سۋرەتتەردى تۇسىرگەندەر – ا.دۇيسەنباەۆ, ە.ۇكىباەۆ
ۋران ءوندىرۋ سالاسىنداعى ىنتىماقتاستىق
پرەزيدەنت قاسىم-جومارت توقاەۆتىڭ اقش-تىڭ نيۋ-يورك قالاسىنداعى جۇمىس ساپارى «Cameco» كورپوراتسياسىنىڭ پرەزيدەنتى تيم گيتتسەلمەن كەزدەسۋدەن باستالدى. كانادالىق ترانسۇلتتىق كومپانيانىڭ باسشىسىمەن جۇزدەسۋدە ۋران ءوندىرۋ سالاسىنداعى ىنتىماقتاستىق كەلەشەگى تالقىلاندى.
قاسىم-جومارت توقاەۆ «Cameco» «قازاتومونەركاسىپ» ۇلتتىق كومپانياسىنىڭ بۇرىننان كەلە جاتقان سەنىمدى سەرىكتەسى ەكەنىن اتاپ ءوتتى. ەلىمىزدە قىزمەت ەتە باستاعاننان بەرى اتالعان كومپانيا 500 ملن دوللاردان اسا ينۆەستيتسيا قۇيعان ءارى تەحنولوگيالار ترانسفەرتىنە ىقپال ەتكەن.
مەملەكەت باسشىسىنىڭ ايتۋىنشا, قازاقستان ەنەرگەتيكانى دامىتۋدىڭ جاڭا كەزەڭىنە ءوتىپ, الداعى ۋاقىتتا ءۇش اتوم ەلەكتر ستانساسىن سالۋدى كوزدەپ وتىر. ەلىمىز اتوم سالاسىندا قولدانىلاتىن يننوۆاتسيالىق تاسىلدەرگە قىزىعۋشىلىق تانىتادى.
تيم گيتتسەل پرەزيدەنتكە «ينكاي» بىرلەسكەن كاسىپورنىنىڭ قازىرگى قىزمەتى مەن جوسپارلارى جونىندە اقپارات بەردى. بۇل كومپانيا تۇركىستان وبلىسىندا ورنالاسقان كەن ورنىن شيرەك عاسىردان بەرى يگەرىپ كەلەدى.
قارجى ەكوجۇيەسىن تسيفرلاندىرۋماڭىزدى
مەملەكەت باسشىسى قاسىم-جومارت توقاەۆ «Goldman Sachs Global Institute» كومپانياسىنىڭ جاھاندىق ماسەلەلەر بويىنشا پرەزيدەنتى دجارەد كوەنمەن كەزدەسۋ وتكىزدى.
قاسىم-جومارت توقاەۆ امەريكالىق «Goldman Sachs» جەتەكشى ينۆەستيتسيالىق بانكىنىڭ قازاقستان ۇلتتىق بانكىمەن ۇزاقمەرزىمدى سەرىكتەستىك ورناتقانىن اتاپ ءوتىپ, ىقپالداستىق دەڭگەيىنە جوعارى باعا بەردى.
مەملەكەت باسشىسىنىڭ ايتۋىنشا, تولىق تسيفرلىق مەملەكەتكە اينالۋدى كوزدەيتىن قازاقستان جاساندى ينتەللەكت, قارجى ەكوجۇيەسىن تسيفرلاندىرۋ سالالارىنداعى ىنتىماقتاستىققا قىزىعۋشىلىق تانىتادى.
ال دجارەد كوەن «Goldman Sachs Digital Asset Platform» تسيفرلىق قارجى تۇعىرناماسىنىڭ تاجىريبەسىنە توقتالدى.
ءبىلىم جۇيەسىندەگى تاجىريبەگە ءمان بەرىلدى
پرەزيدەنت قاسىم-جومارت توقاەۆ «Educational Testing Service» (ETS) كومپانياسىنىڭ پرەزيدەنتى جانە باس اتقارۋشى ديرەكتورى اميت سەۆاكتى قابىلدادى.
