اقتوبە. 23 ماۋسىم. اقتوبەدە قازاقستاننىڭ تۇڭعىش پرەزيدەنتى نۇرسۇلتان نازارباەۆ اتىنداعى ورتالىق مادەنيەت جانە دەمالىس ساياباعىندا ش.قالداياقوۆ اتىنداعى «مەنىڭ قازاقستانىم» حالىقارالىق ءان فەستيۆالىنىڭ وبلىستىق ىرىكتەۋ كەزەڭى جانە جەڭىمپازدارىنىڭ گالا-كونتسەرتى ءوتتى. بۇل تۋرالى egemen.kz ءتىلشىسى حابارلادى.
فەستيۆال شىمىلدىعى حالىقارالىق بايقاۋلاردىڭ لاۋرەاتى اللابەرگەن جاقسىباەۆتىڭ ورىنداۋىندا قازاقستان كومپوزيتورلار وداعىنىڭ مۇشەسى بەيبىت ورال ۇلىنىڭ «اقتوبە» انىمەن اشىلدى. شارانىڭ قۇرمەتتى قوناقتارى جانە قازىلار القاسىنىڭ مۇشەلەرى پرەمەر-مينيستر ورىنباسارىنىڭ كەڭەسشىسى نۇربولات احمەتجانوۆ, مادەنيەت جانە سپورت مينيسترلىگى مادەنيەت كوميتەتىنىڭ باس ساراپشىسى قۋانىشبەك مۇحانعاليەۆ جانە وبلىسقا تانىمال مادەنيەت جانە ونەر قايراتكەرلەرى بولدى.
وڭىردە وسى بايقاۋعا قاتىسۋشىلاردىڭ سانى جىلدان-جىلعا ارتىپ كەلەدى. فەستيۆالدىڭ وبلىستىق ىرىكتەۋ كەزەڭىنە 15 ونەرپاز قاتىسىپ, وزدەرىنىڭ تالانتتارىن كورسەتە ءبىلدى. ءان بايقاۋى بارىسىندا كومپوزيتور ءشامشى قالداياقوۆتىڭ تانىمال جانە ەل ءسۇيىپ تىڭدايتىن اندەرى شىرقالدى. «جۇزدەن جۇيرىك» شىققان اقتوبەلىك ءانشى جانىبەك بايبوسىنوۆ كۇزدە استانادا وتەتىن ش.قالداياقوۆ اتىنداعى «مەنىڭ قازاقستانىم» حالىقارالىق ءان فەستيۆالىنە جولداما الدى. ول وندا وبلىس نامىسىن قورعايتىن بولادى.
ساتىبالدى ءساۋىرباي.
دەرەك, سۋرەت: egemen.kz.
