سميتسون ينستيتۋتىمەن ىنتىماقتاستىق
پرەزيدەنتتىڭ ايتۋىنشا, قازاقستاندىق انتروپولوگتار, تاريحشىلار, مادەنيەتتانۋشىلار مەن ونەرتانۋشىلارعا الەمدەگى ەڭ كونە ءارى بەدەلدى عىلىمي-زەرتتەۋ ورتالىقتارىنىڭ ءبىرى سانالاتىن سميتسون ينستيتۋتىندا ءبىلىم الۋ مۇمكىندىگى بەرىلەدى. بۇل قادام «بولاشاق» باعدارلاماسى اياسىندا جۇزەگە اسادى.
سميتسون ينستيتۋتى – الەمدەگى ەڭ ءىرى مادەني, ءبىلىم بەرۋ جانە عىلىمي-زەرتتەۋ كەشەنى. ونىڭ قۇرامىنا 21 مۇراجاي مەن گالەرەيا, 14 عىلىمي جانە ءبىلىم بەرۋ ورتالىعى, سونداي-اق كىتاپحانالار مەن ۇلتتىق حايۋاناتتار باعى كىرەدى. مۇنداعى باي عىلىمي ورتا قازاقستاندىق جاس عالىمدارعا تىڭ ىزدەنىستەرگە جول اشىپ, الەمدىك دەڭگەيدەگى جاڭا تاجىريبەلەردى يگەرۋگە مۇمكىندىك بەرەدى. پرەزيدەنت اتاپ وتكەندەي, مۇنداي ىنتىماقتاستىق قازاقستاننىڭ عىلىمي قاۋىمداستىعىن جاڭا دەڭگەيگە كوتەرىپ, ۇلتتىق عىلىمنىڭ دامۋىنا سەرپىن بەرمەك.
ETS كومپانياسىمەن جاڭا باستامالار
پرەزيدەنت توقاەۆتىڭ تاعى ءبىر ماڭىزدى كەزدەسۋى – ءبىلىمدى باعالاۋ مەن تەستىلەۋ سالاسىنداعى الەمدىك كوشباسشى سانالاتىن Educational Testing Service (ETS) كومپانياسىنىڭ باسشىلىعىمەن ءوتتى. بۇل ۇيىم – تەستولوگيا عىلىمىنىڭ باستاۋىندا تۇرعان ەڭ كونە ءارى بەدەلدى قۇرىلىمداردىڭ ءبىرى.
كەلىسسوزدەر ناتيجەسىندە ETS-ءتىڭ جەتەكشى ماماندارى قاتىساتىن ارنايى بىرلەسكەن جۇمىس توبى قۇرىلادى. ول توپ قازاقستانداعى ۇلتتىق بىرىڭعاي تەستىلەۋدى (ۇبت) حالىقارالىق دەڭگەيدەگى ساراپشىلاردىڭ تاجىريبەسىنە سۇيەنە وتىرىپ تۇبەگەيلى جاڭعىرتۋمەن اينالىسادى. ناتيجەسىندە, ۇبت-نىڭ مازمۇنى مەن ادىستەمەسى زاماناۋي تالاپتارعا ساي قايتا قارالىپ, باعالاۋدىڭ ساپاسى جوعارى حالىقارالىق ستاندارتتارعا سايكەستەندىرىلمەك.
ETS بۇگىندە جىل سايىن الەمنىڭ 180 ەلىندە 50 ميلليوننان استام تەست ازىرلەپ, وتكىزەدى. ونىڭ تاجىريبەسى قازاقستان ءۇشىن ماڭىزدى, سەبەبى قازىرگى ءبىلىم بەرۋ رەفورمالارىنىڭ تابىسى ءادىل باعالاۋ جۇيەسىنە تىكەلەي بايلانىستى. مەملەكەت باسشىسى بۇل باعىتتاعى سەرىكتەستىكتى «قازاقستان ءبىلىم جۇيەسىنىڭ باسەكەگە قابىلەتتىلىگىن ارتتىرۋدىڭ كەپىلى» دەپ اتادى.
پرەزيدەنتتىڭ اقش-تاعى ساپارى اياسىندا وتكەن بۇل كەلىسسوزدەر قازاقستان عىلىمى مەن ءبىلىم بەرۋ سالاسىندا جاڭا مۇمكىندىكتەردىڭ ەسىگىن اشىپ وتىر. سميتسون ينستيتۋتىمەن ارىپتەستىك – وتاندىق عالىمداردىڭ الەمدىك عىلىمي كەڭىستىككە شىعۋىنا جول اشسا, ETS كومپانياسىمەن ىنتىماقتاستىق – ۇلتتىق تەستىلەۋ جۇيەسىن حالىقارالىق ستاندارتتارعا بەيىمدەۋگە مۇمكىندىك بەرەدى. بۇل قادامدار قازاقستاننىڭ جاڭا بۋىن عالىمدارى مەن ءبىلىم الۋشىلارىنا ساپالى ءبىلىم الۋعا, وزىق تاجىريبەلەردى مەڭگەرۋگە جانە ەلدىڭ ينتەللەكتۋالدى الەۋەتىن كۇشەيتۋگە ىقپال ەتپەك.