اڭگىمەلەسۋ بارىسىندا مەملەكەت باسشىسى «ETS» كومپانياسىنىڭ ءبىلىمدى تەستىلەۋ مەن باعالاۋ سالاسىندا كوش باستاپ كەلە جاتقانىنا ەرەكشە نازار اۋداردى.
پرەزيدەنتتىڭ ايتۋىنشا, قازاقستان كومپانيانىڭ ءبىلىم بەرۋ جۇيەسىندەگى تاجىريبەسىن زەردەلەۋ مەن پايدالانۋعا قىزىعۋشىلىق تانىتادى.
اميت سەۆاك مەملەكەت باسشىسىنا كومپانيانىڭ حالىقارالىق جۇمىس جوسپارى تۋرالى مالىمەت بەردى.
ۇيىم جىلىنا الەمنىڭ 180 ەلىنە 50 ميلليوننان اسا تەست ازىرلەيدى ءارى اكىمشىلەندىرەدى, سونداي-اق ۇلتتىق ءبىلىم بەرۋ جۇيەسىنە ارنالعان بەيىندىك شەشىمدەردى ۇسىنادى.
قازاق مادەنيەتىن بەلسەندى دارىپتەپ كەلەدى
پرەزيدەنت قاسىم-جومارت توقاەۆ سميتسون ينستيتۋتىنىڭ باسشىلىعىمەن كەزدەستى.
قاسىم-جومارت توقاەۆ سميتسون ورتالىعىنىڭ حالىق شىعارماشىلىعى جانە مادەني مۇرا ارنايى جوبالارى جونىندەگى ديرەكتورى حاللە باتۆينگە قازاق مادەنيەتىن اقش-تا بەلسەندى تۇردە دارىپتەپ جۇرگەنى ءۇشىن العىس ايتتى.
ورتالىق جانىنان قۇرىلعان قازاقستاننىڭ مادەني مۇرا قورى ۇلتتىق مادەنيەتىمىز بەن ونەرىمىزدى ناسيحاتتاۋمەن, سونداي-اق قازاق حالقىنىڭ تاريحىن, سالت-ءداستۇرى جانە رۋحاني ءومىرىن زەرتتەۋگە ارنالعان بىرلەسكەن عىلىمي جوبالاردى ۇيىمداستىرۋمەن اينالىسادى.
مەملەكەت باسشىسى مادەني ديپلوماتيا قازاقستان مەن امەريكا قۇراما شتاتتارى اراسىنداعى قارىم-قاتىناستى جاڭا دەڭگەيگە كوتەرەتىنىنە سەنىم ءبىلدىردى.
سميتسون ينستيتۋتى – الەمنىڭ ەڭ ءىرى مادەني, ءبىلىم بەرۋ جانە عىلىمي-زەرتتەۋ كەشەندەرىنىڭ ءبىرى. ونىڭ قۇرامىنا 21 مۋزەي مەن گالەرەيا, 14 عىلىمي جانە ءبىلىم بەرۋ ورتالىعى, كىتاپحانالار مەن ۇلتتىق زووباقتار كىرەدى.
سنەكتەر شىعاراتىن زاۋىت جايى تالقىلاندى
مەملەكەت باسشىسى قاسىم-جومارت توقاەۆ «PepsiCo» قورى ديرەكتورلار كەڭەسىنىڭ توراعاسى ستيۆەن كيحونى قابىلدادى.
كەزدەسۋدە «PepsiCo» كومپانياسىنىڭ قازاقستانداعى ينۆەستيتسيالىق جوباسىن جۇزەگە اسىرۋ بارىسى قاراستىرىلدى. الەمگە ايگىلى برەند الماتى وبلىسىندا سنەكتەر شىعاراتىن زاۋىت قۇرىلىسىنا كىرىستى. ينۆەستيتسيا كولەمى – 368 ملن دوللار.
پرەزيدەنت جوبانى ىسكە اسىرۋدان كۇتىلەتىن ەكونوميكالىق پايداعا نازار اۋداردى. كومپانيا 900-گە تارتا تۇراقتى جۇمىس ورنىن اشۋدان بولەك, قىتىرلاققا ارنالعان كارتوپتى جەرگىلىكتى جەردە وسىرۋگە نيەتتى.
