سۋرەتتەردى تۇسىرگەن – ەرلان ومار, «EQ»
كىتاپتىڭ تانىستىرىلىمىندا پارلامەنت سەناتىنىڭ دەپۋتاتى نۇرتورە ءجۇسىپ, ءماجىلىس دەپۋتاتى جانداربەك ءاشىمجان, جازۋشىلار وداعىنىڭ استانا قالالىق فيليالىنىڭ ديرەكتورى باۋىرجان باباجان ۇلى, جازۋشى قانات ابىلقايىر, «Beles» قۇرىلىس كومپانياسىنىڭ باسشىسى, وسى شىعارمانىڭ جازىلۋىنا مۇرىندىق بولعان ماحات ءتورالى پىكىر ءبىلدىرىپ, تۋىندى تۋرالى جىلى لەبىزدەرىن جەتكىزدى.
ء«ار قازاعىمنىڭ شاڭىراعىندا تۇرسا, ءاربىر قازاق بالاسى وقىپ وسسە, سول ارقىلى جاس ورەندەرىمىز بەكزaتتاي بەكزادا بولمىستى ۇل بولىپ, ۇلتىنىڭ تۋىن اسقاقتاتسا ەكەن دەگەن ىزگى نيەتپەن وسى كىتاپتى جارىققا شىعارىپ وتىرمىز. بۇل تۋىندىنى جيىرما جاسىندا حالقىن تاۋسىلماس قۋانىشقا كەنەلتىپ, ماڭگى وشپەس جارىق جۇلدىزعا اينالعان بەكزات باتىردىڭ رۋحىنا ارنايمىز. مەن بەكزاتتى ستۋدەنت كۇنىمنەن-اق ۇلگى تۇتتىم. ول بىزدەن ەكى كۋرس جوعارى وقىدى. ونىڭ ءاربىر جەكپە-جەگىن كورگەن ساتتە جۇرەگىمىز دۇرسىلدەپ, نامىسىمىز قايرالاتىن. ول بىزگە جەڭىستىڭ قانداي بولاتىنىن عانا ەمەس, ناعىز ادامدىقتىڭ دا ولشەمىن كورسەتىپ كەتتى», دەدى ماحات ءتورالى.
سودان سوڭ «Beles» قۇرىلىس كومپانياسىنىڭ باسشىسى وسى جيىنعا ارنايى كەلگەن بەكزاتتىڭ اناسىنا العىس ءبىلدىرىپ, پاتەر كىلتىن تابىستادى. سىرلىكۇل ساتتارحانوۆا ۇلىنىڭ ەسىمىن ۇلىقتاپ, رۋحىن ارداقتاعان تۋىندى اۆتورى مەن دەمەۋشىسىنە, جينالعان جۇرتقا ريزاشىلىعىن جەتكىزدى.
«جاس بالا تۋعاندا اناسى جورگەككە ورايدى. ول ءوسىپ, ازامات بولسا, ەلىن سۇيسە, جۇرتىنا ادال قىزمەت ەتسە, حالىق ونداي ۇلدى جۇرەگىنە ورايدى. ءبىز بەكزاتتى سونداي, حالقىنىڭ جۇرەگىنە ورانعان ۇل دەپ بىلەمىز. ال بەيبىتتى بۇرىن مىقتى ساتيريك رەتىندە تانيتىنبىز. ەندى سپورت تاقىرىبىندا كوركەم دۇنيە جازعانىن كورىپ, قۋانىپ وتىرمىز. اۆتورعا شىعارماشىلىق تابىس تىلەيمىن», دەدى سەنات دەپۋتاتى نۇرتورە ءجۇسىپ.
جيىن بارىسىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ دوكتورانتى بايان حاسانوۆا اتالعان كىتاپ توڭىرەگىندە بايانداما جاسادى.
