ءىس-شاراعا پرەمەر-مينيستر ورىنباسارى قىزمەتىن اتقارعان, قازىرگى سىرتقى ىستەر ءمينيسترى ەرمەك كوشەرباەۆ, كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چجو تە يك, قر عىلىم جانە جوعارى ءبىلىم ءمينيسترى ساياسات نۇربەك, تۇركىستان وبلىسىنىڭ اكىمى نۇرالحان كوشەروۆ, سونداي-اق «ۆۋسونگ ءبىلىم قورىنىڭ» قۇرمەتتى توراعاسى جانە باسقارما مۇشەسى كيم سون كيونگ مىرزا قاتىسىپ, قۇتتىقتاۋ ءسوز سويلەدى.
ەرمەك كوشەرباەۆ ءوز سوزىندە فيليال اشۋدىڭ تاريحي ماڭىزدىلىعىنا توقتالدى:
«ەل پرەزيدەنتى قاسىم-جومارت كەمەل ۇلى توقاەۆتىڭ تاپسىرماسى بويىنشا ەلىمىزدە جەتەكشى شەتەلدىك جوعارى وقۋ ورىندارىنىڭ فيليالدارىن اشۋ جۇمىستارى جۇرگىزىلىپ جاتىر. قازىرگى ۋاقىتتا ءارتۇرلى فورماتتا 40 ستراتەگيالىق ارىپتەستىك ىسكە اسىرىلىپ, ونىڭ 33-ءى – شەتەلدىك ۋنيۆەرسيتەت فيليالدارى. بۇگىن ءبىز تاريحي وقيعانىڭ كۋاسى بولىپ وتىرمىز – رۋحاني باي ءارى كونە تۇركىستان قالاسىندا كورەيا رەسپۋبليكاسىنىڭ جەتەكشى ۋنيۆەرسيتەتىنىڭ فيليالى اشىلدى. بۇل ۋنيۆەرسيتەت تەك ءبىلىم بەرۋ الاڭى عانا ەمەس, حالىقارالىق ىنتىماقتاستىق, يننوۆاتسيالار ورتالىعى جانە ەلىمىزدىڭ ينتەللەكتۋالدىق كاپيتالىن قالىپتاستىراتىن جوعارى بىلىكتى ماماندار دايارلايتىن مەكەن بولادى», دەپ اتاپ ءوتتى ە. كوشەرباەۆ.
عىلىم جانە جوعارى ءبىلىم ءمينيسترى ساياسات نۇربەك قازاقستاننىڭ ورتالىق ازياداعى جەتەكشى ءبىلىم بەرۋ حابىنا اينالۋىنا باعىتتالعان جوبالاردىڭ ماڭىزدىلىعىن اتاپ ءوتىپ, شەتەلدىك جوعارى وقۋ ورىندارىنىڭ ەلىمىزدە فيليالدار اشۋى وسى ستراتەگيالىق ماقساتقا جەتۋدىڭ ماڭىزدى بولىگى ەكەنىن ايتتى. مينيستر اتاپ وتكەندەي, جاڭا وقۋ جىلىندا ەسىگىن ايقارا اشقان «Woosong University Kazakhstan» – وسىنداي تابىستى سەرىكتەستىكتىڭ جارقىن ۇلگىسى.
مەملەكەت باسشىسىنىڭ تاپسىرماسى بويىنشا ۇكىمەت حالىقارالىق ءبىلىم بەرۋ ىنتىماقتاستىعىن دامىتۋ, شەتەلدىك ۋنيۆەرسيتەت فيليالدارىن اشۋ جانە ستۋدەنتتەر مەن وقىتۋشىلاردىڭ اكادەميالىق ۇتقىرلىعىن قامتاماسىز ەتۋ باعىتىندا جۇيەلى جۇمىستار جۇرگىزىپ وتىر. ايتا كەتەيىك, مەملەكەت باسشىسى قاسىم-جومارت توقاەۆتىڭ تاپسىرماسى اياسىندا قورقىت اتا اتىنداعى قىزىلوردا ۋنيۆەرسيتەتىندە SeoulTech-پەن بىرلەسىپ جاساندى ينتەللەكت ينستيتۋتى اشىلدى. بۇگىندە قازاقستان تاراپى SeoulTech, Woosong, Dong-Eui, KAIST سياقتى جەتەكشى كورەيالىق ۋنيۆەرسيتەتتەرمەن تىعىز ىنتىماقتاستىق ورناتىپ, ەلىمىزدە العاشقى شەتەلدىك فيليالدار مەن عىلىمي-زەرتتەۋ ورتالىقتارىن اشىپ, قوس ديپلومدى باعدارلامالار مەن اكادەميالىق الماسۋ جوبالارىن ىسكە اسىرىپ جاتىر.
سالتاناتتى ءىس-شارا بارىسىندا «Woosong University Kazakhstan» ديرەكتورى حۆا چون يون ۋنيۆەرسيتەتتىڭ ميسسياسى, نەگىزگى ءبىلىم بەرۋ باعدارلامالارى, عىلىمي باعىتتارى جانە حالىقارالىق سەرىكتەستىكتەرى تۋرالى كەڭىنەن باياندادى.
ءىس-شارا اياسىندا قۇرمەتتى قوناقتار ۋنيۆەرسيتەتتىڭ «تىلەكتەر كىتابىنا» قول قويىپ, جاڭا وقۋ ورنىنىڭ تسيفرلىق كىتاپحاناسى, وقۋ زالدارى مەن زاماناۋي اۋديتوريالارىمەن تانىستى. سونداي-اق ستۋدەنتتەرمەن كەزدەسىپ, ولاردىڭ العاشقى وقۋ كۇندەرىنە ساتتىلىك تىلەدى.