ستيۆەن كيحونىڭ ايتۋىنشا, بۇگىنگى تاڭدا باعدارلاماعا پاۆلودار, اقمولا, قاراعاندى, الماتى جانە جەتىسۋ وبلىستارىنان 15-كە جۋىق شارۋاشىلىق قوسىلعان. بۇدان بولەك, شيكىزاتتى ساقتاۋ بازاسىن كەڭەيتىپ, كارتوپ ونىمدىلىگى مەن ساپاسىن ارتتىرۋ ءۇشىن عىلىمي تاسىلگە جۇگىنۋ جوسپارلانىپ وتىر.
قاسىم-جومارت توقاەۆ «PepsiCo» كومپانياسىنىڭ ورنىقتى اگروشارۋاشىلىقتى دامىتۋ باستاماسىنا قولداۋ ءبىلدىرىپ, ۇكىمەت پەن جەرگىلىكتى اكىمدىك ءوندىرىستىڭ ۋاقتىلى ىسكە قوسىلۋىنا بارىنشا جاعداي جاسايتىنىن ايتتى.
سپۋتنيكتىك بايلانىستى جولعا قويادى
پرەزيدەنت قاسىم-جومارت توقاەۆ «Amazon» كومپانياسىنىڭ اعا ۆيتسە-پرەزيدەنتى دەۆيد زاپولسكيدى قابىلدادى.
قاسىم-جومارت توقاەۆ پەن «Amazon» كومپانياسىنىڭ اعا ۆيتسە-پرەزيدەنتى, جاھاندىق جانە قۇقىقتىق ماسەلەلەر جونىندەگى باس ديرەكتورى دەۆيد زاپولسكي تسيفرلاندىرۋ, بايلانىس جانە جاساندى ينتەللەكت سالالارىنداعى ىنتىماقتاستىقتىڭ جاي-جاپسارىن تالقىلادى.
پرەزيدەنت «Amazon» كومپانياسىنىڭ ەلىمىزدىڭ جاساندى ينتەللەكت جانە تسيفرلىق دامۋ مينيسترلىگىمەن, سونداي-اق «قازاقتەلەكوم» كومپانياسىمەن بىرلەسكەن جوبالاردى جۇزەگە اسىرۋ جوسپارىنا قولداۋ ءبىلدىردى. ىنتىماقتاستىق قازاقستان اۋماعىنداعى جىلدامدىعى جوعارى ينتەرنەتتى قامتاماسىز ەتۋ جانە كيبەرقاۋىپسىزدىكتى نىعايتۋ سەكىلدى ستراتەگيالىق ماڭىزدى باعىتتاردى قامتيدى.
«Amazon» تەك ەلىمىزگە قاتىستى جوبالاردى جۇزەگە اسىرۋمەن شەكتەلمەي, قازاقستاندى سپۋتنيكتىك بايلانىستىڭ وڭىرلىك حابىن قالىپتاستىرۋعا بولاتىن الاڭ رەتىندە قاراستىرىپ وتىر.
قازاقستان پرەزيدەنتىنىڭ نيۋ-يورككە جۇمىس ساپارى اياسىندا «قازاقتەلەكوم» جانە «Amazon Kuiper» كومپانيالارى «Kuiper» سپۋتنيك جەلىسىنىڭ قىزمەت كورسەتۋىنە قاتىستى ديستريبيۋتورلىق كەلىسىمگە قول قويدى. سوعان ساي «Amazon Kuiper» كومپانياسى الماتى, اقكول جانە اقتاۋ قالالارىندا ءوزىنىڭ جەردەگى ينفراقۇرىلىمىن جاساقتاۋدى كوزدەيدى. بۇل جوباعا 200 ملن دوللارعا جۋىق ينۆەستيتسيا سالۋ جوسپارلانعان. اتالعان باستاما مەملەكەت باسشىسىنىڭ تسيفرلىق ينفراقۇرىلىمدى دامىتۋ جانە ەلىمىزدىڭ بارلىق ءوڭىرى ءۇشىن زاماناۋي تەلەكوممۋنيكاتسيا قىزمەتىنە تەڭدەي قول جەتكىزۋ تاپسىرماسىن ورىنداۋ اياسىندا ىسكە اسىرىلادى.
