بۇل جوبانىڭ باستى ەرەكشەلىگى – ءاربىر وقۋشىنىڭ ساپالى ءبىلىم الۋىنا جاعداي جاساپ, ينكليۋزيۆتى وقىتۋعا ايرىقشا كوڭىل بولۋىندە. بۇعان استانا قالاسىنداعى №116 جالپى ورتا ءبىلىم بەرەتىن جاڭا مەكتەپكە بارعانىمىزدا انىق كوز جەتكىزدىك.
2025–2026 وقۋ جىلى اياسىندا اشىلعان ەڭسەلى دە زاماناۋي عيماراتتا قازىر 2 877 وقۋشى ءبىلىم الىپ جاتىر. ءار سىنىپتا 24 وقۋشىدان اسپايدى. مەكتەپ ديرەكتورى ەلميرا ءىلياسوۆانىڭ ايتۋىنشا, بۇل ءبىلىم وشاعىندا ەرەكشە بالالارعا دا تەڭ جاعداي جاسالعان.
«1-8 سىنىپتار بويىنشا 50 وقۋشى ەرەكشە ءبىلىم الۋدى قاجەت ەتەدى. ولارعا پەداگوگ-اسسيستەنت, لوگوپەد, پسيحولوگ, الەۋمەتتىك پەداگوگ, دەفەكتولوگ ماماندار كومەكتەسەدى. مۇعالىمدەر ەلىمىزدىڭ ءار وڭىرىنەن كەلگەن. سونداي-اق ءۇش اۋىسىممەن وقيتىن كورشىلەس مەكتەپتەردەن ءبىراز وقۋشى بىزگە اۋىستى. بالالار جاڭا مەكتەپتى جاقسى قابىلداپ جاتىر. مەكتەپ ينفراقۇرىلىمى دا وتە كەڭ. STEM زەرتحانالارى, IT-كابينەتتەر, روبوتتەحنيكا بولمەلەرى, بي جانە سپورت زالدارى بار. سونداي-اق حوككەي كورتى, قىسقى الاڭدار جۇمىس ىستەيدى. بارلىق ۇيىرمەنى تەگىن اشۋدى جوسپارلاپ وتىرمىز», دەدى ول.
سونىمەن قاتار مەكتەپ ديرەكتورى «ادال ازامات» جوباسىنىڭ اياسىندا التى باعىت بويىنشا جۇمىس ىستەپ جاتقاندارىن اتاپ ءوتتى.
«سونىڭ ىشىندە ەرەكشە توقتالاتىنىمىز – «بالالار كىتاپحاناسى» جوباسى. بۇل جوبا ءۇش تىلدە جۇرگىزىلەدى. الدىمەن قازاق تىلىندەگى كىتاپ وقىتىلادى, سودان كەيىن تەست تاپسىرادى. كەيىن ورىس تىلىندە, ودان سوڭ اعىلشىن تىلىندە كوركەم ادەبيەت ۇسىنىلادى. بارلىق ءۇش كەزەڭنەن وتكەن سوڭ وقۋشىلارمەن سۇحبات جۇرگىزىلەدى. جەڭىمپازدار مامىر ايىندا باعالى سىيلىقتارمەن ماراپاتتالادى», دەدى ە. ءىلياسوۆا.
ال 7-سىنىپ وقۋشىسى دىنمۇحاممەد داۋلەتكەلدى ۇلىنىڭ ايتۋىنشا, مەكتەپتە ەرەكشە بالالارعا جاقسى جاعداي جاسالعان.
ء«بىزدىڭ مەكتەپتە ءبىر ەمەس, ءتورت سپورت زال بار. سونىمەن قاتار مۇندا جەدەلساتى, پاندۋستار, ارنايى بەلگىلەر ورناتىلعان. وزىمە حيميا ءپانى ەرەكشە ۇنايدى. سەبەبى وسىنداعى زەرتحانادا ءتۇرلى تاجىريبە جاساۋعا ارنالعان زاماناۋي قۇرالدار وتە كوپ», دەدى ول.
بۇل جوبا ءبىلىم بەرۋ جۇيەسىن جاڭعىرتۋدا, وقۋشىلارعا ءبىلىم الۋدىڭ جاڭا فورماتىن ۇسىنىپ, ەلىمىزدىڭ بولاشاعى ءۇشىن ءبىلىمدى, ساۋاتتى ۇرپاق تاربيەلەۋگە جول اشادى. جوبانىڭ جۇزەگە اسۋى ءبىلىم بەرۋ سالاسىنداعى وزگەرىستەردىڭ باستاماسى جانە بولاشاقتا ەلىمىزدىڭ ەكونوميكالىق, الەۋمەتتىك تۇرعىدا دامۋىنا اسەر ەتەدى.
