ءورتتى سوندىرۋگە وسى كۇنى 282 ادام مەن 121 ارنايى تەحنيكا تارتىلدى. ونىڭ ىشىندە الماتى وبلىسى مەن الماتى قالاسىنىڭ توتەنشە جاعدايلار دەپارتامەنتى, قۇتقارۋ قىزمەتى, اسكەري بولىمدەر, سونداي-اق باسقا دا وڭىرلەردەن كەلگەن ماماندار بار.
قازىر بارلىق قىزمەت كۇشەيتىلگەن رەجيمدە جۇمىس ىستەپ جاتىر. جاعداي تۇراقتى باقىلاۋدا. جاۋاپتى مامانداردىڭ ايتۋىنشا, ماڭايداعى اۋىل تۇرعىندارىنىڭ ومىرىنە ەش قاۋىپ جوق. دەسە دە, ءالي اۋىلىنىڭ تۇرعىندارى ءورت تۇتانعان العاشقى كۇننەن باستاپ-اق تۇتىنمەن كەلگەن جاعىمسىز ءيىس باس اۋىرتىپ, ۇيقىنىڭ بۇزىلۋىنا اسەر ەتكەنىن, ەندى ءبىرى ەسىك-تەرەزە اشا الماي قالعاندارىن اشىپ ايتتى.
«توتەنشە جاعداي رەجيمىن ەنگىزۋ – ءورت سوندىرۋشىلەر مەن قۇتقارۋشىلاردىڭ ارنايى تەحنيكانىڭ جۇمىسىن ءتيىمدى ۇيلەستىرۋىنە مۇمكىندىك بەردى. قابىلدانعان شارالار ءورت سالدارىن جەدەل جويۋعا باعىتتالدى», – دەيدى تجد وكىلدەرى.
ارنايى قىزمەت وكىلدەرى اۋا قۇرامىن ءاربىر 4 ساعات سايىن تەكسەرىپ وتىر. مامانداردىڭ ايتۋىنشا, ادام اعزاسىنا قاۋىپتى شەكتەن تىس زياندى زاتتار انىقتالماعان.
وقيعا ورنىندا پالاتالىق لاگەر مەن دالالىق اسحانا ورنالاسقان. دارىگەرلەر كەزەكشىلىك جاساپ, ءورت زەرتحاناسى مەن تجد تەرگەۋ ءبولىمىنىڭ ماماندارى جۇمىس ىستەۋدە.
الماتى وبلىسى.