ينفراقۇرىلىم جوبالارىن قارجىلاندىرۋعا نيەتتى
مەملەكەت باسشىسى قاسىم-جومارت توقاەۆ «Cerberus Capital Management» كومپانياسىنىڭ باس اتقارۋشى ديرەكتورى فرەنك برۋنونى قابىلدادى.
قاسىم-جومارت توقاەۆ «Cerberus Capital Management» كومپانياسىنىڭ ينۆەستيتسيالاردى باسقارۋ سالاسىنداعى جاھاندىق كوشباسشىلىعىن جوعارى باعالاپ, ترانسكاسپي حالىقارالىق كولىك باعىتىن دامىتۋ اياسىنداعى ينفراقۇرىلىمدىق جوبالاردى قارجىلاندىرۋ نيەتىن قۇپتادى.
پرەزيدەنتتىڭ ايتۋىنشا, كومپانيانىڭ ستراتەگياسى قازاقستاننىڭ ۇلتتىق ەكونوميكانى ءارتاراپتاندىرۋ جونىندەگى باسىمدىقتارىنا ساي كەلەدى. ەلىمىز كولىك-لوگيستيكا ينفراقۇرىلىمىن دامىتۋعا ينۆەستيتسيا تارتا وتىرىپ, باعىتتاردىڭ وتكىزۋ مۇمكىندىگىن كەڭەيتۋگە قارقىندى تۇردە كىرىستى.
سونداي-اق مەملەكەت باسشىسى ۆاشينگتوندا ازەربايجان مەن ارمەنيا اراسىنداعى تاريحي كەلىسىمگە قول قويىلۋى ورتا ءدالىزدىڭ ماڭىزدى ساۋدا جولدارىنىڭ ءبىرى رەتىندەگى ماڭىزىنىڭ ارتا تۇسۋىنە وڭ اسەر ەتەتىنىن اتاپ ءوتتى. كەيىنگى بەس جىلدا ترانسكاسپي حالىقارالىق كولىك ءدالىزى ارقىلى تاسىمالدانعان جۇك كولەمى التى ەسە ارتتى.
بۇدان بولەك, مەملەكەت باسشىسى كومپانيانىڭ تەحنولوگيالىق پلاتفورما مەن تسيفرلىق ەكوجۇيەنى تاراتۋ سالاسىنداعى اۋقىمدى تاجىريبەسىن اتاپ ءوتىپ, قازاقستانداعى تسيفرلىق باستامالارعا قاتىسۋدى ۇسىندى.
ەل ەكونوميكاسىنا زور ۇلەس قوسقان كورپوراتسيا
قازاقستان پرەزيدەنتىنىڭ امەريكا قۇراما شتاتتارىنىڭ ىسكەر توپتارى وكىلدەرىمەن كەزدەسۋى «Chevron» كورپوراتسياسى ديرەكتورلار كەڭەسىنىڭ توراعاسى جانە باس اتقارۋشى ديرەكتورى مايكل ءۋيرتتى قابىلداۋمەن جالعاستى.
مەملەكەت باسشىسى كورپوراتسيا ەلىمىزدىڭ ەكونوميكالىق دامۋىنا زور ۇلەس قوسقانىن ايتتى. تاۋەلسىزدىك جىلدارى Chevron تەڭىز, قاراشىعاناق سياقتى ءىرى كەن ورىندارىن يگەرۋگە اتسالىسىپ, قازاقستانعا 55 ملرد دوللارعا جۋىق ينۆەستيتسيا قۇيدى. قازىر الەمدەگى ەڭ ءىرى ەنەرگەتيكالىق كومپانيا وندىرەتىن جالپى ءونىمىنىڭ 25 پايىزى قازاقستانعا تيەسىلى.
