىنە ماۋسىمدىق ناۋقانعا الدىن الا دايىندالۋعا مۇمكىندىك بەرگەن كەشەندى مەملەكەتتىك قولداۋ دا ىقپال ەتكەنىن ايتا كەتكەن ءجون.
اۋىل شارۋاشىلىعى مينيسترلىگىنىڭ ءباسپاسوز قىزمەتىنىڭ مالىمدەۋىنشە بيىل ەگىستىك القابى 300 مىڭ گەكتارعا ۇلعايىپ, 5,5 ملن گەكتارعا جەتكەن. «كەڭ دالا-2» باعدارلاماسى بويىنشا مىڭعا جۋىق فەرمەر قارجىلاندىرۋعا يە بولىپ, ماشينا-تراكتور پاركىن جاڭارتۋعا جانە شارۋاشىلىقتاردىڭ تەحنيكالىق الەۋەتىن نىعايتۋعا مۇمكىندىك الدى. دالا جۇمىستارىنا 20 مىڭعا جۋىق تەحنيكا جۇمىلدىرىلىپ, جەڭىلدىكپەن ديزەل وتىنى بەرىلدى.
سوڭعى ەكى جىلدا مايلى داقىلدار القابى 2,5 ەسەگە ءوسىپ, العاش رەت 500 مىڭ گەكتارعا جەتكەن. سونداي-اق جوعارى رەپرودۋكتسيالى تۇقىمدار سەبىلەتىن اۋماقتىڭ ۇلەسى ارتىپ كەلەدى.
بۇل – الداعى جىلدارداعى جاڭا رەكوردتىق ناتيجەلەردىڭ نەگىزىن قالايدى. وبلىستىق اۋىل شارۋاشىلىعى جانە جەر قاتىناستارى باسقارماسىنىڭ مالىمەتىنشە, بيىلعى ءونىم سوڭعى جىلدارداعى ەڭ جوعارى كورسەتكىش. 7,2 ملن توننا استىق پەن 650 مىڭ توننادان استام مايلى داقىل جينالادى دەپ جوسپارلانىپ وتىر.
