جاڭا ساياباق – ءوڭىر تۇرعىندارىنىڭ دەمالىس پەن بوس ۋاقىتىن ءتيىمدى وتكىزۋىنە ارنالعان جاڭا مادەني-الەۋمەتتىك كەڭىستىك. مۇندا اۆتوماتتى سۋارۋ جۇيەسى ورناتىلىپ, اسەم گازون توسەلگەن. بالالار ءۇشىن ارنايى ويىن الاڭى, «workout» ايماعى, شاعىن فۋتبول الاڭى, ۆەلوجول جانە جاياۋ جۇرگىنشىلەرگە ارنالعان جولدار قاراستىرىلعان. سونىمەن بىرگە دەمالىس ورىندىقتارى مەن زاماناۋي جارىق شامدارى ورناتىلىپ, ساياباق تۇنگى ۋاقىتتا دا جايلى ءارى قاۋىپسىز بولماق.
«ەڭ باستى جاڭالىقتىڭ ءبىرى – قالادا تۇڭعىش رەت ورناتىلعان ەرەكشە ويىن كەشەنى. دەكوراتيۆتى ەلەمەنتتەرى بار الىپ «فرەگات» كەمە تۇرىندەگى بالالار الاڭى بالدىرعانداردىڭ قيالىن شارىقتاتىپ, ولاردىڭ ويىنىنا جاڭا سەرپىن بەرەدى. كۇز ايىندا ساياباق اۋماعىنا ءوڭىردىڭ تابيعاتىنا بەيىمدەلگەن 200-دەن استام جاپىراقتى جانە قىلقان جاپىراقتى اعاش وتىرعىزامىز. بۇل جاسىل جەلەك بولاشاقتا ساياباقتى ناعىز تىنىس الاتىن ايماققا اينالدىرماق», دەيدى قالا اكىمى ەرنات ءبازىل.
كەيىنگى جىلدارى تالدىقورعاندا اباتتاندىرۋ مەن كوگالداندىرۋعا ايرىقشا كوڭىل ءبولىندى. بيىلدىڭ وزىندە بىرنەشە اۋقىمدى جوبا جۇزەگە اسىپ وتىر. قاراشا ايىندا «بىرلىك» شاعىن اۋدانىندا جاڭا گۇلزار قۇرىلىسى اياقتالىپ, پايدالانۋعا بەرىلەدى. سونىمەن قاتار «جاستار» ساياباعى قايتا جاڭعىرتىلىپ, «جەڭىس» ساياباعىنىڭ كىرەبەرىس ستەللاسى جوندەلىپ جاتىر. ال قالانىڭ ەڭ كورنەكتى ورىندارىنىڭ ءبىرى – ورتالىق ساياباققا قابانباي باتىر كوشەسى جاعىنان جاڭا ساۋلەتتى اركا ورناتىلماق.
بۇل جۇمىستىڭ بارلىعى تالدىقورعاننىڭ كوركىن اشىپ قانا قويماي, تۇرعىنداردىڭ بوس ۋاقىتىن مادەنيەتتى ءارى جايلى وتكىزۋىنە مۇمكىندىك بەرەدى.
جەتىسۋ وبلىسى