كەزدەسۋدە كەلەشەكتە تەڭىز كەنىشىنىڭ اياسىن كەڭەيتۋ جوباسىن ىسكە اسىرۋ ماسەلەلەرىنە, قاراشىعاناقتا گاز ءوندىرۋ مەن قايتا وڭدەۋ پەرسپەكتيۆاسىنا, سونداي-اق الەمدىك نارىققا كومىرسۋتەگىن تاسىمالداۋ ءىسىن دامىتۋعا, سونىڭ ىشىندە ورتا ءدالىز ارقىلى جەتكىزۋگە باسا ءمان بەرىلدى.
تەحنولوگيا الىبىمەن ءتيىمدى ارىپتەستىك
مەملەكەت باسشىسى قاسىم-جومارت توقاەۆ «Meta» كومپانياسىنىڭ ۆيتسە-پرەزيدەنتى يانن لەكۋندى قابىلدادى.
قاسىم-جومارت توقاەۆ پەن «Meta» كومپانياسىنىڭ ۆيتسە-پرەزيدەنتى, جاساندى ينتەللەكتىنى زەرتتەۋ ءبولىمىنىڭ (FAIR) باس عىلىمي جەتەكشىسى يانن لەكۋن يننوۆاتسيالىق تەحنولوگيالاردى دامىتۋ جانە قولدانۋ جونىندە پىكىر الماستى.
مەملەكەت باسشىسى نەيروجەلىلەر سالاسىنداعى يانن لەكۋننىڭ جاڭاشىل جەتىستىكتەرىن جوعارى باعالاپ, ونىڭ جاساندى ينتەللەكتىنى دامىتۋعا قوسقان ۇلەسىن اتاپ ءوتتى.
پرەزيدەنت قازاقستاننىڭ جاپپاي تسيفرلاندىرۋدى جانە جاساندى ينتەللەكتىنى دامۋدىڭ باستى فاكتورى رەتىندە كەڭىنەن قولدانۋدى قاراستىرىپ, دەربەس جي ەكوجۇيەسى مەن قازاق ءتىلىنىڭ ۇلكەن تىلدىك مودەلىن (KazLLM) جاساقتاۋعا كۇش سالىپ جاتقانىن جەتكىزدى.
قاسىم-جومارت توقاەۆ «Meta Platforms Inc» كومپانياسىمەن قازاقستاندا جي تەحنولوگيالارىن دامىتۋ بويىنشا بىرلەسكەن اكسەلەراتسيالىق باعدارلامانى ىسكە قوسۋ جونىندەگى كەلىسىمگە قول قويىلۋىن قۇپتاپ, تەحنولوگيا الىبىمەن ءوزارا ءتيىمدى سەرىكتەستىكتى ودان ءارى نىعايتۋعا دايىن ەكەنىن راستادى.
بايىپتى ديالوگ جالعاسادى
مەملەكەت باسشىسى قاسىم-جومارت توقاەۆ اقش پرەزيدەنتىنىڭ وڭتۇستىك جانە ورتالىق ازياداعى ارناۋلى وكىلى سەردجيو گوردى قابىلدادى.
قاسىم-جومارت توقاەۆ سەردجيو گوردى اقش پرەزيدەنتىنىڭ وڭتۇستىك جانە ورتالىق ازيا ىستەرى بويىنشا ارناۋلى وكىلى جانە اقش-تىڭ ۇندىستانداعى ەلشىسى لاۋازىمىنا تاعايىندالۋىمەن قۇتتىقتادى. وسى رەتتە قازاقستان ۇكىمەتى ونىڭ ميسسياسىنا جان-جاقتى قولداۋ كورسەتەتىنىن ايتتى.
مەملەكەت باسشىسى قازاق-امەريكا ستراتەگيالىق سەرىكتەستىگىن ناقتى جەتىستىكتەرمەن ودان ءارى نىعايتۋعا باعىتتالعان ديالوگتى جالعاستىرۋعا دايىن ەكەنىن جەتكىزدى.
