البەتتە, ۇستازدىقتى جۇرەك قالاۋىمەن تاڭداپ, سانالى عۇمىرىن شاكىرت تاربيەسىنە ارناعان جانداردىڭ ەڭبەگى ءاردايىم قۇرمەتكە لايىق. ءبىزدىڭ كەيىپكەرىمىز دە ءوزىنىڭ ولشەۋسىز ەڭبەگىنىڭ ارقاسىندا مۇنداي قۇرمەتتەن كەندە بولعان ەمەس.
1958 جىلدىڭ 5 جەلتوقسانىندا قاسيەتتى تورعاي توپىراعىندا دۇنيەگە كەلگەن ءاسيا امىرحانقىزى بالا كۇنىنەن بىلىمگە قۇشتار بولىپ ءوستى. كەيىن وسكەمەن پەداگوگيكالىق ينستيتۋتىن «حيميا-بيولوگيا مۇعالىمى» ماماندىعى بويىنشا ءتامامداپ, ۇستازدىق جولىن باستادى. ونىڭ ەڭبەك جولى 1980-1981 وقۋ جىلىندا كيروۆ ورتا مەكتەبىنەن باستاۋ الىپ, كەيىنگى تاعدىرىن دا ءبىلىم ورداسىمەن ماڭگى بايلانىستىردى.
شاكىرت جۇرەگىنەن ورىن العان ۇستاز
سودان بەرى, مىنە, قىرىق جىلعا جۋىق ۋاقىتىن شاكىرت تاربيەسىنە ارنادى. ونىڭ ىشىندە 37 جىل بويى ىبىراي التىنسارين اتىنداعى تورعاي ورتا مەكتەبىندە حيميا-بيولوگيا پانىنەن ساباق بەرىپ, تالاي بۋىننىڭ جۇرەگىنەن ورىن الدى.
ۇستاز بولۋ تەك ءپان ۇيرەتۋ دەپ ويلايتىندار قاتەلەسسە كەرەك. بىزدىڭشە, بۇل – بالا جۇرەگىنە جول تابۋ, ومىرگە باعىت بەرۋ, سەنىم سىيلاۋ. ءاسيا امىرحانقىزى وسى قاسيەتتىڭ ءبارىن بويىنا سىڭىرە بىلگەن جان. ساباق ۇستىندە وقۋشىنى تەك بىلىمگە باۋلىپ قانا قويماي, ولاردىڭ وي-ءورىسىن كەڭەيتىپ, ومىرگە دەگەن قىزىعۋشىلىعىن ارتتىرۋعا كۇش سالدى. جاڭا تەحنولوگيالاردى ءتيىمدى پايدالانىپ, وقۋشىلاردىڭ پانگە دەگەن ىنتاسىن وياتا ءبىلدى.
ونىڭ شاكىرتتەرى ءتۇرلى پاندىك وليمپيادالاردا جۇلدەلى ورىندار الىپ, اۋداندىق, وبلىستىق دەڭگەيدە مەكتەپ مەرەيىن اسقاقتاتتى. ۇستاز ەڭبەگىنىڭ جەمىسى دە وسى بولسا كەرەك. سەبەبى جاقسى مۇعالىمنىڭ ءىزى, ارينە, شاكىرتىنىڭ جەتىستىگىنەن كورىنەدى.
ىزدەنىس پەن ەڭبەكتىڭ جەمىسى
ءاسيا امىرحانقىزى – ۇنەمى ىزدەنىستە جۇرەتىن ۇستازداردىڭ قاتارىنان. ول ءبىلىم جەتىلدىرۋ كۋرستارىنا قاتىسىپ, زامان تالابىنا ساي جاڭاشىل ادىستەردى مەڭگەرىپ وتىردى. PISA حالىقارالىق زەرتتەۋلەرى اياسىندا فۋنكتسيونالدىق ساۋاتتىلىقتى ارتتىرۋ باعىتىندا دا ءبىلىمىن تولىقتىردى.
