فوتو: pixabay
بۇل جەر تەگىن تاڭداپ الىنعان جوق. سەبەبى مۇندا قالانىڭ قوقىس پوليگونى ورنالاسقان. قولقانى قاپقان ك ۇلىمسى ءيىس, اينالا شاشىلعان تسەللوفان پاكەتتەر, ەسكى-قۇسقى تۇرمىستىق زاتتار, تاۋ بوپ ۇيىلگەن قوقىس قورقىنىشتى كورىنەدى. بەتپەردە تاعىپ, قولعاپ كيگەن بەلسەندى جاستار ىركىلمەي ىسكە كىرىسىپ كەتتى. قالاداعى مەملەكەتتىك مەكەمەلەردىڭ, كاسىپورىندار مەن قوعامدىق ۇيىمداردىڭ وكىلدەرى ەكوۆولونتەرلەرمەن تىزە قوسىپ, جيىنى 300-دەن اسا قاتىسۋشى قوقىس پوليگونىنان وسكەمەن – التاي تراسساسىنا دەيىنگى ارالىقتى ءسۇزىپ شىقتى. تىركەمە ىلگەن تراكتورلار بىرىنەن كەيىن ءبىرى كەلىپ, قاپقا سالىنعان قوقىستى تيەپ الىپ كەتىپ جاتتى.
– بۇل كۇنى بۇكىل الەمدە ميلليونداعان ادام سەنبىلىككە شىعىپ, تابيعاتتى قورعاۋعا اتسالىسادى. باستاماعا ۇلەس قوسىپ, ەرىكتىلەر, ستۋدەنتتەر, جۇمىسشى جاستار ورتاق ىسكە جۇمىلدىرىلدى. ايتا كەتەرلىگى, جاستاردىڭ دەنى ءوز ەركىمەن كەلىپ قاتىستى. بۇل, البەتتە, قوعامنىڭ ەكولوگيالىق مادەنيەتىنىڭ ارتىپ كەلە جاتقانىن كورسەتەدى, – دەدى وبلىستىق ەكولوگيا دەپارتامەنتىنىڭ ءباسپاسوز حاتشىسى ارۋجان مۇساحانوۆا.
گلۋبوكوە اۋدانىنىڭ «مالو-ۋبا» ورمان شارۋاشىلىعى اۋماعىندا وتكەن ەكواكتسيا اياسىندا تابيعات جاناشىرلارى 113 مىڭ ءتۇپ ءسىبىر شىرشاسى كوشەتىن ەكتى.
جالپى, وبلىستاعى تازالىق كۇنىنە شامامەن ءبىر مىڭنان استام ادام قاتىستى. ولاردىڭ ىشىندە مەملەكەتتىك ورگاندار مەن كاسىپورىنداردىڭ قىزمەتكەرلەرى, وقۋشىلار, ستۋدەنتتەر, ۇكىمەتتىك ەمەس ۇيىمداردىڭ وكىلدەرى, ەرىكتىلەر, بەلسەندى قالا تۇرعىندارى بار.
ەكولوگيا جانە تابيعي رەسۋرستار مينيسترلىگى شارا قورىتىندىسىن قازاقستان رەكوردتار كىتابىنا ەنگىزۋگە ءوتىنىم بەردى. دۇنيەجۇزىلىك تازالىق كۇنى جىل سايىن 190-نان استام ەلدى بىرىكتىرەدى, ەلىمىز دە بۇل باستامانى ءداستۇرلى تۇردە, بەلسەندى قولداپ كەلەدى.
شىعىس قازاقستان وبلىسى
