كيىز ءۇي سول زامانداعى ناعىز ينجەنەرلىك ونەردىڭ ۇلگىسى بولسا, قازاقتىڭ تۇرمىسى تابيعاتقا بەيىمدەلۋدىڭ ۇزدىك مودەلى ەدى. ەل ىشىندە قالىڭ قاۋىم ءومىر ءسۇرىپ, ەلدىگىن ساقتاپ وتىردى. الايدا بەرتىن كەلە تەحنيكا مەن تەحنولوگيا ءداۋىرى باستالعاندا ءبىز سول كوشتەن قالىپ قويدىق. ەۋروپا ءوندىرىس پەن ونەرتابىسقا بەت بۇرىپ, زاۋىت-فابريكالار تۇرعىزىپ, عىلىم مەن تەحنيكانى دامىتا باستاعاندا ءبىز تابيعي ءومىر سالتىن ساقتاپ قالدىق. وسىلايشا, وتىرىقشى ەلدەر ىلگەرىلەپ, ءبىز تۇتىنۋشى كۇيگە تۇستىك.
دەگەنمەن بۇل – ماڭگىلىك ۇكىم ەمەس. قازاق حالقى – ونەرتاپقىشتىققا, جاڭاشىلدىققا قابىلەتتى حالىق. بۇگىنگى تاڭدا جاس عالىمدارىمىز اۋىل شارۋاشىلىعىندا, IT, ەنەرگەتيكا, بيوتەحنولوگيا سىندى ماڭىزدى سالالاردا تىڭ جوبالار ۇسىنىپ, الەمدىك دەڭگەيدە مويىندالىپ ءجۇر. بۇل – سەرپىلىستىڭ باستاماسى.
مەملەكەت باسشىسى قاسىم-جومارت توقاەۆتىڭ بيىلعى جولداۋىندا ەرەكشە ءمان بەرگەن باعىتتاردىڭ ءبىرى تسيفرلىق دامۋ, يننوۆاتسيا جانە عىلىمدى قولداۋ بولدى. پرەزيدەنتتىڭ جولداۋى – جاي عانا جىل سايىنعى ءداستۇرلى بايانداما ەمەس, ەل دامۋىنىڭ ستراتەگيالىق باعدارى. وندا كوتەرىلگەن تسيفرلاندىرۋ, جاساندى ينتەللەكت, دەرەكتەردى باسقارۋ, اۋىلدى دامىتۋ, ۇلتتىق كادر دايارلاۋ سىندى باستامالار – بولاشاقتىڭ كىلتى.
قازىر – قازاق ەلى ءۇشىن تاريحي سەرپىلىس كەزەڭى. ءبىز وسى ءساتتى پايدالانا الساق, ءوز ونەرتاپقىشتارىمىزعا, عالىمدارىمىزعا, جاستارىمىزعا جاعداي جاساپ, يننوۆاتسيانى وندىرىسكە ەنگىزە الساق, ەرتەڭ تۇتىنۋشى ەمەس, تەحنولوگيا ءوندىرۋشى ەلگە اينالا الامىز.
كەشەگى ۇلى كوشپەلى وركەنيەتتىڭ زاڭدى جالعاسى رەتىندە بىزگە ەندى جاڭا كوشكە – تسيفرلىق كوشىنە ىلەسۋىمىز قاجەت. ەڭ باستىسى, قازاق بالاسىنىڭ بويىندا قارىم-قابىلەت, ءبىلىم مەن بىلىك, قاۋقار مەن كۇش بار. پرەزيدەنت جولداۋىندا كورسەتىلگەن مەجەلەر وسى مۇمكىندىكتى جۇزەگە اسىرۋعا جول اشادى.
ەرلان سىدىقوۆ,
اكادەميك
