سۋرەت: gov.kz
«Desentrathon» حاكاتونى ەلىمىزدە وسىمەن ءتورتىنشى رەت وتكىزىلىپ وتىر. العاشقى جىلى 12 قالا قامتىلسا, بيىل 20 قالانىڭ قاتىسۋشىلارى باق سىنادى. جەڭىمپازدارعا قوماقتى سىياقى قاراستىرىلعان. ماسەلەن, «Solana Foundation» – 20 مىڭ دوللار, «Indrive» – 20 مىڭ دوللار, ال «بانك تسەنتركرەديت» 10 مىڭ دوللار كولەمىندە جۇلدە تىكتى.
وسى جوباعا قاتىسۋشى ازامات جەڭىسوۆتىڭ ايتۋىنشا, جاساندى ينتەللەكت سالاسىندا قازاق ءتىلىن دامىتۋعا باعىتتالعان جوبالاردى قولعا الۋ وتە ماڭىزدى.
«قازىر جاساندى ينتەللەكت بويىنشا ماگيستراتۋرادا وقىپ جاتىرمىن. «Astana Hub» اياسىنداعى «Tomorrow school» مەكتەبىنىڭ تۇلەگىمىن. ول جاقتا 24 ساعاتتىق اشىق ينفراقۇرىلىم, تەگىن كۋرستار بار. بۇل قولداۋ جاستاردى IT سالاسىنا تارتۋعا ايرىقشا ىقپال ەتىپ وتىر. ءوزىم دە جاساندى ينتەللەكت سالاسىندا مىقتى مامان بولۋدى ماقسات ەتتىم. ەگەر وسى حاكاتوندا جەڭىمپاز اتانسام, ستارتاپ قۇرۋ ويىمدا بار. اسىرەسە قازاق ءتىلىن دامىتۋعا باعىتتالعان جوبالاردى قولعا العىم كەلەدى. مىسالى, قازاقشا سويلەۋدى تانيتىن, سويلەۋ ارقىلى ءتىل ۇيرەتەتىن قوسىمشالار ءالى دە كەمشىندەۋ. ناقتىراق ايتسام, «Duolingo» قوسىمشاسىن قازاقشا سويلەتكىم كەلەدى», دەيدى ا.جەڭىسوۆ.
بيىلعى جيىنعا IT ماماندىعىندا وقىپ جۇرگەن ستۋدەنتتەردەن بولەك, مەكتەپ وقۋشىلارى مەن تاجىريبەلى ينجەنەرلەرگە دەيىن قاتىستى. وسى حاكاتون بارىسىندا پايدا بولعان تىڭ يدەيالار مەن شەشىمدەر كەيىن سەرىكتەس كومپانيالاردىڭ جۇمىستارىنا ەنگىزىلۋى مۇمكىن. سوندىقتان بۇل ءىس-شارا – ەلىمىزدەگى تەحنولوگيالىق قوعامنىڭ دامۋ دەڭگەيىن كورسەتىپ قانا قويماي, جاڭا ستارتاپتار مەن يننوۆاتسيالىق ونىمدەردىڭ پايدا بولۋىنا جول اشادى. وسى الاڭدا قاتىسۋشىلار ءبىر-بىرىمەن باسەكەگە ءتۇسىپ, تاجىريبەلى مەنتورلاردان كەڭەس الىپ, جوبالارىن سالالىق ساراپشىلارعا ۇسىنادى. ۇزدىك دەپ تانىلعان كوماندالار ەلىمىزدەگى ەڭ باستى تەحنولوگيالىق الاڭ – «DigitalBridge – 2025» حالىقارالىق كونفەرەنتسياسىندا ءوز جوبالارىن الەۋەتتى ينۆەستورلار مەن سەرىكتەستەرگە تانىستىرۋ قۇقىعىنا يە بولادى.
ايتا كەتەيىك, حاكاتونعا قاتىسۋشىلار باعدارلامالاۋ سالاسىندا عانا ەمەس, بيزنەس-يدەيا, ماركەتينگ, قارجىلىق ساۋاتتىلىق, جوبانى باسقارۋ سياقتى باعىتتاردا دا ءبىلىمىن شىڭدايدى. مۇنداي كەشەندى تاجىريبە بولاشاق ءىت-كاسىپكەرلەر مەن ستارتاپشىلارعا بەرىلگەن تاپتىرماس مۇمكىندىك ەكەنى ءسوزسىز.
