سۋرەت: azh.kz
پرەزيدەنت اۋقىمدى تسيفرلاندىرۋ جانە جاساندى ينتەللەكت تەحنولوگيالارىن بەلسەندى ەنگىزۋ ەكونوميكانى جاڭعىرتۋدىڭ نەگىزى ەكەنىن اتاپ ءوتتى. وسىعان بايلانىستى تسيفرلىق كودەكستى قابىلداۋدى جەدەلدەتىپ, جاساندى ينتەللەكت جانە تسيفرلىق دامۋ مينيسترلىگىن قۇرۋ ۇسىنىلدى.
ۇكىمەتكە ونەركاسىپ پەن اۋىل شارۋاشىلىعىنان باستاپ ءبىلىم مەن دەنساۋلىق ساقتاۋ سالاسىنا دەيىنگى بارلىق نەگىزگى سالادا جاساندى ينتەللەكتىنى تولىق ەنگىزۋدى قامتاماسىز ەتۋ جۇكتەلدى. بۇل تيىمدىلىكتى ارتتىرىپ قانا قويماي, ساپالى جاڭا جۇمىس ورىندارى مەن ەكونوميكالىق تاۋارلاردى قۇرۋعا مۇمكىندىك بەرەدى.
ينۆەستيتسيالىق ساياسات, ۇلتتىق قوردىڭ ءرولى جانە تسيفرلىق اكتيۆتەردىڭ ەكوجۇيەسىن قالىپتاستىرۋ ماسەلەلەرىنە ەرەكشە نازار اۋدارىلادى. جاريالانعان باعىت شيكىزاتتى تەرەڭ وڭدەۋگە جانە ىشكى نارىقتا دا, سىرتقى نارىقتا دا باسەكەگە قابىلەتتى ءونىم شىعارۋعا باعىتتالعان. مەن ەنەرگەتيكامەن بايلانىستى ادام رەتىندە پرەزيدەنتتىڭ وسى سالاداعى باستامالارىن ەرەكشە باعالايمىن.
مەملەكەت باسشىسى ەلىمىز قازىردىڭ وزىندە ەنەرگيا كوزدەرىن اۋقىمدى جاڭعىرتۋدى قولعا العانىن اتاپ ءوتتى. الداعى بەس جىلدا 6,3 گۆت جاسىل ەنەرگيانى ەنگىزۋ جوسپارلانىپ وتىر. بۇل ەلدىڭ جالپى ەنەرگەتيكالىق بالانسىنداعى ۇلەسىن ايتارلىقتاي ارتتىرۋعا مۇمكىندىك بەرەدى. اتوم ەنەرگەتيكاسىن دامىتۋعا دا باسا نازار اۋدارىلادى: ەكىنشى جانە ءۇشىنشى اتوم ەلەكتر ستانساسىنىڭ قۇرىلىسىن جوسپارلاۋدى باستاۋ ۇسىنىلادى. ەنەرگەتيكالىق كوشۋ – ءوز الدىنا ماقسات ەمەس, تۇراقتى دامۋ قۇرالى. ەلىمىز بۇل باعىتتا ەنەرگەتيكالىق جۇيەنىڭ ناقتى مۇمكىندىكتەرى مەن مەملەكەتتىڭ ۇزاقمەرزىمدى مۇددەلەرىنە سۇيەنە وتىرىپ العا جىلجيدى.
ەكولوگيالىق ماسەلەلەر دە نازاردان تىس قالمادى. كاسپي تەڭىزى دەڭگەيىنىڭ تومەندەۋى ماسەلەسىنە دە ەرەكشە كوڭىل ءبولىنۋ كەرەك. پرەزيدەنت شىۇ اياسىندا سۋ ماسەلەلەرىن زەرتتەۋ ورتالىعىن قۇرۋدى, سونداي-اق بۇكىل ءوڭىردىڭ ەكولوگيالىق قاۋىپسىزدىگى ءۇشىن اسا ماڭىزدى كاسپي تەڭىزىنىڭ سۋ رەسۋرستارىن ساقتاۋدىڭ مەملەكەتارالىق باعدارلاماسىن ازىرلەۋدى ۇسىندى. جولداۋدا الەۋمەتتىك ماسەلەلەر, عىلىم, ءبىلىم, مادەنيەت جانە ونەردىڭ جاساندى ينتەللەكت كونتەكسىندە دامۋى دا كورىنىس تاپتى. بۇل ادام كاپيتالى بولاشاقتىڭ باستى قۇندىلىعى مەن تىرەگى ەكەنىن ايقىن اڭعارتادى.
جولداۋدىڭ ماڭىزدى بولىگى – پارلامەنتتىك رەفورما تۋرالى باستاما. پرەزيدەنت الداعى ۋاقىتتا ەلىمىزدە جاڭا رەفورما مەن ءبىر پالاتالى پارلامەنت قۇرىلاتىنىن مالىمدەدى.
«بۇل رەفورما ازاماتتىق سەكتوردا, ساراپشىلار قاۋىمداستىعىندا جانە قازىرگى پارلامەنتتە ەگجەي-تەگجەي تالقىلاۋ نىساناسىنا اينالۋعا ءتيىس. رەفورمانىڭ ەرەكشە سيپاتىن ەسكەرە وتىرىپ, تالقىلاۋ كەم دەگەندە ءبىر جىلعا سوزىلادى, سودان كەيىن 2027 جىلى جالپىحالىقتىق رەفەرەندۋم وتكىزىلىپ, سودان كەيىن كونستيتۋتسياعا قاجەتتى وزگەرىستەر ەنگىزىلۋى مۇمكىن دەپ ويلايمىن», دەدى قاسىم-جومارت توقاەۆ.
ءبىر پالاتالى پارلامەنت قۇرۋ قاجەتتىگى تۋرالى جالپى شەشىم قابىلدانسا, مۇنداي پارلامەنت پارتيالىق ءتىزىم بويىنشا سايلانادى. ارينە, جولداۋدا ايتىلعان بارلىق باستاما جۇيەلى زاڭنامالىق قولداۋدى قاجەت ەتەدى. بىراق ەڭ باستىسى, باعىت انىقتالدى. ياعني ادىلدىككە, تۇراقتىلىققا جانە تەحنولوگياعا باعىتتالعان جول. ءبىز ەل دامۋىنىڭ جاڭا كەزەڭىنىڭ تابالدىرىعىندا تۇرمىز. الدا جۇمىس كوپ. ەلىمىزدىڭ جاساندى ينتەللەكت داۋىرىنە لايىقتى ەنۋىنە جانە ايماقتىڭ تسيفرلىق كوشباسشىسى بولۋىنا مۇمكىندىك جەتكىلىكتى.
دۇيسەنباي تۇرعانوۆ,
ءماجىلىس دەپۋتاتى
