بالدىرعاندارعا ارناپ كوركەم دۇنيە جازۋ قيىن. الدىمەن ولاردىڭ جان دۇنيەسىن تەرەڭ ءتۇسىنۋ كەرەك. بۇعان اسقان شەبەرلىك قانا ەمەس, بالاعا ءتان تازالىق, مەيىرىمدىلىك قاجەت. ءبىر جاعىنان, بۇگىنگى ۋاقىت باسقا. جەتكىنشەكتەردىڭ ادەبي تالعامى دا وزگەشە. جاس وقىرماندى باياعىداي اۋىل كورىنىستەرىمەن الداي المايسىڭ. قازىر – جاڭا تەحنولوگيا ءداۋىرى. روبوتتەحنيكا زامانى. سوندىقتان بۇگىندە بالالار تاقىرىبىنا قالام تارتىپ جۇرگەندەرگە ارتىلعان جۇك جەڭىل ەمەس.
الايدا اۆتور وسى ماقساتتى جاقسى سەزىنگەن. جاڭا جيناققا جازۋشىنىڭ كەيىنگى جىلدارى جازىلعان اڭگىمە-حيكاياتتارى, ەرتەگىلەرى توپتاستىرىلعان. مۇندا قالا مەن اۋىل بالالارىنىڭ پسيحولوگياسى ءدال كوركەمدەلگەن. كەيىپكەرلەرىنىڭ بولمىسى دا, ومىرگە كوزقاراسى دا باسقاشا. قالامگەر ولاردىڭ مىنەز-قۇلقىن شىنايى بەينەلەيدى. ۇلتتىق تاربيە قۇندىلىقتارى تۋرالى دا استارلاپ ايتادى.
مىسالى, «باعىڭ جانسىن, بالام!» دەگەن اڭگىمەسىندە قالاعا جاقىندا قونىس اۋدارعان ءابۋتالاپ قارتتىڭ باسىنان وتكەن وقيعا باياندالعان. بۇلار تۇراتىن ەكىنشى قاباتتاعى قاراما-قارسى ەسىكتەگى كىشكەنتاي بالا كۇندە ەسىك الدىندا وتىرعان اقساقالدىڭ قاسىنان ۇندەمەي وتە شىعادى. بىراق ءوزى پىسىق. ءبىر كۇنى قاسىنان اسىعا ءوتىپ بارا جاتقان الگى بالانى قارت توقتاتادى. ەندى وسى ديالوگكە زەر سالىڭىز:
« – ءاي, بالام كىشكەنە ايالداشى!
كىشكەنتاي ۇل كىدىردى.
– اتىڭ كىم؟
– اسحات.
– قاي سىنىپتا وقيسىڭ؟
– تورتىنشىدە.
– ساباعىڭ قالاي؟
– جاقسى.
– بەستىك باعالارىڭ كوپ پە؟
– ءيا, اتا! ءبىر ساباقتان ءتورتىم بار...
– اكە-شەشەڭ ۇلكەن كىسىمەن امانداس دەپ ايتپاي ما؟
– ايتادى.
– ەندەشە, نەگە امانداسپايسىڭ؟».
وسى قىسقاشا ۇزىندىدەن ءبىراز نارسەنى اڭعاراسىز. بۇندا ۇلكەنگە سالەم بەرۋدى ۇمىتقان بالانى عانا ەمەس, ۇلتتىق تامىردان اجىراپ بارا جاتقان بۇگىنگى ۇرپاق بەينەسىن كورەسىز. اۆتور ونى ايقايلاپ ەمەس, ەمەۋرىنمەن جەتكىزەدى. جالپى, كىتاپتا كوڭىلدى سەلت ەتكىزەر وسىنداي ويلى دۇنيە كوپ. جيناققا جازۋشىنىڭ كولەمدى ءۇش پوۆەسى ەنگەن. ونداعى كىشكەنتاي كەيىپكەرلەر بەينەسى ارقىلى قوعامداعى كەلەڭسىز وقيعالار كورىنىس تاپقان. ال ەرتەگىلەردىڭ مازمۇنى بولەك. ءبارى دە ومىردەن ويىپ الىنعان.
تولىمبەك ءابدىرايىم – بۇگىنگى بالالار ادەبيەتىنىڭ بەلدى وكىلىنىڭ ءبىرى. بۇعان دەيىن بىرنەشە پروزالىق ەڭبەگى جارىق كورگەن. كورنەكتى جازۋشى, مەملەكەتتىك سىيلىقتىڭ لاۋرەاتى اكىم تارازي كوزى تىرىسىندە: «مەن تولىمبەكتىڭ شىعارماشىلىعىن ارنالى وزەنگە تەڭەر ەدىم. ونىڭ ايتارى الدا دەپ ويلايمىن...», دەپ باعا بەرىپتى.