«بەكزات» رومانىنىڭ سيۋجەتتىك جەلىسى قازاق حالىق اۋىز ادەبيەتىندەگى باتىرلار ميفىمەن سارىنداس. ەجەلگى ەرتەگىلەر مەن جىرلاردا باتىردىڭ تىلسىمعا تولى تۋ تاريحى, كوز ىلەسپەس جىلدامدىقپەن ءوسۋى – (بۇل روماندا دا اۆتوردىڭ ۋاقىتى وتە جىلدام وتەدى, جىلدار تەز سىرعيدى) جانە ەر ادامنىڭ پسيحولوگياسىنا ءتان وزىنە كەڭىستىك ىزدەپ, جەر-الەمدى باعىندىرۋعا ۇمتىلۋى (شىعارمادا بەكزاتتىڭ چەمپيون بولۋعا ۇمتىلۋى ارقىلى كورىنىس تابادى), ەرلىككە باستايتىن ساپارى, سول ساپارىندا الدىنان شىققان كەدەرگىلەر مەن ونى ەڭسەرۋ, ماحاببات وقيعاسى مەن ونىڭ ماشاقاتى – ءبارى كوركەم ميفتەر مەن ەرتەگىلەردە كەزدەسەتىن تانىس موتيۆ. ءبىر عانا «ەر توستىك» ەرتەگىسىندەگى توستىكتىڭ ومىرگە كەلۋ حيكاياسىن الايىق. حالىقتىڭ قيالىندا ول ۇزاق جىل بالا كوتەرە الماعان اناسىنىڭ «توستىك» جەۋىمەن تىكەلەي بايلانىستى بولسا, «بەكزات» رومانىندا باس كەيىپكەردىڭ دۇنيە ەسىگىن اشۋىن اۆتور سىرلىكۇلدىڭ بالا كوتەرۋ دەنساۋلىعىنا قاۋىپتى ەكەنىن بىلە تۇرا, تۇسىندەگى ايانعا سەنىم ارتىپ, شەشىم قابىلداۋىمەن بايلانىستىرادى. اسقاق ارمان جولىنداعى جاس سپورتشىنىڭ وليمپ شىڭىن باعىندىرعانشا جانىندا بولىپ, تالانتى مەن بولاشاعىنا سەنىم ارتىپ, اقىل-كەڭەس بەرىپ, ۇكىلەپ باپتاعان بارلىق جان, ونىڭ ىشىندە – اكەسى سەيىلحان, قوس اعاسى, جاتتىقتىرۋشىلارى قادىر, نۇرلان, اناتولي ۆيزيرياكين, بوكسشى ەرماحان, دوسى ارمان ت.ب. ومىرىندە الدىنان شىققان ءاربىر ىزگىلىك تاراتۋشى, ءتىپتى كەي تۇستا بەكزاتتىڭ ءوزى دە «داناگوي» ارحەتيپىنىڭ جۇگىن ارقالاعان», دەدى ول.
ال كىتاپ اۆتورى بەيبىت سارىبايدىڭ ايتۋىنشا, ءبىز بىلەتىن بەكزاتتىڭ بوكسشىلىعى – ونىڭ نەبارى ءبىر قىرى عانا.
«بىلەسىزدەر مە, بەكزات شىن مانىندە اقىن بولعان. ءيا, ول تەك سپورتشى عانا ەمەس, سان-سالالى, امبەباپ تۇلعا ەكەن. بۇعان تۇركىستانعا بارىپ, سىرلىكۇل اپامىزدىڭ شاڭىراعىندا جاتا-جاستانا اڭگىمەلەسكەندە انىق كوزىمىز جەتتى. چەمپيوننىڭ اعالارى مەن جەڭگەلەرىنەن دە, دوستارىنان دا كوپ نارسەنى سۇرادىق. سوندا قازىرگى جاستارعا قارىم-قابىلەتىمەن قاتار ادامي بولمىسىمەن دە ۇلگى بولارلىق ادەبي كەيىپكەر بەكزات ەكەنىن ىشتەي سەزدىم. ويتكەنى ول – ءبىلىمدى, اقىلدى, مەيىرىمدى, شەبەر, جانكەشتى. جالپى, شىعارمانى جازار الدىندا ءبىراز دەرەك جينادىم, ءتۇرلى كىتاپتاردى دا وقىپ شىقتىم. بۇعان دەيىن بەكزات تۇلعاسى تۋرالى ەكى كىتاپ جارىق كورگەن ەكەن. ولاردى وتە جاقسى جازىلعان دەپ ايتۋعا بولادى. الايدا ول دۇنيەلەر نەگىزىنەن اقپاراتتىق دەرەكتەرگە قۇرىلىپتى. مەن بەكزاتتىڭ ءومىرىن جاي عانا بايانداپ قويماي, وعان سەزىم قوسىپ, جان بىتىرگىم كەلدى. شىعارمانى جازىپ اياقتاعان سوڭ, كىتاپتىڭ العاشقى نۇسقاسىن سىرلىكۇل اپامىزعا جەتكىزدىم. ول كىسى روماندى وقىپ, ريزاشىلىعىن بىلدىرگەن سوڭ, وسى تۋىندىنى كوپشىلىك نازارىنا ۇسىنىپ وتىرمىز», دەدى اۆتور بەيبىت سارىباي.
