سۋرەت: rail-news.kz
«باقتى – اياگوز» تەمىرجول جەلىسىن سالۋ ديرەكتسياسىنىڭ باسشىسى قانات راحمانبەرديەۆتىڭ ايتۋىنشا, بيىل 21 شىلدەدە «قتج» ۇك» اق جانە قۇرامىندا «China Harbour Engineering Company Co. Ltd» مەن «Reco Stroy KZ» جشس كومپانيالارى بار كونسورتسيۋممەن كەلىسىمشارتقا قول قويىلعان.
«جاڭا بىرجولاقتى تەمىرجول جەلىسىنىڭ جالپى ۇزىندىعى 297 شاقىرىمدى قۇرايدى, ونىڭ قۇرامىنا 10 بولەك پۋنكت, مال ايداۋ جولدارىمەن جابدىقتالعان 211 سۋ وتكىزگىش قۇبىر, سونداي-اق 78 كوپىر كىرەدى. جوبانىڭ جالپى قۇنى قوسىلعان قۇن سالىعىمەن بىرگە 572,3 ملرد تەڭگە. قازىرگى ۋاقىتتا جوبا اياسىندا قۇنارلى توپىراق قاباتىن سىدىرىپ الۋ, ۆاحتالىق قالاشىقتار قۇرىلىسىنا ىرگەتاس نەگىزدەرىن دايىنداۋ, جەر توسەمىن توسەۋدى باستاۋ, تەحنيكا مەن پەرسونالدى جۇمىلدىرۋ سياقتى دايىندىق جۇمىسى جۇرگىزىلىپ جاتىر» دەيدى.
تەمىرجول توسەمىن سالۋ ءۇشىن ۇزىندىعى 25 مەتر بولاتىن جاڭا ر65 ءتيپتى رەلستەر قاراستىرىلادى. ولار جاڭا تەمىربەتوندى شپالدارعا بەكىتىلەدى. شپالداردىڭ ورنالاسۋ جيىلىگى – ءتۇزۋ جانە قيسىق ۋچاسكەلەردە 1 كم-گە 1 840 شپال. باللاست قيىرشىق تاستان (فراكتسياسى 25–65 مم) جاسالادى, شپال استىنداعى قالىڭدىعى – 35 سم, ال قۇمدى توسەنىشتىڭ قالىڭدىعى – 20 سم. بىرجولاقتى ۋچاسكەنىڭ جەر توسەمىنىڭ ەنى – 7,6 مەتر. جوبانى ىسكە اسىرۋ بارىسىندا زاماناۋي تەحنولوگيالىق جابدىقتار ساتىپ الىنىپ, تەمىرجول قىزمەتىنىڭ بارلىق باعىتىندا سىنالعان ءارى ءتيىمدى تەحنولوگيالاردى بارىنشا ەنگىزۋ كوزدەلىپ وتىر.
وندىرىستىك جوسپارعا سايكەس, جەلى قۇرىلىسىن اياقتاۋ جانە پايدالانۋعا بەرۋ ۋاقىتى 2027 جىلدىڭ سوڭىنا قاراي مولشەرلەنگەن. جوبا تولىق تامامدالعان سوڭ كەمى 1 200 ادام تۇراقتى جۇمىسپەن قامتىلادى دەگەن جوسپار بار.
2030 جىلعا دەيىن «باقتى – اياگوز» تەمىرجول جەلىسى بويىنشا جۇك تاسىمالداۋ كولەمىنىڭ ماركەتينگتىك بولجامى دا انىقتالعان. جۇكتەمە شامامەن 7,8 ملن توننا دەپ باعالانعان. ءبىر سوزبەن ايتقاندا, ەجەلگى ۇلى جىبەك جولى بويىندا ورنالاسقان باقتى كەدەن بەكەتى قىتايدىڭ ەۋروپاعا اشىلعان تەرەزەسىنە اينالۋعا ءتيىس.
جالپى, سوڭعى جىلدارى شەكاراداعى وتكىزۋ بەكەتتەرى بەلسەندى جاڭعىرتىلا باستادى. رەسمي مالىمەتتەرگە سۇيەنسەك, بيىل ەلىمىزدە 8 شەكارا بەكەتى تولىعىمەن ىسكە قوسىلادى. الداعى ءۇش جىلدا تاعى 34 بەكەت جاڭارادى. 2023 جىلى پرەزيدەنت تاپسىرماسى اياسىندا «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا قىتايدان بەرى قاراي ترانزيتتىك اعىندى ۇلعايتۋ شارالارى قولعا الىندى.
