سۋرەتتى تۇسىرگەن – جەڭىس ىسقاباي
فەستيۆالعا ەلىمىزدىڭ عانا ەمەس, شەتەلدىڭ دە بەلگىلى تەاترتانۋشىلارى مەن ونەر قايراتكەرلەرى قازىلىق ەتتى. ولاردىڭ قاتارىندا قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى, پروديۋسەر ءارى رەجيسسەر دوسحان جولجاقسىنوۆ, تەاتر سىنشىسى, ونەرتانۋ دوكتورى باقىت نۇرپەيىس, تاتارستاننان كەلگەن تەاترتانۋشى نياز يگلاموۆ, گرۋزيانىڭ بەلگىلى پروفەسسورى گەورگي تسكيتيشۆيلي, وزبەكستان ونەرتانۋشىسى ايبەك كوپادزە بولدى.
قازىلار قويىلىمداردىڭ مازمۇنىنا عانا ەمەس, رەجيسسەرلىك شەشىمىنە, اكتەرلىك ويىنعا, ساحناداعى پلاستيكا مەن دەكوراتسياعا دەيىن ءجىتى نازار اۋداردى.
ء«بىز سپەكتاكلدەردى سان قىرىنان باعالادىق. ءاربىر قويىلىمنىڭ جانرى دا, يدەياسى دا ءارتۇرلى. بىراق ەڭ باستىسى – اكتەردىڭ شىنايىلىعى, كورەرمەن جۇرەگىنە جەتكىزە ءبىلۋى. بۇل فەستيۆالدىڭ ەرەكشەلىگى – زاماناۋي رەجيسسەرلەردىڭ باتىل شەشىمدەرى مەن اكتەرلەردىڭ كەيىپكەردىڭ ىشكى جان دۇنيەسىن اشىپ كورسەتۋگە دەگەن تالپىنىسى. بەس كۇن ىشىندە ءتۇرلى ەلدەن كەلگەن تەاترلار تاجىريبە الماسىپ, ونەردىڭ ورتاق تىلدە سويلەيتىنىن تاعى دا دالەلدەدى. مۇنداي مەرەكە – ۇلت رۋحانياتى ءۇشىن ۇلكەن ولجا», دەدى قازىلار القاسىنىڭ توراعاسى دوسحان جولجاقسىنوۆ.
حالىقارالىق فەستيۆالعا قازاقستاننان بولەك قىرعىزستان, وزبەكستان, ازەربايجان, گرۋزيا ەلدەرىنىڭ تەاترلارى قاتىستى. جالپى سانى توعىز ۇجىم ونەر كورسەتىپ, ساحنادا ءارتۇرلى تاقىرىپتى كوتەردى: تاريحي دراما دا, زاماناۋي اڭگىمە دە, فيلوسوفيالىق ويلارعا جەتەلەيتىن قويىلىمدار دا بولدى.
«بۇل فەستيۆالدىڭ ەڭ قۇندى تۇسى – تەاترلاردىڭ ءبىر-بىرىنەن ۇيرەنۋى, تاجىريبە الماسۋى. شەتەلدىك قوناقتاردىڭ پلاستيكالىق شەشىمدەرى مەن رەجيسسەرلىك باتىلدىعى, وتاندىق ارتىستەردىڭ اكتەرلىك شىنايىلىعى – بارلىعى كورەرمەنگە جاڭا اسەر سىيلادى. مەنىڭ ويىمشا, «Biken fest» – جاي عانا تەاتر مەرەكەسى ەمەس, ول – ۇلت رۋحانياتىن بايىتاتىن, ونەردىڭ حالىقارالىق دەڭگەيدەگى ديالوگىنە جول اشاتىن ۇلكەن الاڭ. الداعى جىلدارى دا جالعاسىن تاۋىپ, تالدىقورعاندى الەمدىك تەاترلار توعىساتىن ورتالىققا اينالدىراتىنىنا سەنىم مول», دەدى تەاترتانۋشى نياز يگلاموۆ.
فەستيۆال قورىتىندىسىندا توعىز اتالىم بويىنشا ۇزدىكتەر انىقتالىپ, باس جۇلدە «اباي ايتقان ەڭلىك-كەبەك» سپەكتاكلىمەن اباي وبلىستىق قازاق مۋزىكالىق دراما تەاترىنا بۇيىردى. بۇل قويىلىم – حاكىم مۇراسىنا جاڭاشا كوزقاراس, ۇلتتىق مۇراتتار مەن ماڭگىلىك تاقىرىپتاردىڭ ساحناداعى كوركەم شەشىمى رەتىندە ءادىل باعاسىن الدى. باس جۇلدەمەن بىرگە تەاتر ۇجىمىنا 1 ملن تەڭگەنىڭ سەرتيفيكاتى تابىس ەتىلدى.
جەتىسۋ وبلىسى