اڭگىمەلەسۋ بارىسىندا ساۋدا-ەكونوميكالىق ىقپالداستىقتى دامىتۋعا ءمان بەرىلدى. مەملەكەت باسشىسى ەلىمىز اقش-تىڭ ورتالىق ازياداعى نەگىزگى ەكونوميكالىق سەرىكتەسى سانالاتىنىن اتاپ ءوتتى.
قاسىم-جومارت توقاەۆ پەن سەردجيو گور كۇن تارتىبىندەگى حالىقارالىق جانە وڭىرلىك وزەكتى ماسەلەلەر جونىندە پىكىر الماستى.
«Wabtec» كومپانياسىمەن بىرقاتار كەلىسىمگە قول قويىلدى
مەملەكەت باسشىسىنىڭ نيۋ-يورك قالاسىنا رەسمي ساپارى اياسىندا اقش ساۋدا ءمينيسترى گوۆارد لاتنيكتىڭ قاتىسۋىمەن امەريكالىق «Wabtec» كومپانياسىمەن جالپى سوماسى 4,2 ملرد دوللارعا جۋىق كەلىسىمگە قول قويۋ ءراسىمى ءوتتى.
اتالعان قۇجاتتا قازاقستاندا تەحنيكالىق تۇرعىدان جەتىلدىرىلگەن 300 لوكوموتيۆ شىعارۋ جانە وعان سەرۆيستىك قىزمەت كورسەتۋ قاراستىرىلعان.
كولىك تەحنولوگياسى بويىنشا الەمدەگى كوشباسشى كومپانيا ەلىمىزدىڭ تەمىرجول سالاسىن جاڭعىرتۋ ىسىندە نەگىزگى سەرىكتەستەرىمىزدىڭ ءبىرى سانالادى. 2009 جىلدان بەرى استانادا «Wabtec Kazakhstan» لوكوموتيۆ قۇراستىرۋ زاۋىتى تابىستى جۇمىس ىستەپ كەلەدى. وسى ارالىقتا كومپانيا وندىرىسكە 230 ملن دوللاردان اسا ينۆەستيتسيا قۇيدى. كاسىپورىن بۇگىنگە دەيىن «قازاقستان تەمىر جولىنا» جانە ەكسپورتقا ارنالعان 600-دەن اسا لوكوموتيۆ قۇراستىردى. ءوندىرىستىڭ لوكاليزاتسيا دەڭگەيى 45 پايىزعا جەتتى.
بىلتىر شىلدە ايىندا «Wabtec» كومپانياسى ەلىمىزدە يننوۆاتسيالاردى ەنگىزىپ, كادر دايارلاۋعا ۇلەس قوساتىن تەحنولوگيالىق جانە ينجەنەرلىك ورتالىعىن اشتى.
امەريكالىق بيزنەس ءۇشىن ۇلكەن مۇمكىندىك
مەملەكەت باسشىسى قاسىم-جومارت توقاەۆ اقش ساۋدا ءمينيسترى گوۆارد لاتنيكپەن كەزدەستى.
مەملەكەت باسشىسى مەن اقش ساۋدا ءمينيسترى ەكىجاقتى ساۋدا-ەكونوميكالىق ىنتىماقتاستىقتىڭ كەڭ كولەمدى ماسەلەلەرىن قاراستىردى.
قاسىم-جومارت توقاەۆ ەلىمىز امەريكا قۇراما شتاتتارىمەن ىقپالداستىقتى دامىتۋعا ەرەكشە ءمان بەرەتىنىن اتاپ ءوتتى. اقش ەلىمىزدىڭ نەگىزگى ينۆەستيتسيالىق سەرىكتەستەرىنىڭ ءبىرى سانالادى.
پرەزيدەنت قازاقستاندا شەتەلدىك ينۆەستورلارعا قولايلى جاعداي جاسالعانىن ايتتى. مەملەكەت باسشىسى ەلىمىزدە امەريكالىق بيزنەس ءۇشىن ەنەرگەتيكا, كولىك-لوگيستيكا, تسيفرلاندىرۋ, اۋىل شارۋاشىلىعى سالالارىندا ۇلكەن مۇمكىندىك بار ەكەنىن جەتكىزدى.
