قۇرلىق اسكەرلەرىنىڭ باس قولباسشىسى گەنەرال-مايور مەرەكە كوشەكباەۆ مايدانگەرگە قورعانىس ءمينيسترىنىڭ اتىنان العىس حات, ەستەلىك سىيلىقتار مەن مايدان كەزىن ەسكە سالاتىن دالالىق اس ۇلەسىن تابىستادى. ول ارداگەردىڭ ەرلىگى قازىرگى اسكەري قىزمەتكەرلەر ءۇشىن ۇلكەن ۇلگى ەكەنىن اتاپ ءوتتى.
سونىمەن قاتار, قورعانىس مينيسترلىگى رزاعۇل بايكەشەۆتىڭ قۇرمەتىنە ارنايى اسكەري پاراد ۇيىمداستىردى. سالتاناتتى شارا بارىسىندا قۇرمەت قاراۋىلى مەن اسكەري كوللەدج كادەتتەرى ساپ تۇزەپ ءوتتى. ال اسكەري وركەستر مەن ونەرپازدار سوعىس جىلدارىنداعى اندەردى ورىندادى.
ارداگەر كورسەتىلگەن قۇرمەتكە ريزاشىلىعىن ءبىلدىرىپ, اسكەري قىزمەتشىلەرگە اق باتاسىن بەردى. ول قازاقستاننىڭ تىنىشتىعى مەن وركەندەۋىن تىلەدى.
رزاعۇل بايكەشەۆ 1923 جىلى اقتوبە وبلىسىندا دۇنيەگە كەلگەن. 1943 جىلى اسكەرگە شاقىرىلىپ, رجەۆ تۇبىندەگى شايقاستارعا, سونداي-اق پولشا, رۋمىنيا جانە ۆەنگريا اۋماعىنداعى ۇرىستارعا قاتىسقان. سوعىستى ەفرەيتور شەنىمەن اياقتاعان.
مايدانگەر I جانە II دارەجەلى وتان سوعىسى وردەندەرىمەن, جۋكوۆ مەدالىمەن جانە بىرنەشە مەرەيتويلىق ماراپاتتارمەن ناگرادتالعان. سوعىستان كەيىن ۇزاق جىل ەڭبەك ەتىپ, 1983 جىلى زەينەتكە شىققان.
ەسكە سالايىق, مەرەكە قارساڭىندا قازاقستاندا تۇراتىن ۇوس ارداگەرلەرىنىڭ ارقايسىنا 5 ملن تەڭگەدەن تولەنگەن بولاتىن.
سونداي-اق, پرەزيدەنت قاسىم-جومارت توقاەۆتىڭ جارلىعىمەن ۇلى وتان سوعىسىنا قاتىسۋشى كەنجەباي مادەن ۇلى مادەنوۆكە «حالىق قاھارمانى» اتاعى بەرىلدى.
