«بۇرىن-سوڭدى بولماعان گەوساياسي دۇربەلەڭدەر كەزىندە مەملەكەتتەرىمىز ۇيلەسىمدى ءىس-قيمىل ارقىلى ەكونوميكالارىنىڭ ورنىقتى دامۋىن, الەمدىك نارىقتاعى باسەكەگە قابىلەتتىلىگىن قامتاماسىز ەتە الدى.
قازىر ءبىزدىڭ الدىمىزدا ەۋرازيا ەكونوميكالىق وداعىنىڭ الەۋەتىن ودان ءارى ارتتىرىپ, قارقىندى دامىتۋ جونىندە ستراتەگيالىق ماڭىزدى مىندەت تۇر.
دۇنيەجۇزىلىك شارۋاشىلىق بايلانىستارىنىڭ باعدارى جاپپاي وزگەرىپ جاتقان كەزەڭدە ءبىز تەرىس سيپاتتاعى جاھاندىق ۇردىستەرگە توتەپ بەرۋ ءۇشىن كۇش-جىگەرىمىزدى جۇمىلدىرۋىمىز كەرەك.
الەمدىك نارىقتاعى احۋال كۇردەلى, ءتىپتى كوپ جاعدايدا بولجاپ بىلە المايسىز. وزىمىزگە ەتەنە تانىس ەكونوميكالىق سىناقتارعا قوسا, تسيفرلىق سالادا اۋقىمدى وزگەرىستەر بولىپ جاتىر. بۇل كوپ ۇزاماي «ويىن ەرەجەسىن» تولىقتاي جاڭارتادى.
پرەزيدەنت قازاقستاندى تسيفرلىق مەملەكەتكە اينالدىرۋ ءۇشىن جاسالىپ جاتقان جۇيەلى قادامدارعا توقتالدى.
«قازاقستان «اقىلدى» پلاتفورمالاردى مەملەكەتتىك باسقارۋ جۇيەسى مەن ەكونوميكانىڭ نەگىزگى سەكتورلارىنا تابىستى ەنگىزۋدە.
بىلتىر حالىققا جولداۋىمدا قازاقستاندى تسيفرلىق ەلگە اينالدىرۋ جونىندە مىندەت جۇكتەدىم.
بۇل جۇمىسقا جۇيەلى سيپات بەرۋ ءۇشىن بيىل, ياعني, 2026 جىل ەلىمىزدە جاساندى ينتەللەكت جانە تسيفرلىق دامۋ جىلى بولىپ جاريالاندى.
بولاشاقتىڭ باعدارىن ايقىنداي وتىرىپ, ءبىز ازاماتتاردىڭ تسيفرلىق ورتاداعى قاۋىپسىزدىگىنە باسا ءمان بەرەمىز.
قازاقستاننىڭ جاڭا كونستيتۋتسياسىندا العاش رەت دەربەس مالىمەتتەردى قورعاۋ قۇقىعى بەكىتىلدى, سونىڭ ىشىندە تسيفرلىق تەحنولوگيالاردى قولدانا وتىرىپ, دەرەكتەردى زاڭسىز جيناۋعا, وڭدەۋگە, پايدالانۋعا تىيىم سالىندى. مۇنى, شىن مانىندە, وتە ماڭىزدى كونستيتۋتسيالىق مىندەت دەپ سانايمىز.
ينستيتۋتسيونالدىق نەگىزدى نىعايتىپ, يننوۆاتسيانى كەشەندى تۇردە ەنگىزۋ ماقساتىندا جاساندى ينتەللەكت جانە تسيفرلىق دامۋ مينيسترلىگى قۇرىلدى.
جاساندى ينتەللەكتىنى دامىتۋ جونىندەگى كەڭەستى قۇرۋ دا پايدالى شارانىڭ ءبىرى بولدى. اتالعان كونسۋلتاتيۆتىك ورگان قۇرامى جەتەكشى شەتەلدىك جانە وتاندىق ساراپشىلاردان, بيزنەس پەن مەملەكەتتىك مەكەمەلەردىڭ وكىلدەرىنەن جاساقتالدى».
سونىمەن قاتار, مەملەكەت باسشىسى «قازاقستان جەدەل تسيفرلىق ترانسفورماتسيانى ساپالى تۇردە جۇرگىزۋ ءۇشىن ەاەو مەملەكەتتەرىمەن سەرىكتەستىككە جانە ىنتىماقتاستىققا اشىق» ەكەنىن جەتكىزدى.
«بۇدان بولەك, ءبىز بارلىق قاجەتتى ينفراقۇرىلىمدى جەدەل دامىتۋدى قولعا الدىق.
قازاقستان وڭىرىمىزدە ءبىرىنشى بولىپ, وسى سالاداعى الەمدىك كوشباسشى سانالاتىن NVIDIA كومپانياسىنىڭ وزىق تەحنولوگيالارى نەگىزىندە ەكى سۋپەركومپيۋتەردى ىسكە قوستى.
«دەرەكتەردى وڭدەۋ ورتالىقتارىنىڭ القابىن» قۇرۋ باستى مىندەت رەتىندە جاريالاندى. بۇل اۋقىمدى جوبا جاھاندىق كاپيتال مەن الەمدىك تەحنولوگيالىق الپاۋىتتار ءۇشىن تارتىمدى ورتاعا اينالدى.
سونىمەن قاتار ادامي كاپيتالعا قوماقتى قارجى قۇيىپ جاتىرمىز. حالىقارالىق Alem.ai ورتالىعى جانىنان Tumo جانە Tomorrow school جاڭا بۋىن مەكتەپتەرى, سونداي-اق الەمگە بەلگىلى بىرقاتار كومپانيانىڭ (Telegram, Presight) زەرتحانالارى اشىلدى.
ەكى اپتا بۇرىن «قازاقستان رەسپۋبليكاسىنىڭ ورتا ءبىلىم بەرۋ جۇيەسىنە جاساندى ينتەللەكتىنى ەندىرۋ جونىندەگى شارالار تۋرالى» جارلىققا قول قويدىم.
ماقساتىمىز – دەربەس ءبىلىم بەرۋگە دەن قويا وتىرىپ, پەداگوگتەردىڭ بىلىكتىلىگىن ارتتىرۋ, ينفراقۇرىلىم مەن وقۋ ستاندارتتارىن دامىتۋ.
قازاقستان جەدەل تسيفرلىق ترانسفورماتسيانى ساپالى تۇردە جۇرگىزۋ ءۇشىن ەاەو مەملەكەتتەرىمەن سەرىكتەستىككە جانە ىنتىماقتاستىققا اشىق».
سونىمەن قاتار فورۋمنىڭ پلەنارلىق سەسسياسىندا رەسەي پرەزيدەنتى ۆلاديمير پۋتين, بەلارۋس پرەزيدەنتى الەكساندر لۋكاشەنكو, قىرعىزستان پرەزيدەنتى سادىر جاپاروۆ, ارمەنيا ۆيتسە-پرەمەرى مگەر گريگوريان, كۋبا رەسپۋبليكاسىنىڭ ۆيتسە-پرەزيدەنتى سالۆادور ۆالدەس مەسا, ۆەتنام پرەمەر-ءمينيسترىنىڭ ورىنباسارى حو كۋوك زۋنگ, موڭعوليا پرەمەر-ءمينيسترىنىڭ ورىنباسارى نيامتايشيرىن نومتويبايار, ەۋرازيالىق ەكونوميكالىق كوميسسيا القاسىنىڭ توراعاسى باقىتجان ساعىنتاەۆ ءسوز سويلەدى.
