– ءاربىر ۇستازدىڭ ەڭبەگىن مويىنداۋ – ۇلكەن مارتەبە. بيىل تەك مەكتەپ مۇعالىمدەرى عانا ەمەس, تەحنيكالىق جانە كاسىپتىك ءبىلىم بەرۋ ۇيىمدارىنىڭ پەداگوگتارى, جەتىم جانە اتا-اناسىنىڭ قامقورلىعىنسىز قالعان بالالارعا ارنالعان مەكەمەلەردىڭ ۇستازدارى, جوعارى وقۋ ورىندارىنىڭ وقىتۋشىلارى مەن پەداگوگيكا ارداگەرلەرى دە ماراپاتتالدى. بۇل – ءبىلىم بەرۋ جۇيەسىنىڭ بارلىق دەڭگەيىندەگى ۇستازدارعا جاسالعان قۇرمەت, – دەدى مۇحتار تالقانباەۆ.
ول جامبىل وبلىسىندا سوڭعى جىلدارى ءبىلىم سالاسىندا اۋقىمدى جۇمىستار اتقارىلىپ جاتقانىن اتاپ ءوتتى.
– وڭىردە مەكتەپ قۇرىلىسىنا ەرەكشە كوڭىل ءبولىنىپ وتىر. قازىردىڭ وزىندە 41 ءبىلىم نىسانىنىڭ قۇرىلىسى جۇرگىزىلۋدە, جىل سوڭىنا دەيىن 19 جاڭا مەكتەپ پايدالانۋعا بەرىلەدى. بيىلدىڭ وزىندە 3 جايلى مەكتەپ اشىلدى, سونىمەن قاتار 66 مەكتەپتى جاڭارتۋ باستالدى. بۇل ءۇش اۋىسىمدى وقۋدى جويۋعا جانە بالالاردىڭ ساپالى ءبىلىم الۋىنا زور مۇمكىندىك بەرەدى, – دەدى ول.
سونىمەن قاتار پەداگوگ جاڭا باستامالاردىڭ وقۋشىلاردىڭ الەۋەتىن ارتتىرۋعا ىقپال ەتىپ وتىرعانىن ايتتى.
– بالالاردىڭ تسيفرلىق ساۋاتتىلىعىن دامىتۋعا ايرىقشا كوڭىل بولىنۋدە. IT-سىنىپتار, روبوتوتەحنيكا كابينەتتەرى اشىلىپ, اۋىل مەكتەپتەرى زاماناۋي قۇرال-جابدىقتارمەن قامتاماسىز ەتىلىپ جاتىر. سونىڭ ارقاسىندا وقۋشىلارىمىز حالىقارالىق وليمپيادالاردا جاقسى ناتيجەلەر كورسەتىپ ءجۇر. بۇل – جاس ۇرپاققا جاسالعان ناقتى ينۆەستيتسيا, – دەدى تالقانباەۆ.
ونىڭ ايتۋىنشا, مەملەكەت تاراپىنان كورسەتىلىپ وتىرعان قولداۋ ۇستازداردى جاڭا جەتىستىكتەرگە جەتەلەيدى. پەداگوگ ەڭبەگىن باعالاۋ – ۇلت بولاشاعىنا جاسالعان ەڭ باستى قادام.
