بۇل تۋرالى باس پروكۋرور بەرىك اسىلوۆ ح الەۋمەتتىك جەلىسىندەگى پاراقشاسىندا مالىمدەدى.
ايتۋىنشا, پروكۋراتۋرا ورگاندارى قىسقا مەرزىمدە اۋقىمدى جۇمىس اتقاردى – مۇنداي كولەمدەگى قاراجات وسىنداي قىسقا ۋاقىتتا بۇرىن-سوڭدى قايتارىلعان ەمەس.
«زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭدى ىسكە اسىرۋ اياسىندا وليگوپوليا سۋبەكتىلەرىنەن 1,3 ترلن تەڭگەدەن استام قاراجات ءوندىرىلدى, ونىڭ شامامەن 850 ملرد تەڭگەسى مەملەكەت كىرىسىنە ءتۇستى. قايتارىلعان قاراجات ەسەبىنەن جالپى سوماسى 375 ملرد تەڭگەگە 207 سۋ قۇبىرى نىسانىنىڭ, 177 مەديتسينالىق مەكەمەنىڭ, 14 ءبىلىم بەرۋ جانە سپورت نىسانىنىڭ قۇرىلىسى باستالدى. وليگوپوليا سۋبەكتىلەرىمەن كەلىسىمدەر جاسالىپ, ولار ەلگە 5,2 ترلن تەڭگە ينۆەستيتسيا سالۋ جونىندە مىندەتتەمەلەر قابىلدادى.
- اتاپ ايتقاندا, الماتى قالاسىندا جاڭا تۋريستىك كەشەن, باسقا وڭىرلەردە كولىك-لوگيستيكالىق ورتالىقتار مەن زاۋىتتار سالىنادى. مىسالى, 3 000-نان استام جۇمىس ورنى قۇرىلاتىن تاۋ-كەن بايىتۋ كومبيناتى سالىنادى. بۇل ءوندىرىس كولەمىن ۇلعايتىپ, رەسۋرستاردى وڭدەۋ دەڭگەيىن ارتتىرادى, ەلدىڭ ەكسپورتتىق الەۋەتىن نىعايتىپ, سالىق تۇسىمدەرىن كوبەيتەدى. بۇدان بولەك, سۋبەكتىلەرمەن 16 مەكتەپ پەن بالاباقشا, 8 دارىگەرلىك امبۋلاتوريا مەن اۋرۋحانا, 13 سپورت كەشەنى, 16 مادەني-دەمالىس نىسانى سالىنادى. جالپى قۇنى – 122 ملرد تەڭگە. بۇل 8 000-نان استام قوسىمشا جۇمىس ورنىن اشادى. بارلىق جوبالارعا قاتاڭ باقىلاۋ ورناتىلادى, - دەپ اتاپ ءوتتى باس پروكۋرور.
سونىمەن قاتار زاڭسىز اكتيۆتەردى قايتارۋ جونىندەگى كوميتەت ينۆەستورلاردىڭ قۇقىقتارىن قورعاۋ كوميتەتىنە اينالادى.
- نەگىزگى ماقسات – ەل ەكونوميكاسىنا, سونىڭ ىشىندە بۇرىن شەتەلگە زاڭسىز شىعارىلعاندى دا قوسا العاندا, قاراجاتتى قۇيۋعا ىنتالاندىراتىن جۇيە قۇرۋ. جالپى, بۇل باعىتتا ءبىز جۇيەلى جۇمىس جۇرگىزۋدەمىز – حالىقارالىق قۇقىقتىق بايلانىستار كەڭەيتىلىپ, تسيفرلىق قۇرالدار جەتىلدىرىلۋدە (جاقىندا مەن سينگاپۋرمەن قۇقىقتىق كەلىسىمدەرگە قول قويدىم, سونداي-اق الەمنىڭ ءىرى قارجى ورتالىقتارىمەن تاعى بىرنەشە جوبا پىسىقتالۋدا). ينۆەستيتسيالاردى قورعاۋ پروكۋراتۋرا جۇمىسىنىڭ نەگىزگى باعىتىنا اينالدى, - دەدى بەرىك اسىلوۆ.
