كوللاجدى جاساعان – قونىسباي شەجىمباي, «EQ»
باعدارلاما اياسىندا ءاربىر ستۋدەنتكە ەلىمىزدەگى جەكە IT-مەكتەپتەردە وقۋعا 500 مىڭ تەڭگەگە دەيىنگى گرانت بەرىلەدى. بۇل جاي عانا قولداۋ ەمەس, بولاشاعى زور سالادا كاسىبي مانساپ قۇرۋعا ناقتى مۇمكىندىك. «Tech Orda»-نىڭ ماقساتى – تسيفرلىق ەكونوميكا تالاپتارىنا بەيىمدەلگەن كۋرستار ارقىلى اقپاراتتىق-كوممۋنيكاتسيالىق تەحنولوگيالار سالاسىنداعى ادامي كاپيتالدى دامىتۋ. جىل سايىن مىڭداعان ازامات وسى مