سۋرەت: kaz.inform.kz
جاساندى ينتەللەكتىنى دامىتۋ, شاعىن جانە ورتا بيزنەسكە جاعداي جاساۋ, عىلىمعا بولىنگەن قارجىنى ءتيىمدى جۇمساۋ, ينفراقۇرىلىمدى جاقسارتۋ سياقتى اسا وزەكتى ماسەلەلەر قازىرگى قوعامنىڭ احۋالىن عانا كورسەتىپ قويمايدى, ولار ەلىمىزدىڭ ەرتەڭى ءۇشىن تەمىرقازىق بولاتىن باعدارلامالىق مانگە يە. قازىرگى زىمىران ۋاقىتتا جاساندى ينتەللەكتىنىڭ جالىنا جارماسىپ, تسيفرلىق تەحنولوگيانى اۋىزدىقتاپ باسەكەگە تۇسپەسەك, تۇبەگەيلى رەفورمالاردى جۇزەگە اسىرىپ, باعدارىمىزدى نىق ايقىنداپ الماساق, الەمدىك وركەنيەت شاڭىنا ىلەسە الماي قالۋىمىز ابدەن مۇمكىن. پرەزيدەنت ءوز جولداۋىندا, مىنە, وسىنداي كوكەيكەستى ماسەلەلەردى قوعام تالقىسىنا ۇسىندى.
جولداۋدا كوتەرىلگەن نەگىزگى ماسەلەلەردىڭ ءبىرى – عىلىمدى دامىتۋ. جولداۋدا ايتىلعانداي, ەلىمىزدىڭ عىلىمى بۇگىنگى تاڭدا پراكتيكالىق ناتيجەگە كوبىرەك كوڭىل بولۋگە ءتيىس. اگروعىلىمداعى جاڭالىقتاردىڭ شارۋاشىلىققا جەتكىلىكتى دارەجەدە ەنبەۋى, زەرتتەۋ ناتيجەلەرىنىڭ كوممەرتسيالانۋ دەڭگەيىنىڭ تومەندىگى – ءالى دە شەشىمىن كۇتكەن ماسەلەلەر. مۇنداي جاعدايدا جاساندى ينتەللەكت عىلىمدى قوعامعا جاقىنداتىپ, عىلىمي جاڭالىقتاردى ءوندىرىس پەن نارىققا جىلدام ەنگىزۋدىڭ ءتيىمدى تەتىگى بولا الادى. ماسەلەن, اۋىل شارۋاشىلىعىنداعى ونىمدىلىكتى ارتتىرۋ, گەولوگيالىق بارلاۋدى جەتىلدىرۋ, ينفراقۇرىلىمدى ءتيىمدى جوسپارلاۋ نەمەسە ەكونوميكالىق ۇدەرىستەردى بولجاۋ – بارلىعى دا عىلىم مەن جي-ءدىڭ ۇيلەسىمدى جۇمىسىن تالاپ ەتەدى. دەمەك مەملەكەت باسشىسىنىڭ جاساندى ينتەللەكتىنى دامىتۋعا ەرەكشە كوڭىل ءبولۋىن بۇگىنگى الەمدىك دامۋدىڭ تامىر سوعىسىن ءدال باسۋ دەگەن ءسوز. ويتكەنى قازىرگى تاڭدا جاساندى ينتەللەكت تەك تەحنولوگيا عانا ەمەس, جاڭا ءداۋىردىڭ اقىل-وي الەۋەتىنىڭ بيىك كورسەتكىشى دەۋگە بولادى. ۋنيۆەرسيتەتتەرگە, عىلىمي-زەرتتەۋ ۇيىمدارىنا وسى سالادا دەربەستىك بەرۋ ولاردىڭ الەمدىك عىلىمي باسەكەگە بىلەك سىبانا ارالاسىپ, تىڭ سەرپىنمەن جۇمىس ىستەۋگە جول اشادى. جي ارقىلى عىلىمي ىزدەنىستەردىڭ ناتيجەلىلىگى بۇرىن بولماعان بيىككە كوتەرىلىپ, ءبىلىم بەرۋدىڭ مۇلدە جاڭا ساپاسى قالىپتاساتىنى ءسوزسىز. ءبىزدىڭ پىكىرىمىزشە, عىلىمي زەرتتەۋ ينستيتۋتتارى دا وسى كوشتىڭ الدىندا بولىپ, جاڭا تەحنولوگيالاردى ءتيىمدى مەڭگەرىپ, تىڭ جوبالاردى جۇزەگە اسىرۋعا ءتيىس.
جولداۋدا مەملەكەت باسشىسى وركەنيەتتى ەل بولۋدىڭ العىشارتى – ءادىل زاڭ, بىلىكتى بيلىك, سانالى ءارى بەلسەندى ازامات ەكەنىن كەڭىنەن تولعادى. بۇل قاعيدات عىلىم سالاسىنا دا تىكەلەي قاتىستى. عىلىمدى دامىتۋعا باعىتتالعان ءاربىر مەملەكەتتىك شەشىم حالىقتىڭ تۇرمىسىن جاقسارتۋعا, عىلىمي الەۋەتتى دامىتۋعا, ەكونوميكانى نىعايتۋعا, الەۋمەتتىك ادىلدىكتى ورناتۋعا قىزمەت ەتۋى كەرەك. سول كەزدە دامىعان ەلدەردىڭ قاتارىنا قوسىلا الامىز. ءبىلىمدى جاستارىمىز ەلىمىزدىڭ عىلىمى مەن بىلىمىنە ەڭبەك ەتىپ, تابىستى جۇمىستاردى جۇزەگە اسىرماق.
قورىتا ايتقاندا, مەملەكەت باسشىسىنىڭ جولداۋىندا ەلىمىزدىڭ بولاشاقتا جاڭا زامان تالاپتارىنا لايىق تىڭ جولمەن دامۋىنىڭ نەگىزگى العىشارتتارى ايقىن كورسەتىلگەن. بۇل باستامالاردى جۇزەگە اسىرۋ ارقىلى ەلىمىزدىڭ الەۋەتى ارتىپ, ەكونوميكاسى نىعايىپ, عىلىم مەن ءبىلىمى جاڭا دەڭگەيگە كوتەرىلەدى. سونىڭ ارقاسىندا حالقىمىزدىڭ بولاشاققا دەگەن سەنىمى نىعايا تۇسەدى. وسى جولدا بىرلىگىمىزدى تانىتىپ, ەل مۇددەسىن ءبىرىنشى ساتىعا قويۋىمىز كەرەك.
بۋىرقانا دامىعان الەمنىڭ ساياسي-ەكونوميكالىق مۇحيتىندا قازاقستان كەمەسىنىڭ باعىت-باعدارى ايقىن, جەتىستىگى مول بولسىن.
كەنجەحان ماتىجانوۆ,
م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى, اكادەميك