«كولىك جانە لوگيستيكا سالاسىندا «باقتى – اياگوز» تەمىرجولى, سەمەيدەگى جاڭا كوپىر قۇرىلىسى مەن قالاعا اينالما جول سالۋ جوبالارى ەرەكشە نازاردا. تۋريزم باعىتىندا الاكول جاعالاۋىن اباتتاندىرۋ جۇمىستارى جالعاسادى. كاسىپكەرلىكتى دامىتۋدا ءونىم وندىرەتىن بيزنەس سۋبەكتىلەرىنىڭ ۇلەسىن ارتتىرۋ, ءبىلىم سالاسىندا جاساندى ينتەللەكتىمەن جۇمىس ىستەۋ قۇزىرەتىن مەكتەپتەن قالىپتاستىرۋ, دەنساۋلىق ساقتاۋ جۇيەسىندە ۇلتتىق جوبالاردى ىسكە اسىرۋ, سونداي-اق قۇرىلىس سالاسىندا جاساندى ينتەللەكت ەلەمەنتتەرىن قولدانۋدى ۇيىمداستىرۋ تاپسىرىلدى», دەلىنگەن وبلىس اكىمدىگىنىڭ حابارلاماسىندا.
وڭىردە كەيىنگى التى ايدا كولىك جانە لوگيستيكا سالاسىندا ايتارلىقتاي سەرپىن بايقالدى. ەڭ اۋەلى ەلدى كوپتەن الاڭداتىپ كەلگەن سەمەيدىڭ اسپالى كوپىرى جوندەلدى. جىلىنا 700 مىڭعا جۋىق كولىك وتەتىن بۇل كوپىر – وبلىس ورتالىعىنىڭ باستى ارتەرياسى بولىپ تۇر. شەشىمى كەشەۋىلدەپ كەلگەن تاعى ءبىر وزەكتى ماسەلە – سەمەي قالاسىن اينالىپ وتەتىن اۆتوجول جوباسى دا ناقتى ىسكە اينالا باستادى. وبلىس اكىمى بەرىك ءۋالي مەن قىتايلىق ينۆەستور چجوۋ حايۆەي قول قويعان كەلىسىم اياسىندا اينالما جول قۇرىلىسى 2028 جىلعا دەيىن اياقتالادى دەپ جوسپارلانعان. بۇل جوبا ەلدىڭ 2030 جىلعا دەيىنگى كولىك-لوگيستيكالىق ستراتەگياسىنا ەنىپ, حالىقارالىق قارجى ينستيتۋتتارىنىڭ قولداۋىمەن جۇزەگە اسپاق.
اۋە قاتىناسى دا ايتارلىقتاي جاندانىپ كەلەدى. ءۇرجار اۋدانىنا «SCAT» كومپانياسى اپتاسىنا 7 رەت تۇراقتى رەيس جۇرگىزدى. قازىر سەمەي – الماتى, استانا, ءۇرجار باعىتتارىندا تۇراقتى اۋە قاتىناسى بار. ال 1 مامىردان باستاپ الماتى – سەمەي – الماتى باعىتى بويىنشا قوسىمشا رەيستەر (اپتاسىنا 3 رەت), استانا – سەمەي – استانا (1 رەت), ال ماۋسىمنان شىمكەنت – سەمەي باعىتىنا «FlyArystan» ۇشاعى قاتىناي باستادى.
«قازاقستان تەمىر جولى» كومپانياسى وڭىردەگى 10 تەمىرجول ۆوكزالىن جاڭعىرتۋعا كىرىستى. سەمەي, اياگوز, اقتوعاي, شار, جارما, ۇشبيىك, بەلاعاش, جالاڭاشكول سەكىلدى ءىرى ستانسالاردا كەشەندى جوندەۋ جۇرگىزىلمەك. قولايلى گەوگرافيالىق ورنالاسۋىنا وراي, اباي وبلىسى – قىتاي, رەسەي, ورتالىق ازيانى بايلانىستىرىپ جاتقان ءوڭىر. بۇل تۇرعىدا ءىرى حالىقارالىق ساۋدا دالىزىنە شىعاتىن كولىك-لوگيستيكالىق حابتى دامىتۋعا مۇمكىندىك مول. وسى رەتتە وڭىردە بىرقاتار ءىرى ينۆەستيتسيالىق جوبا جۇزەگە اسىرىلماق. سولاردىڭ ءبىرى – «اياگوز – باقتى» تەمىرجولى مەن قۇرلىق پورتىنىڭ قۇرىلىسى.
«مەملەكەت باسشىسىنىڭ ەلىمىزدىڭ لوگيستيكالىق الەۋەتىن ارتتىرۋ جونىندەگى باستامالارى دا باستى نازارىمىزدا. بۇل ورايدا الدىمىزدا جاڭا تەمىرجول تەلىمى, ەلىمىزدى قىتايمەن جالعايتىن «اياگوز – باقتى» تەمىرجولىن سالۋ سىندى جاۋاپتى دا كۇردەلى مىندەت تۇر. ونىڭ اباي ەلى ءۇشىن ماڭىزى زور» دەيدى سەمەي جول ديستانتسياسىنىڭ ديرەكتورى, قۇرمەتتى تەمىرجولشى راحات نۇرعازى ۇلى.
اباي وبلىسى
