باتىس قازاقستاندا مەملەكەتتىك قىزمەتكەرلەر زاڭسىزدىققا جول بەردى

ورال. 23 ماۋسىم. باتىس قازاقستان وبلىستىق اۋماقتىق ينسپەكتسياسىنىڭ لاۋازىمدى قىزمەتكەرلەرى ەلىمىزگە الىس شەت ەلدەردەن ەت ونىمدەرىن جەتكىزۋ كەزىندە وزدەرىنە سەنىپ تاپسىرىلعان تىكەلەي فۋنكتسيونالدىق مىندەتتەرىن بەلدەن باسقانى بەلگىلى بولىپ وتىر. بۇل تۋرالى egemen.kz ءتىلشىسى حابارلادى. ەلىمىزدە اۋىل شارۋاشىلىعى مينيسترلىگىنە قارايتىن ۆەتەرينارلىق باقىلاۋ جانە قاداعالاۋ كوميتەتى قۇرىلعان. ال ەل وڭىرلەرىندە ونىڭ اۋماقتىق ينسپەكتسيالارى جۇمىس جاسايدى. قازىرگى كەزدە بۇل قۇرىلىمدارعا جۇكتەلىپ وتىرعان جاۋاپكەرشىلىك وتە جوعارى. ايتسە دە باتىس قازاقستان وبلىستىق ينسپەكتسياسىنىڭ قىزمەتكەرلەرى جوعارىداعىداي زاڭسىزدىقتارعا جول بەرگەن. مۇنداي كەرەعارلىقتاردى باتىس قازاقستان وبلىستىق پروكۋراتۋراسى انىقتادى. اتاپ ايتقاندا, اتالعان ينسپەكتسيانىڭ مەملەكەتتىك ۆەتەرينارلىق-سانيتارلىق ينسپەكتورلارى مارات قابدەنوۆ پەن سەرىك سۇندەتوۆتەر وسىنداي لاس ءىس-ارەكەتتەرگە بارعان. ولار ەلىمىزگە جالعان ۆەتەرينارلىق سەرتيفيكاتتار بويىنشا ەت ونىمدەرىنىڭ جەتكىزىلۋىنە كوزدەرىن جۇما قاراعان. ونى كورسە دە كورمەگەندەي ءتۇر تانىتقان. بۇل تۇرعىدا جاسالعان پروكۋرورلىق تەكسەرۋلەر ەت ونىمدەرىن جىبەرۋشى برازيليا ەلىنەن سەرتيفيكات تۇپنۇسقاسىنىڭ جوق بولعانىن راستايدى. سونىمەن بىرگە, ليتۆا رەسپۋبليكاسىنان بەرىلگەن قۇجات تا ءتيىستى ۇلگىگە سايكەس كەلمەگەن. سوعان قاراماستان, جوعارىدا اتى-جوندەرى كورسەتىلگەن لاۋازىمدى قىزمەتكەرلەر وسى سەرتيفيكاتتاردى زاڭسىز قايتا رەسىمدەگەن. كەيىن ەت ونىمدەرى تيەلگەن اۆتوكولىك رەسەي فەدەراتسياسىندا ۇستالدى. ءسىرا, حالقىمىز قويدى قاسقىرعا باقتىرۋ دەگەن تىركەستى وسىندايدا ايتسا كەرەك. تەمىر قۇسايىن. دەرەك: egemen.kz. سۋرەت: 1720.kz.