گوۆارد لاتنيك قۇراما شتاتتاردىڭ قازاقستانمەن ساۋدا-ەكونوميكالىق, يندۋستريالدىق, كولىك-لوگيستيكالىق جانە ينۆەستيتسيالىق سالالاردا بىرلەسكەن جوبالاردى ودان ءارى دامىتۋعا قىزىعۋشىلىق تانىتاتىنىنا توقتالدى.
داتا ورتالىق قۇرىلىسى قولعا الىنادى
پرەزيدەنت قاسىم-جومارت توقاەۆ «Blackstone» كومپانياسىنىڭ نەگىزىن قالاۋشىلاردىڭ ءبىرى جانە باسقارما توراعاسى ستيۆەن شۆارتسمانمەن كەزدەستى.
قاسىم-جومارت توقاەۆ پەن ستيۆەن شۆارتسمان ءوزارا ءتيىمدى ينۆەستيتسيالىق ىنتىماقتاستىقتىڭ باسىم باعىتتارىن تالقىلادى.
قازاقستان پرەزيدەنتىنىڭ ايتۋىنشا, «Blackstone» كومپانياسىنىڭ ينفراقۇرىلىم مەن تەحنولوگيانى دامىتۋعا ارنالعان اۋقىمدى ينۆەستيتسيالاۋ ستراتەگياسى ەلىمىزدىڭ ەكونوميكانى ءارتاراپتاندىرۋ, يننوۆاتسيا مەن ورنىقتى دامۋ سالالارىنداعى ۇلتتىق باسىمدىقتارىمەن تىعىز بايلانىستى.
مەملەكەت باسشىسى قازاقستاندى تولىق تسيفرلىق ەلگە اينالدىرۋ جونىندە ستراتەگيالىق مىندەت قويعانىنا ەگجەي-تەگجەي توقتالدى.
«Blackstone» كومپانياسىنىڭ باسشىسىمەن اڭگىمەلەسۋ بارىسىندا قازاقستاندا داتا ورتالىق قۇرىلىسى جوباسىن بىرلەسىپ ىسكە اسىرۋ ۇسىنىلدى. سونداي-اق ەلىمىزدەگى قارجى تەحنولوگيالارى مەن جىلدام وركەندەپ كەلە جاتقان كومپانيالار ارقىلى اكتيۆتەردى باسقارۋ سالاسىنداعى ىنتىماقتاستىق الەۋەتىن قاراستىرۋعا نازار اۋدارىلدى.
«Blackstone» – نارىقتىق كاپيتالى 218 ملرد دوللاردان اساتىن الەمدەگى ءىرى ينۆەستيتسيالىق كومپانيا.
تاۋار اينالىمىن ۇلعايتۋ – نازاردا
مەملەكەت باسشىسى قاسىم-جومارت توقاەۆ اقش ساۋدا پالاتاسىنىڭ پرەزيدەنتى جانە باس اتقارۋشى ديرەكتورى سيۋزانن كلاركتى قابىلدادى.
اڭگىمەلەسۋ بارىسىندا ەكىجاقتى تاۋار اينالىمىن ۇلعايتۋ ماقساتىندا ۇزاقمەرزىمدى ىنتىماقتاستىقتى جولعا قويۋ ماسەلەلەرى تالقىلاندى.
قاسىم-جومارت توقاەۆ جۋىردا قازاقستاندا جۇرگىزىلگەن جوعارى دەڭگەيدەگى امەريكالىق ساۋدا-ينۆەستيتسيالىق ميسسياسىنىڭ قورىتىندىسىن قۇپتاپ, ەلىمىز قۇراما شتاتتاردىڭ ورتالىق ازياداعى نەگىزگى سەرىكتەسى سانالاتىنىن اتاپ ءوتتى. قازاقستان اقش ۇكىمەتىمەن جانە ىسكەرلىك ورتا وكىلدەرىمەن ءتيىمدى ىقپالداستىق ورناتۋعا بەيىل. وسى ورايدا قاسىم-جومارت توقاەۆ اقش پرەزيدەنتى دونالد ترامپپەن وتكەن اڭگىمەلەسۋدىڭ, سونداي-اق ساۋدا ءمينيسترى گوۆارد لاتنيكپەن, بىرقاتار امەريكالىق ءىرى كومپانيالار باسشىلارىمەن كەزدەسۋدىڭ مازمۇنىن جوعارى باعالادى.
