فۋتبول. ايەلدەر اراسىنداعى الەمدىك دودانىڭ ءباسى قىزا ءتۇستى

استانا. 23 ماۋسىم. كانادادا فۋتبولدان ايەلدەر اراسىنداعى الەم چەمپيوناتى وتۋدە. ازىرگە شيرەك فينالعا شىققان 7 قۇراما بەلگىلى بولدى. ال سەگىزىنشى كوماندا ەرتەڭ انىقتالادى. بۇل تۋرالى egemen.kz حابارلادى. چەمپيوناتتىڭ 1/8 فينالىندا قىتاي كامەرۋن قۇراماسىن 1:0 ەسەبىمەن جەڭدى. ءدال سونداي ەسەپپەن اۆستراليا برازيليادان جانە كانادا شۆەيتساريادان باسىم ءتۇستى. ال اقش پەن كولۋمبيا اراسىنداعى ويىن سولتۇستىكامەريكالىقتاردىڭ پايداسىنا 2:0 ەسەبىمەن اياقتالدى. ودان بولەك, گەرمانيا شۆەتسيانى (4:1), فرانتسيا وڭتۇستىك كورەيانى (3:0) جانە انگليا نورۆەگيانى (2:1) جارىس جولىنان شىعاردى. ناتيجەسىندە دوپ دوداسىنىڭ شيرەك فينالىندا قىتاي اقش-پەن, گەرمانيا فرانتسيامەن جانە انگليا كانادامەن كەزدەسەتىن بولدى. ال 1/8 فينالداعى سوڭعى ويىن – جاپونيا مەن نيدەرلاندى اراسىنداعى كەزدەسۋدىڭ جەڭىمپازى اۆستراليامەن كۇش سىناسادى. جاپونيا – توپتىق كەزەڭدەگى بارلىق ويىنىندا جەڭىسكە جەتكەن ەكى قۇرامانىڭ ءبىرى. مۇنداي كورسەتكىشپەن برازيليا قىزدارى دا ماقتانا الادى. الايدا, ولار 1/8 فينالدا ءدال وسى اۆسترالياعا ەسە جىبەرگەنىن جوعارىدا ايتتىق. ماماندار كۇن شىعىس ەلىنىڭ قىزدارى نيدەرلاندىلىقتاردى جەڭەتىنىنە سەنىمدى. ونىڭ ۇستىنە, قىزعالداقتى ەلدىڭ وكىلدەرى ءوز توبىندا 3-ورىن الىپ, پلەي-وفف ساتىسىنا جيعان ۇپاي سانىنا بايلانىستى شىقتى. ودان بولەك, جاپونيا قازىرگى الەم چەمپيوندارى ەكەنىن ايتا كەتكەن ءجون. شيرەك فينالدىق ويىندار 27 ماۋسىمدا باستالادى. ايتا كەتەيىك, ايەلدەر اراسىنداعى الەم چەمپيوناتى 6 ماۋسىمدا باستالعان بولاتىن. جارىسقا 24 ەلدىڭ قۇرامالارى قاتىستى. فينالدىق ويىن 5 شىلدەگە جوسپارلانعان. ەلامان قوڭىر. دەرەك: egemen.kz. سۋرەت: fifa.com.