سۋرەت: dknews.kz
پرەزيدەنت اتاپ وتكەندەي, «زاڭ جانە ءتارتىپ» – مەملەكەتىمىزدىڭ مىزعىماس تۇعىرى. بۇل قاعيدانى بەرىك ۇستانۋ – ۇلتتىق قاۋىپسىزدىكتى نىعايتۋ مەن ەل ىشىندە تۇراقتىلىقتى ساقتاۋدىڭ باستى العىشارتى. قوعامدا قۇقىقبۇزۋشىلىققا توزبەۋشىلىك مادەنيەتىن قالىپتاستىرۋ – بارشا مەملەكەتتىك ورگاننىڭ جانە ءاربىر ازاماتتىڭ ورتاق مىندەتى. وسى باعىتتا ۇلتتىق ۇلان جاۋىنگەرلەرى كۇن سايىن ءتارتىپتى قامتاماسىز ەتۋ, قۇقىقبۇزۋشىلىقتىڭ الدىن الۋ, ازاماتتاردىڭ تىنىشتىعى مەن قاۋىپسىزدىگىن قورعاۋ ىسىندە تاباندى قىزمەت اتقارىپ كەلەدى. پرەزيدەنتتىڭ بۇل سالاداعى باستامالارىن تولىق قولدايمىز جانە ونى جۇزەگە اسىرۋعا بار كۇشىمىزدى سالامىز.
جولداۋداعى قوعامدىق ورىندارداعى دورەكىلىك پەن تارتىپسىزدىككە قارسى تۇرۋ قاجەتتىگى جونىندەگى وي دا وتە ورىندى. وركەنيەتتى قوعامنىڭ نەگىزى – مادەنيەت پەن ادەپ. اسكەري قىزمەتشى ءۇشىن دە سىپايىلىق پەن ءتارتىپتى ساقتاۋ – باستى قاسيەتتەردىڭ ءبىرى. سوندىقتان ۇلتتىق ۇلان اسكەريلەرى قوعامدىق تىنىشتىقتى كۇزەتۋمەن قاتار, قوعامدا سىيلاستىق پەن قۇرمەت مادەنيەتىنىڭ ورنىعۋىنا ۇلەس قوسا بەرەدى.
مەملەكەت باسشىسى ەل بىرلىگىن نىعايتۋعا ەرەكشە توقتالدى. ء«اربىر ازامات مەملەكەتشىل, وتانشىل بولۋى كەرەك», دەگەن ءسوزى كاسىبي پارىزىمىزبەن تولىق ۇندەسەدى. ۇلتتىق ۇلان ساربازدارى ءۇشىن وتانعا ادال قىزمەت ەتۋ, ەگەمەندىكتى قورعاۋ, جەر تۇتاستىعىن ساقتاۋ – قاسيەتتى بورىش. حالقىمىز تاتۋلىقتى ساقتاپ, بىرلىگىن ارتتىرعان جاعدايدا عانا كەز كەلگەن قيىندىقتى ەڭسەرىپ, العا نىق قادام جاساي الامىز.
پرەزيدەنت جاستاردىڭ جاڭا ۇرپاعىنا ۇلكەن سەنىم ارتىپ وتىر. جولداۋدا ايتىلعانداي, قازىرگى جاس بۋىن ءۇشىن ءپاتريوتيزمنىڭ باستى كورىنىسى – جاسامپازدىق پەن جاڭاشىلدىق. بۇل – ۋاقىت تالابىنا ساي قۇبىلىس. جاستار عىلىم-بىلىمگە ۇمتىلىپ, زاماناۋي تەحنولوگيالاردى مەڭگەرىپ, جاساندى ينتەللەكتىنى يگەرۋ ارقىلى ەلىمىزدى وركەنيەتتى ەلدەر قاتارىنا قوسۋعا تالپىنىپ جاتىر. ۇلتتىق ۇلان قاتارىنداعى جاس ساربازدار دا وسى ۇمتىلىستى ءوز بويىنا ءسىڭىرىپ, ەل دامۋىنا ءوز ۇلەسىن قوسۋعا دايىن.
مەملەكەت باسشىسى سىلتەمە جاساعان حاكىم ابايدىڭ «ادامنىڭ ادامشىلىعى اقىل, عىلىم, جاقسى اتا, جاقسى انا, جاقسى قۇربى, جاقسى ۇستازدان بولادى» دەگەن ءسوزى ءاربىر ازامات ءۇشىن ومىرلىك ۇستانىم دەپ بىلەمىز. ول بۇل ويدى جالعاستىرىپ, وركەنيەتتى ەلدىڭ باستى ەرەكشەلىگى – ءادىل زاڭ, بىلىكتى بيلىك, سانالى ءارى بەلسەندى ازامات ەكەنىن اتاپ كورسەتتى. بۇل قاعيداتتار – قۇقىقتىق ءتارتىپ اسكەري قىزمەتىنىڭ دە نەگىزى. ءاربىر اسكەري قىزمەتشى ادىلدىككە, تارتىپكە, ەلگە ادالدىقپەن قىزمەت ەتۋگە انت بەرگەن.
جولداۋدا كوتەرىلگەن تاعى ءبىر ماڭىزدى ماسەلە – مەملەكەت دەڭگەيىندە قابىلدانعان شەشىمدەر حالىقتىڭ تۇرمىسىن جاقسارتۋعا, ەكونوميكانى تۇراقتاندىرۋعا, الەۋمەتتىك ادىلەتتىلىكتى ورنىقتىرۋعا باعىتتالۋعا ءتيىس ەكەنى. بۇل – ەلدىڭ جاڭا تۇرپاتتى, قۋاتتى مەملەكەتكە اينالۋىنىڭ باستى جولى. ۇلتتىق ۇلان ءوز كەزەگىندە ىشكى تۇراقتىلىقتى نىعايتۋعا جانە قوعامدىق قاۋىپسىزدىكتى قامتاماسىز ەتۋگە ۇلەس قوسىپ, وسى ۇلكەن ماقساتقا قىزمەت ەتەدى.
ەلىمىز بۇگىندە جان-جاقتى, تۇبەگەيلى رەفورمالاردىڭ ارقاسىندا دامۋدىڭ جاڭا كەزەڭىنە قادام باستى. الدا اۋقىمدى مىندەت تۇر. باعدارىمىزدان اينىماي, العا قاراي نىق قادام باسساق قانا مىقتى مەملەكەت بولامىز. پرەزيدەنتتىڭ ستراتەگيالىق باستامالارىن جۇزەگە اسىرۋدا ۇلتتىق ۇلان اسكەري قىزمەتشىلەرى ارقاشان الدىڭعى ساپتا بولىپ, حالىق پەن مەملەكەتكە ادال قىزمەت ەتەدى.
تالاپكەر امىرەەۆ,
گەنەرال-مايور,
قازاقستان رەسپۋبليكاسى ۇلتتىق ۇلان «وڭتۇستىك» وڭىرلىك قولباسشىلىعىنىڭ قولباسشىسى
