13 قىركۇيەك كۇنى ساعات 23:30 شاماسىندا قاراعاندى وبلىسىندا «قاراعاندى – اياگوز – بوعاس» اۆتوجولىنىڭ شەشەنقارا اۋىلى ماڭىندا Ford Mondeo اۆتوكولىگىنىڭ جۇرگىزۋشىسى بەلگىلەنبەگەن جەردە قارسى جولاققا شىعىپ كەتىپ, Changan كولىگىمەن سوقتىعىسقان. اپات سالدارىنان بەس ادام وقيعا ورنىندا قازا تاپتى.
14 قىركۇيەك كۇنى ساعات 01:39 شاماسىندا جەتىسۋ وبلىسىندا «الماتى – وسكەمەن» اۆتوجولىنىڭ 479-شاقىرىمىندا Nissan Cefiro اۆتوكولىگىنىڭ جۇرگىزۋشىسى وڭتۇستىك باعىتتا قوزعالىپ كەلە جاتىپ, قارسى جولاققا شىعىپ, الدىمەن Lada ۆاز كولىگىمەن, كەيىن Chevrolet Cobalt كولىگىمەن سوقتىعىسقان.
اپات سالدارىنان Nissan Cefiro جۇرگىزۋشىسى وقيعا ورنىندا قازا تاپتى. Lada ۆاز كولىگىندەگى ءتورت ادامنىڭ بىرەۋى كوز جۇمىپ, تاعى بىرەۋى جاراقات الىپ, اۋرۋحاناعا جەتكىزىلدى. Chevrolet Cobalt كولىگىندە سەگىز ادام, سونىڭ ىشىندە ءبىر بالا بولعان. الدىن الا مالىمەتتەر بويىنشا ولاردىڭ بارلىعى قازا تاپقان.
جۇرگىزىلگەن تەكسەرۋ ناتيجەسىندە ەكى جول ۋچاسكەسىندە دە جول جامىلعىسىنىڭ تەگىس ەكەندىگى جانە كولىك قوزعالىسىنا كەدەرگى كەلتىرەتىن اقاۋلاردىڭ بولماعانى انىقتالدى. «الماتى – وسكەمەن» اۆتوجولى 2024 جىلدىڭ جەلتوقسان ايىندا قايتا جاڭعىرتۋدان كەيىن پايدالانۋعا بەرىلگەن. جول جابىندىسى نورماتيۆتىك تالاپتارعا تولىق سايكەس كەلەدى. ال «قاراعاندى – اياگوز – بوعاس» اۆتوجولىندا ورتاشا جوندەۋ جۇمىستارى جۇرگىزىلىپ, جابىننىڭ جاعدايى دا ستاندارتتارعا ساي بولعان.
سوڭعى جىلدارى قايتا جوندەۋ جانە جاڭعىرتۋ جۇمىستارى اياقتالعاننان كەيىن جول-كولىك وقيعالارىنىڭ جيىلەپ وتىرعانى بايقالادى. تەگىس جول مەن اشىق كورىنۋ مۇمكىندىگىن پايدالانعان كەيبىر جۇرگىزۋشىلەر جىلدامدىقتى شامادان تىس اسىرىپ, جول قوزعالىسى ەرەجەلەرىن بۇزۋدا. مۇنداي جاۋاپسىزدىق ورنى تولماس قايعىلى جاعدايلارعا اكەلىپ وتىر.
