ماۋلەن اشىمباەۆ مۇحاممەد ابدۋلكاريم ءال-يساعا ءىلتيپات ءبىلدىرىپ, ليگانىڭ تولەرانتتىلىق, ءوزارا قۇرمەت جانە دىنارالىق كەلىسىم يدەيالارىن دارىپتەۋ جولىنداعى قىزمەتىنە, سونداي-اق ۇزاق جىل بويى سەزدىڭ ماقساتتارىنا قول جەتكىزۋگە قوسىپ كەلە جاتقان ۇلەسىنە جوعارى باعا بەردى. پالاتا سپيكەرى ديل باس حاتشىسى باستاماشى بولعان باتىس پەن شىعىس اراسىنداعى قارىم-قاتىناستى نىعايتۋدى كوزدەيتىن «Building Bridges between East and West» حالىقارالىق پلاتفورماسىنىڭ ماڭىزىنا نازار اۋدارىپ, ونى ىسكە اسىرۋعا قولداۋ ءبىلدىردى.
«قازاقستان پرەزيدەنتى قاسىم-جومارت توقاەۆ حالىقارالىق قاۋىپسىزدىكتىڭ بەرىك جۇيەسىن قالىپتاستىرۋ ماسەلەلەرىنە ۇنەمى باسا ءمان بەرىپ كەلەدى. وسىعان بايلانىستى ءبىز ءۇشىن دۇنيەجۇزىلىك يسلام ليگاسىمەن ءوزارا ءىس-قيمىلدى ارتتىرۋ ايرىقشا ماڭىزعا يە. ءبىزدىڭ بايلانىستارىمىز كەيىنگى جىلدارى ايتارلىقتاي جاندانا ءتۇستى. قازىرگى تاڭدا دۇنيەجۇزىلىك يسلام ليگاسى مۇسىلمان قاۋىمىنىڭ ىنتىماعىن نىعايتۋ, ورتاق رۋحاني قۇندىلىقتاردى ناسيحاتتاۋ جانە ءبىلىم بەرۋ باعىتتارىندا اۋقىمدى جۇمىس اتقارىپ كەلەدى. الداعى ۋاقىتتا قازاقستان مۇسىلماندارى ءدىني باسقارماسى مەن دۇنيەجۇزىلىك يسلام ليگاسى اراسىنداعى ىنتىماقتاستىق نىعايا تۇسەدى دەپ ۇمىتتەنەمىز», دەدى م.اشىمباەۆ.
سونىمەن قاتار الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى مارتەبەلى مەيمانعا سەزگە شاقىرۋدى قابىل العانى ءۇشىن العىس ءبىلدىردى. سونداي-اق ول دۇنيەجۇزىلىك يسلام ليگاسى مەن الەمدىك جانە ءداستۇرلى دىندەر كوشباسشىلارى سەزىنىڭ ماقساتتارى, ميسسياسى جانە باسىم باعىتتارى ورتاق ءارى ۇقساس ەكەنىنە نازار اۋداردى. سۇحبات كەزىندە دىنگە, ناسىلگە جانە سەنىمگە قاتىستى كەمسىتۋشىلىكتىڭ بارلىق ءتۇرىن ايىپتايتىن مەككە دەكلاراتسياسىنىڭ ماڭىزىنا دا ەرەكشە ءمان بەرىلدى. قۇجات الەمدى توزبەۋشىلىك پەن جەككورۋشىلىككە قارسى بىرلەسىپ ارەكەت ەتۋگە ۇندەيدى.
كەزدەسۋ بارىسىندا تاراپتار قازىرگى وزەكتى سىن-قاتەرلەردى تالقىلاپ, ولاردى ەڭسەرۋ جانە باسقا دا باعىتتار بويىنشا ىنتىماقتاستىقتى ودان ءارى نىعايتۋ جونىندە ءوز ۇسىنىستارىن ءبىلدىردى. ناقتى ايتقاندا, عىلىم, ءبىلىم بەرۋ, تسيفرلاندىرۋ جانە وزگە دە ماڭىزدى سالالاردا بايلانىستى كەڭەيتۋگە قاتىستى قولدانىستاعى, سونداي-اق الداعى بىرلەسكەن جوبالار تۋرالى ءسوز بولدى.
ءوز كەزەگىندە دۇنيەجۇزىلىك يسلام ليگاسىنىڭ باس حاتشىسى شەيح مۇحاممەد ابدۋلكاريم ءال-يسا سەزد حاتشىلىعىنىڭ باسشىسىنا شاقىرۋ ءۇشىن العىسىن جەتكىزدى. سونداي-اق ول حالىقارالىق قاۋىمداستىق ءۇشىن مۇنداي فورۋم وتكىزۋدىڭ اسا ماڭىزدى جانە قازىرگى ورتاق پروبلەمالاردى ەڭسەرۋ جولىندا كۇش بىرىكتىرۋدىڭ بەرەرى مول ەكەنىن ايتتى.
