مەرەكەلىك ءىس-شاراعا فيفا-نىڭ جاھاندىق دامۋ جونىندەگى ديرەكتورى ستيۆەن مارتەنس, قفف باس حاتشىسى داۆيد لوريا, فيفا-نىڭ High Performance باعدارلاماسىنىڭ جەتەكشىسى ۋلف شوتت, الەم چەمپيونى ءارى فيفا اڭىزى كريستيان كارامبە, سونداي-اق وتاندىق فۋتبول ارداگەرلەرى مەن اكادەميا تاربيەلەنۋشىلەرى قاتىستى.
«1994 جىلى قازاقستان فۋتبول فەدەراتسياسى فيفا-نىڭ تولىققاندى مۇشەسى اتاندى. بۇگىن ءبىز بالالار مەن جاسوسپىرىمدەرگە سپورتتا جول اشاتىن اكادەميانى ىسكە قوسىپ وتىرمىز. بۇل جۇمىس قازاق فۋتبولىنىڭ بولاشاعىن ايقىندايدى. اكادەميا تۇلەكتەرى جۋىق ارادا ەل كلۋبتارى مەن ۇلتتىق قۇراما ساپىندا ويناپ, قازاقستاننىڭ اتىن الەمگە تانىتادى دەپ سەنەمىن», دەدى فۋتبول ارداگەرى قۇرالبەك ورداباەۆ قۇتتىقتاۋ سوزىندە.
فيفا پرەزيدەنتى دجانني ينفانتينو بەينەۇندەۋ جولداپ, جاڭا باستامانى جاستار ارمانىنا جاسالعان ماڭىزدى ينۆەستيتسيا ەكەنىن اتاپ ءوتتى. ونىڭ ايتۋىنشا, اكادەميا جاس ويىنشىلاردىڭ الەۋەتىن اشىپ قانا قويماي, ولاردى تارتىپكە, كوماندادا ويناۋعا جانە جاۋاپكەرشىلىككە تاربيەلەيدى.
فيفا ديرەكتورى ستيۆەن مارتەنس تە ءسوز سويلەپ, قفف اكادەمياسى ورتالىق ازياداعى العاشقى Talent Academy بولعانىن ەرەكشە اتاپ ءوتتى.
«بۇل – وتاندىق فۋتبول ءۇشىن ۇلكەن جەتىستىك. جوبا ۋاقىت وتە كەلە ءوز جەمىسىن بەرەدى», دەدى ول.
ال قفف باس حاتشىسى داۆيد لوريا اكادەمياعا مارتەبە بەرىلۋىن ەلىمىزدەگى بالالار مەن جاسوسپىرىمدەر فۋتبولىن جۇيەلى دامىتۋ جولىنداعى ماڭىزدى قادام دەپ باعالادى:
«بۇل – حالىقارالىق قاۋىمداستىقتىڭ سەنىمى ءارى ۇلكەن جاۋاپكەرشىلىك. فۋتبولدىڭ بولاشاعى جاستارمەن جۇمىسقا بايلانىستى. ءبىز وسى باعىتتا ەڭبەكتەنە بەرەمىز», دەدى ول.
سالتاناتتى راسىمنەن كەيىن فيفا وكىلدەرى قفف باسشىلىعىنا رەسمي مارتەبەنىڭ بەلگىسىن تابىستادى. شارا بارىسىندا اشىق جاتتىعۋ مەن جولداستىق ماتچ ۇيىمداستىرىلىپ, كەيىن جاس فۋتبولشىلارعا كريستيان كارامبە شەبەرلىك ساباعىن وتكىزىپ, اقىل-كەڭەسىن ايتتى. سوڭىندا بارلىق قاتىسۋشىلارعا ەستەلىك مەدالدار مەن سىيلىقتار تابىستالدى.
