سۋرەتتى تۇسىرگەن – جەڭىس ىسقاباي
اقسۋ مەن كوكسۋ قانت زاۋىتتارى بيىل 78 مىڭ توننا قانت وندىرۋگە ءتيىس. ونىڭ 54 مىڭ تونناسى قىزىلشادان, 24 مىڭ تونناسى قامىس قۇراعىنان الىنادى.
«قىزىلشا وسىرۋگە دەن قويىپ, القاپتى ۇلعايتىپ جاتقانداردىڭ قاتارىندا ءبىز, اقسۋ اۋدانىنىڭ شارۋاشىلىقتارى دا بارمىز. بۇل داقىلدىڭ تۇقىمىنا بەرىلەتىن سۋبسيديا كولەمى ارتتى, زاۋىتتار دا ساتىپ الۋ باعاسىن كوتەردى. اقسۋداعى قانت زاۋىتىنىڭ ءونىم قابىلداۋ كولەمىن ۇلعايتۋى دا جاعدايدى وڭالتۋعا سەپتىگىن تيگىزدى. بيىلعى ماۋسىمدا ءار گەكتاردان 100 توننادان استام ءونىم جينايمىز دەپ جوسپارلاپ وتىرمىز. ءبىزدىڭ شارۋاشىلىقتا بۇرىن-سوڭدى مۇنداي تولىمدى ءونىم بولماعان ەدى» دەيدى«جانىس-ك» جشس شارۋا قوجالىعىنىڭ ديرەكتورى عالبيات سامارقان ۇلى.
بىلتىرعى ماۋسىمدىق كەزەڭدە اقسۋلىق كاسىپورىندا 500-دەن استام جۇمىسشى ەڭبەك ەتكەن. قانت قىزىلشاسىنىڭ نەگىزگى كولەمى اقسۋ, سارقان جانە الاكول اۋداندارىنان جەتكىزىلدى. قابىلداۋ جانە وڭدەۋ جۇمىستارى 6-7 ايعا سوزىلىپ, زاۋىت ۇزدىكسىز رەجىمدە جۇمىس ىستەدى.
«مەملەكەتتىك قولداۋدىڭ ارقاسىندا شارۋالارعا 1 توننا ونىمگە 40 مىڭ تەڭگە تولەندى. 25 مىڭ تەڭگەسى سۋبسيديا, قالعان 15 مىڭ تەڭگە زاۋىت ەسەبىنەن بەرىلدى. بۇل شارالار فەرمەرلەردىڭ قانت قىزىلشاسىن وسىرۋگە دەگەن ىنتاسىن ارتتىرىپ, ءونىم كولەمىن ۇلعايتۋعا ۇلكەن اسەر ەتتى» دەيدى وبلىستىق اۋىل شارۋاشىلىعى باسقارماسىنىڭ باسشىسى نۇرداۋلەت كەنەنباەۆ.
قازىر زاۋىتتىڭ اۆتوماتتاندىرىلۋى مەن وندىرىستىك جەلىلەرىن جاڭارتۋ جۇمىستارى قولعا الىنىپ جاتىر. بۇل جاڭعىرتۋ زاۋىتتىڭ جىل بويى ۇزدىكسىز جۇمىس ىستەۋىنە جاعداي جاسايدى. بيىل زاۋىت 350 مىڭ توننادان استام ءتاتتى ءتۇبىر قابىلداۋدى جوسپارلاپ وتىر. ءسويتىپ, وڭىردە قانت قىزىلشاسىن وڭدەۋ قۋاتى 800-900 مىڭ تونناعا دەيىن جەتكىزىلۋگە ءتيىس. وسىعان وراي قانت قىزىلشاسىنىڭ ەگىس القاپتارى ەداۋىر ۇلعايعان. اۋىل شارۋاشىلىعى تاۋار وندىرۋشىلەرى تۇقىم, تىڭايتقىش, جانار-جاعارماي, تەحنيكامەن تولىق قامتاماسىز ەتىلگەن. سونىمەن قاتار جانار-جاعارماي, تۇقىم مەن تىڭايتقىشقا جەڭىلدەتىلگەن قارجىلاندىرۋ جانە اكىمشىلىك جەڭىلدىكتەر قاراستىرىلعان.
اقسۋ قانت زاۋىتى قانتپەن قاتار قانت قىزىلشاسىنان الىناتىن جومدى (قالدىق قۇراما) وڭدەۋ ىسىنە دە كىرىستى. قازىردىڭ وزىندە جومدى ساقتاۋ جانە كەپتىرۋگە ارنالعان ارنايى قويما سالىندى, زاماناۋي قۇرىلعىلار ورناتىلىپ جاتىر. بۇل باعىت زاۋىتتىڭ ەكونوميكالىق تيىمدىلىگىن ارتتىرىپ قانا قويماي, مال شارۋاشىلىعى ءۇشىن دە ماڭىزدى ءونىم كوزىنە اينالماق. ال كوكسۋ قانت زاۋىتى جىلىنا 300 مىڭ توننا قانت قىزىلشاسىن وڭدەيدى. قازىر كاسىپورىن تولىق جۇكتەمەمەن جۇمىس ىستەپ جاتىر. قۋاتتىلىقتى ارتتىرۋ ءۇشىن 2025–2026 جىلدارى 29 ملرد تەڭگە ينۆەستيتسيا تارتىلادى. كەڭەيتۋ ناتيجەسىندە زاۋىتتىڭ جىلدىق قۋاتى 500 مىڭ تونناعا دەيىن جەتۋگە ءتيىس.
جەتىسۋ وبلىسى
