ەۋروپادا جاساندى ينتەللەكت سالاسىنداعى زاڭنامالار اۆتورلارىنىڭ ءبىرى سانالاتىن حەنريك فون شەيل سوڭعى جىلدارى قازاقستان ەكونوميكا سالاسىندا ايتارلىقتاي جەتىستىككە جەتىپ, مەملەكەت پەن قوعام اراسىنداعى بايلانىستاردى نىعايتقانىن اتاپ ءوتتى.
– بۇل – ماقتانۋعا تۇرارلىق جاعداي. الداعى ون جىلدا جاساندى ينتەللەكت قازاقستاندى تۇبەگەيلى وزگەرتەدى. سىزدەردىڭ وسى سالاعا قازىردەن باستاپ ەرەكشە كوڭىل ءبولىپ جاتقاندارىڭىز وتە قۇپتارلىق. الەمنىڭ تۇكپىر-تۇكپىرىندەگى جي زاڭنامالارىن زەرتتەي كەلە, قازاقستان تاجىريبەسى مەنى تاڭعالدىرعانىن ايتا الامىن. سەبەبى سىزدەر ەۋروپالىق وداقتىڭ ەڭ وزىق تاجىريبەسىن قولدانا وتىرىپ, تاۋەكەلدەردى باعالاي الدىڭىزدار. نارىقتىڭ اشىقتىعى مەن ايقىندىعىن قامتاماسىز ەتۋ جولدارىن ويلاستىردىڭىزدار جانە ەڭ باستىسى – ادام قۇقىقتارىن قورعاۋدى باستى نازارعا قويدىڭىزدار, – دەدى ساراپشى.
تىڭدالىم بارىسىندا جاساندى ينتەللەكت جانە تسيفرلىق دامۋ ءمينيسترىنىڭ مىندەتىن اتقارۋشى جاسلان ماديەۆ, عىلىم جانە جوعارى ءبىلىم ءمينيسترى ساياسات نۇربەك, ءماجىلىس دەپۋتاتى ەكاتەرينا سمىشلياەۆا, IT-كومپانيالاردىڭ وكىلدەرى مەن ساراپشىلار ءسوز سويلەدى.
پارلامەنتتىك تىڭدالىم اياسىندا جاساندى ينتەللەكت, تسيفرلىق تەحنولوگيالار جانە يننوۆاتسيالار سالاسىنداعى جوبالار كورمەسى ءوتتى. وندا مەملەكەتتىك ورگاندار مەن IT-كومپانيالار 20-دان استام جاڭاشىلدىقپەن تانىستىردى. جوبالار مەملەكەتتىك قىزمەتتەر مەن قۇقىق قورعاۋ جۇيەسىنەن باستاپ, مەديتسينا, ءبىلىم, لوگيستيكا جانە قۇرىلىسقا دەيىنگى ءتۇرلى باعىتتاردى قامتىدى.