ەرەن ەڭبەگى ەلەۋسىز قالعان جوق. ءار جىلدارى اۋداندىق, وبلىستىق ماراپاتتارعا يە بولىپ, 2023 جىلى قازاقستان رەسپۋبليكاسىنىڭ وقۋ-اعارتۋ مينيسترلىگىنىڭ ء«بىلىم بەرۋ ءىسىنىڭ ۇزدىگى» قۇرمەت ديپلومىمەن ماراپاتتالدى. ال 2024 جىلى ۇستازدار ءۇشىن ەڭ ۇلكەن ماراپاتتاردىڭ ءبىرى سانالاتىن «ىبىراي التىنسارين» توسبەلگىسىن يەلەندى.
دەگەنمەن ءاسيا امىرحانقىزى ءۇشىن دە ەڭ ۇلكەن ماراپات – شاكىرتتەرىنىڭ العىسى. سەبەبى ۇستاز جۇرەگىنىڭ جىلۋى جىلدار وتسە دە ۇمىتىلمايدى. بۇگىندە ونىڭ الدىنان ءبىلىم العان تالاي شاكىرت ءومىردىڭ ءار سالاسىندا ەڭبەك ەتىپ ءجۇر. ولار ءۇشىن ۇستازىنىڭ ورنى قاشاندا بولەك.
ۇستازعا دەگەن شاكىرت قۇرمەتى
«ۇستازدىق جول – ۇلى جول», ادام بالاسىنىڭ ساناسىنا ساۋلە ءتۇسىرىپ, رۋحاني بايىتاتىن, وتاننىڭ بولاشاعىن قالىپتاستىراتىن ەڭ قاسيەتتى ءارى جاۋاپتى ماماندىق. ۇرپاققا ومىرلىك باعدار بەرەتىن ومىرلىك ۇستانىم.
شاكىرتتەرىنىڭ العىسى دەمەكشى, ءاسيا اپايىمىز ءبىزدىڭ دە سۇيىكتى ۇستازىمىز. سىيلى سىنىپ جەتەكشىمىز. ءاردايىم ماقتان تۇتاتىن جان! ونىڭ تاربيەسىن كورگەن تالاي شاكىرت بۇگىندە ەل دامۋىنا وزىندىك ۇلەس قوسىپ كەلەدى. اۋدان, وبلىس, رەسپۋبليكانى بىلاي قويعاندا, شەتەلدەردە جاۋاپتى قىزمەتتەر اتقارىپ ءجۇر. ۇستازىنىڭ بەرگەن ءبىلىمى مەن ءتالىم-تاربيەسىنىڭ ارقاسىندا تالاي بيىك بەلەستەردى باعىندىرىپ, كەيىنگى جاس بۋىنعا ۇلگى-ونەگە بولىپ كەلەدى.
ونەگەلى وتباسى – ۇلتقا ۇلگى
الايدا ءاسيا اپايدىڭ اپپاق الەمى تەك مەكتەپ قابىرعاسىمەن عانا شەكتەلمەيدى. ونىڭ ومىرىندەگى ەڭ ۇلكەن تىرەكتەرىنىڭ ءبىرى – وتباسى. ومىرلىك سەرىگى ايتباەۆ ەرلان اعاي دا تورعاي وڭىرىنە كەڭىنەن تانىلعان ازاماتتاردىڭ قاتارىنان ەدى... ومىردەن ەرتە كەتتى...
ەرلان اعا 1958 جىلى دۇنيەگە كەلدى. 1975 جىلى ىبىراي التىنسارين اتىنداعى تورعاي قازاق ورتا مەكتەبىن ءتامامداپ, كەيىن ارقالىق پەداگوگيكالىق ينستيتۋتىن سىزۋ جانە سۋرەت ماماندىعى بويىنشا 1986 جىلى اياقتادى. ەڭبەك جولىندا №157 كاسىپتىك-تەحنيكالىق ۋچيليششەدە مۇعالىم, ديرەكتوردىڭ تاربيە ءىسى جونىندەگى ورىنباسارى, اۋداندىق مەكتەپ-ينتەرنات باسشىسى, تورعايداعى م. يۆانوۆ اتىنداعى ورىس ورتا مەكتەبى مەن ش.ءۋاليحانوۆ اتىنداعى ورتا مەكتەپتىڭ ديرەكتورى قىزمەتتەرىن اتقاردى.
