الماتى اكىمى دارحان ساتىبالدى حالىقارالىق ءبىلىم بەرۋ كورپوراتسياسىنىڭ (حببك) جاڭا ستۋدەنتتىك جاتاقحاناسىن ارالادى. نىسان كورپوراتسيانىڭ ءبىلىم بەرۋ ينفراقۇرىلىمىن دامىتۋعا باعىتتالعان اۋقىمدى باعدارلاماسىنىڭ ءبىر بولىگى. جاڭا عيماراتتىڭ باستى ەرەكشەلىگى – جاتاقحانا كومفورت-كلاسس دەڭگەيىندە سالىنعان. ءار بولمە جەكە اسۇيمەن, سانيتارلىق توراپپەن جانە جۇمىس ايماعىمەن جابدىقتالعان, بۇل ستۋدەنتتەردىڭ تۇرمىسىن بارىنشا ىڭعايلى ەتىپ, اپارتامەنت ۇلگىسىنە جاقىنداتادى. عيماراتتا بىرلەسىپ وقۋ مەن جوبالىق جۇمىسقا ارنالعان كوۆوركينگ ايماقتارى قاراستىرىلعان.
جاتاقحانا «اقىلدى كامپۋس» جۇيەسىنە بىرىكتىرىلگەن, ول قاۋىپسىزدىك پەن قولجەتىمدىلىكتى ورتالىقتان باسقارۋعا مۇمكىندىك بەرەدى. جالپى اۋماعى – 3 822,4 شارشى مەتر, ينۆەستيتسيا كولەمى 15 ملرد تەڭگەدەن استى.
«ماڭىزدىسى – تۇلەكتەردىڭ ەڭبەك نارىعىندا باسەكەگە قابىلەتتى بولۋى. قازىر ءبىز ءجيى شەتەلدىك ماماندارعا جۇگىنەمىز. قازاقستاندىق ماماندار جوقتىڭ قاسى. سوندىقتان ءوزىمىزدىڭ كادرلاردى ءوسىرىپ, ولار قالا يگىلىگى ءۇشىن جوبالاردى جۇزەگە اسىرۋى قاجەت», – دەدى دارحان ساتىبالدى.
ستۋدەنتتەردىڭ تاجىريبەلىك دايارلىعى ءۇشىن حببك بازاسىندا زاماناۋي زەرتتەۋ الاڭدارى جۇمىس ىستەيدى. ولاردىڭ قاتارىندا Samsung جانە JBL كومپانيالارىمەن بىرلەسكەن جوبالار بار. بۇل بولاشاق ارحيتەكتورلارعا, ينجەنەر مەن ديزاينەرلەرگە الەمدىك دەڭگەيدەگى قۇرال-جابدىقتا كۋرستىق جانە ديپلومدىق جۇمىستار ورىنداۋعا مۇمكىندىك بەرەدى. ۋنيۆەرسيتەت كامپۋسىندا FabLab (Fabrication Laboratory), قالالىق زەرتتەۋ زەرتحاناسى, سەيسميكالىق اسەردى زەرتتەۋگە ارنالعان بىرەگەي سەيسموپلاتفورما, درون زەرتحاناسى, قۇرىلىس گەوتەحنيكاسى زەرتحاناسى, سونداي-اق و.يۋ. پياك اتىنداعى جەلدەتۋ جانە كونديتسيونەرلەۋ بويىنشا مامانداندىرىلعان زەرتحانا جۇمىس ىستەيدى. ايتا كەتەيىك, 2007 جىلى قۇرىلعان حالىقارالىق ءبىلىم بەرۋ كورپوراتسياسىنىڭ (حببك) قۇرامىنا قازاق باس ساۋلەت-قۇرىلىس اكادەمياسى (قازبسقا) جانە قازاق-امەريكا ۋنيۆەرسيتەتى (قاۋ) كىرەدى. بۇگىندە كورپوراتسيادا 16 مىڭنان استام ستۋدەنت وقىپ جاتىر. حببك حالىقارالىق باعدارلامالاردى دامىتىپ, الەمنىڭ جەتەكشى ۋنيۆەرسيتەتتەرىمەن تىعىز ارىپتەستىك ورناتىپ كەلەدى. الماتى اكىمدىگى ستۋدەنتتەر مەن جاستاردىڭ الەۋمەتتىك جاعدايىن جاقسارتۋعا ەرەكشە كوڭىل ءبولىپ, ءبىلىم الۋعا جانە ءومىر سۇرۋگە قولايلى زاماناۋي كەڭىستىكتەردى قالىپتاستىرۋدا.
الماتى