اقش ساۋدا پالاتاسىنىڭ جەتەكشىسى ەكونوميكالىق بايلانىستاردى ودان ءارى كەڭەيتۋدىڭ ايتارلىقتاي الەۋەتى بار ەكەنىن راستادى.
قاسىم-جومارت توقاەۆ پەن سيۋزانن كلارك ەكونوميكانىڭ ءتۇرلى سەكتورىندا بىرلەسكەن جوبالاردى جۇزەگە اسىرۋ كەلەشەگى قاراستىردى.
كەن ورىندارىنىڭ كەلەشەگى زەردەلەندى
پرەزيدەنت قاسىم-جومارت توقاەۆ «ExxonMobil» كورپوراتسياسىنىڭ باسشىسى داررەن ۆۋدستى قابىلدادى.
مەملەكەت باسشىسى «ExxonMobil» كورپوراتسياسىنىڭ باسقارما توراعاسى جانە باس اتقارۋشى ديرەكتورى داررەن ۆۋدسقا ءىلتيپات ءبىلدىرىپ, قازاقستاننىڭ مۇناي-گاز سالاسىنداعى نەگىزگى سەرىكتەستەرىنىڭ بىرىنە اينالعان كوممەرتسيالىق ۇيىممەن ىنتىماقتاستىققا جوعارى باعا بەردى.
قاسىم-جومارت توقاەۆ پەن داررەن ۆۋدس كومپانيانىڭ تەڭىز جانە قاشاعان كەن ورىندارىنداعى كەلەشەگى جونىندە پىكىر الماستى.
جۇك تاسىمالداۋ سالاسىنداعى بايلانىس
مەملەكەت باسشىسى قاسىم-جومارت توقاەۆ «Embraer» كومپانياسىنىڭ پرەزيدەنتى فرانسيسكو گومەس نەتومەن كەزدەستى.
برازيليالىق «Embraer» اۆيا قۇرىلىس كومپانياسى جەتەكشىسىمەن كەزدەسۋدە جۇك تاسىمالداۋ سالاسىنداعى ىنتىماقتاستىق ماسەلەلەرى تالقىلاندى.
پرەزيدەنت ەلىمىزدىڭ ەۋرازيا كەڭىستىگىندەگى نەگىزگى كولىك-لوگيستيكالىق حابقا اينالۋعا ۇمتىلاتىنىن جەتكىزدى.
اڭگىمەلەسۋ بارىسىندا قازاقستاندا «Embraer» ۇشاقتارىنا تەحنيكالىق قىزمەت كورسەتەتىن وڭىرلىك سەرۆيستىك ورتالىق اشۋ پەرسپەكتيۆاسى قاراستىرىلدى.
فرانسيسكو گومەس نەتو قازاقستاننىڭ كولىك-ترانزيتتىك الەۋەتىنە جوعارى باعا بەرىپ, ءوزارا ءتيىمدى ىنتىماقتاستىقتى جالعاستىرۋعا دايىن ەكەنىن راستادى.
بانكتەر توبى قىزمەتىندەگى ەڭ ماڭىزدى باعىتتاردىڭ ءبىرى
پرەزيدەنت قاسىم-جومارت توقاەۆ «سitigroup» كومپانياسىنىڭ باس اتقارۋشى ديرەكتورى دجەين فرەيزەردى قابىلدادى.
كەزدەسۋدە ەلىمىزدەگى اۋقىمدى جوبالاردى قارجىلاندىرۋ ماسەلەلەرى تالقىلاندى.
دجەين فرەيزەر قازاقستانمەن اراداعى سەرىكتەستىكتى بانكتەر توبى قىزمەتىندەگى ەڭ ماڭىزدى باعىتتاردىڭ ءبىرى رەتىندە قاراستىراتىنىن جەتكىزدى.