ول تەك بىلىكتى پەداگوگ قانا ەمەس, كاسىبي سۋرەتشى رەتىندە دە تورعاي وڭىرىنە كەڭىنەن تانىلعان جان. ماسكەۋدە وتكەن بۇكىلوداقتىق سۋرەتشىلەر كورمەسىنە قاتىسىپ, كۇمىس جۇلدەگە يە بولۋى – سونىڭ ايقىن دالەلى. اۋداننىڭ كوركەيۋىنە زور ۇلەس قوسىپ, تورعاي ءوڭىرىنىڭ مادەني كەلبەتىنە ءوز قولتاڭباسىن قالدىردى. بۇگىندە جانگەلدين اۋدانىنىڭ گەربى دە ەرلان اعايدىڭ شىعارماشىلىق ەڭبەگىنىڭ جەمىسى.
وسىنداي ونەگەلى شاڭىراقتان تاربيەلى ۇرپاق ءوسىپ شىققانى دا زاڭدىلىق سەكىلدى. بالالارى بۇگىندە ەلىمىزدىڭ ءار سالاسىندا ابىرويلى قىزمەتتەر اتقارىپ ءجۇر. رۋسلان ەرلان ۇلى «قازاقستان تەمىر جولى» ۇلتتىق كومپانياسىنىڭ قوستاناي پايدالانۋ ۆاگون دەپوسىندا ەڭبەك ەتەدى. دوسۇلان ەرلان ۇلى – اقمولا وبلىسى اكىمىنىڭ ورىنباسارى. ساپارجان ەرلان ۇلى – جانگەلدين اۋدانى تورعاي اۋىلى اكىمىنىڭ ورىنباسارى. ال ناريمان ەرلان ۇلى – مادەنيەت جانە اقپارات مينيسترلىگىنە قاراستى ازاماتتىق باستامالاردى قولداۋ ورتالىعىنىڭ جوبالاردى باسقارۋ دەپارتامەنتىنىڭ ديرەكتورى.
بۇل اتا-انانىڭ بەرگەن تاربيەسى مەن ۇلگى-ونەگەسىنىڭ ناتيجەسى ەكەنىنە داۋ جوق. سەبەبى ۇلاعاتتى ۇستازدىڭ ءتالىمى الدىمەن ءوز وتباسىنان باستالادى. ءاسيا اپاي مەن ەرلان اعاي تاربيەلەگەن ۇرپاق ەلگە قىزمەت ەتۋدى ومىرلىك مۇراتقا اينالدىرعان.
ۇستاز ەسىمى ۇمىتىلمايدى
سانالى عۇمىرىن ءبىلىم بەرۋ سالاسىنا ارناپ, شاكىرت جۇرەگىنە ءبىلىم مەن مەيىرىم ءدانىن سەپكەن ءاسيا امىرحانقىزى يسماعۇلوۆا سىندى جانداردىڭ ەسىمى ەشقاشان ۇمىتىلمايدى. ونىڭ ونەگەلى جولى كەيىنگى بۋىنعا ۇلگى, ال ۇستازدىق عۇمىرى تورعاي ءوڭىرىنىڭ ءبىلىم تاريحىنداعى تاعىلىمدى بەلەستەردىڭ ءبىرى بولىپ قالا بەرمەك.
گ ۇلىم ىسماعۇل,
AMANAT پارتياسى
جانگەلدين اۋداندىق فيليالىنىڭ
اتقارۋشى حاتشىسى,
جۋرناليست,
قوستاناي وبلىسى
جانگەلدين اۋدانى
تورعاي اۋىلى
