ەلىمىزدە جاساندى ينتەللەكت جانە تسيفرلىق دامۋ مينيسترلىگىن قۇرۋ باستاماسى – ۋاقىت تالابىنان تۋعان وتە ورىندى شەشىم. بۇگىندە جاساندى ينتەللەكت پەن تسيفرلىق تەحنولوگيالار ەكونوميكانىڭ, عىلىمنىڭ, ءبىلىمنىڭ, باسقارۋ جۇيەلەرىنىڭ دامۋىندا نەگىزگى قوزعاۋشى كۇشكە اينالدى. الەمدىك تاجىريبە كورسەتكەندەي, مۇنداي ستراتەگيالىق سالانى ۇيلەستىرىپ وتىراتىن دەربەس مەملەكەتتىك ورگان ەلدىڭ يننوۆاتسيالىق الەۋەتىن ارتتىرادى.
ء«ۇش جىل ىشىندە قازاقستان تسيفرلىق ەل بولۋى كەرەك» دەگەن ماقسات – قوعامدى جۇمىلدىراتىن, بولاشاققا ناقتى باعدار بەرەتىن امبيتسيالىق مىندەت. الايدا ونى جۇزەگە اسىرۋعا تەك ينفراقۇرىلىم مەن تەحنيكالىق شەشىمدەر جەتكىلىكسىز. ەڭ باستىسى – ادامي كاپيتال. حالىقتىڭ تسيفرلىق ساۋاتتىلىعىن ارتتىرۋ, مەكتەپتەن باستاپ ۋنيۆەرسيتەتكە دەيىنگى دەڭگەيدە جاساندى ينتەللەكت نەگىزدەرىن وقىتۋ, عالىمدار مەن ستارتاپتارعا جاعداي جاساۋ اسا ماڭىزدى. بۇل رەتتە ستۋدەنتتەر, ماگيسترانتتار, دوكتورانتتار اراسىندا جاساندى ينتەللەكت سالاسىنداعى داعدىلاردى جان-جاقتى دامىتۋعا, ۇلتتىق ەكونوميكانىڭ الەۋەتىن اشۋعا باعىتتالعان «AI-Sana» يننوۆاتسيالىق جەدەلدەتۋ باعدارلاماسى جۇزەگە اسىپ جاتىر. وسى جوبانىڭ اياسىندا ءبىزدىڭ ۋنيۆەرسيتەت ستۋدەنتتەرىنە «Cousera» ونلاين پلاتفورماسىنان 1000 ليتسەنزيا بەرىلدى.
«AI-Sana» سونداي-اق پروفەسسور-وقىتۋشىلار قۇرامىنىڭ بىلىكتىلىگىن ارتتىرۋعا باعىتتالعان باعدارلاما. «AI-Sana» باعدارلاماسىنداعى جاساندى ينتەللەكت باعىتى بويىنشا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى – استانا قالاسىنداعى نەگىزگى جوعارى وقۋ ورنى.
ۋنيۆەرسيتەتىمىزدەگى بارلىق ءبىلىم بەرۋ باعدارلامالارىنىڭ ستۋدەنتتەرىنە جاساندى ينتەللەكت نەگىزدەرىن وقىتۋ ءۇشىن, كولەمى 36 ساعات «AI Bootcamp: جاساندى ينتەللەكت نەگىزدەرى بويىنشا ينتەنسيۆتى كۋرس» اتتى جاپپاي اشىق ونلاين كۋرس ازىرلەنىپ, جۇزەگە اسىرىلىپ جاتىر. كۋرس سوڭىندا سەرتيفيكات بەرىلەدى.
سونىمەن قاتار دەرەكتەردىڭ قاۋىپسىزدىگى, ەتيكالىق نورمالاردى ساقتاۋ, ۇلتتىق تىلدىك رەسۋرستاردى تسيفرلاندىرۋ سياقتى باعىتتارعا ەرەكشە نازار اۋدارىلىپ وتىر. ەگەر وسى قادامدار كەشەندى تۇردە جۇزەگە اسسا, جاقىن ارادا تسيفرلىق ەلگە اينالامىز دەگەن سەنىمدەمىن.
بيبىگۇل رازاحوۆا,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى جاساندى ينتەللەكت تەحنولوگيالارى كافەدراسىنىڭ مەڭگەرۋشىسى