بۇگىندە پروكۋرورلار جالپى سوماسى 87 ترلن تەڭگە بولاتىن 1,5 مىڭنان استام ينۆەستيتسيالىق جوبانى سۇيەمەلدەۋدە.
2023 جىلدان بەرى:
- 937 پروبلەمالىق كەيستەر شەشىلدى, 1 732 ينۆەستورعا (سونىڭ ىشىندە شەتەلدىك ينۆەستورلارعا) كومەك كورسەتىلدى;
- «پروكۋرورلىق سۇزگى» ەنگىزىلدى, ول پروكۋروردىڭ كەلىسىمىنسىز تەكسەرۋلەر مەن سانكتسيالاردىجۇرگىزۋگە جول بەرمەيدى;
- 370 زاڭسىز تەكسەرۋ, 438 اكىمشىلىك ءىس, 200 شەكتەۋ شاراسى توقتاتىلدى;
- بيزنەستى شەكتەيتىن 1 000-نان استام شەشىمدى كەلىسۋدەن باس تارتىلدى;
- 307 لاۋازىمدى تۇلعا جازالاندى.
بۇل شارالار ناتيجەسىن بەردى:
- مەملەكەتتىك ورگانداردىڭ ينۆەستورلارعا قارسى تالاپ-ارىزدارى 60%-عا ازايدى;
- اكىمشىلىك ىستەر 12%-عا قىسقاردى;
- بيزنەسكە قاتىستى قىلمىستىق ىستەر سانى 10 ەسە ازايدى (1 553-تەن 154-كە دەيىن).
ايقىن مىسال — الماتى قالاسىندا Haval, Chery, Changan ماركالى جەڭىل اۆتوموبيلدەر شىعاراتىن مۋلتيبرەندتى زاۋىت جوباسىن ىسكە اسىرۋ بارىسىندا ينۆەستور بىرقاتار قيىندىقتارعا تاپ بولدى.
2022 جىلدان بەرى اكىمدىك تاراپىنان گازعا قوسىلۋعا رۇقسات بەرىلمەدى, 2023 جىلى قۇرىلىسقا ارحيتەكتۋرالىق-جوسپارلاۋ تاپسىرماسى بەرىلمەدى, 2024 جىلى ەلەكتر جەلىلەرىنە قوسىلۋعا تەحنيكالىق شارتتار بەرىلمەدى.
وبەكتىنى پايدالانۋعا بەرۋ اكتىسى دە كەشىكتىرىلدى. پروكۋراتۋرا ارالاسۋىنىڭ ارقاسىندا بۇل ماسەلەلەردىڭ بارلىعى ينۆەستور پايداسىنا شەشىلدى. قازىرگى تاڭدا جوبا ىسكە قوسىلدى, جالپى ينۆەستيتسيا كولەمى – 182 ملرد تەڭگە, 3 مىڭنان استام جۇمىس ورنى قۇرىلدى.
سونداي-اق, ۆاگون پاركىن جاڭارتقان ءۇش كولىك كومپانيالارىنىڭ ءىسى بويىنشا وڭ شەشىم قابىلدانعانىن اتاپ وتكىم كەلەدى. باس پروكۋراتۋرا نارازىلىعىنان كەيىن 1,7 ملرد تەڭگە سۋبسيديانى قايتارۋ تۋرالى ۋاكىلەتتى ورگاننىڭ تالابى جوعارعى سوتپەن جويىلدى.
- ءبىزدىڭ ماقساتىمىز – ءار ينۆەستور ءۇشىن تۇسىنىكتى ءارى بولجامدى ينۆەستيتسيالىق كليمات قۇرۋ. ينۆەستورلاردىڭ قۇقىقتارىن قورعاۋ كوميتەتى جۇمىستى جاڭا دەڭگەيگە شىعارادى دەپ سەنەمىن – ول ەكونوميكانى ناقتى اقشالاي قارجىمەن, ونىڭ ىشىندە ينۆەستيتسيالارمەن تولتىرۋعا باعىتتالعان بارلىق پروتسەستەردى جەدەلدەتۋگە جانە بيزنەسكە سەنىمدى قولداۋ كورسەتۋگە كومەكتەسەدى, - دەيدى بەرىك اسىلوۆ.
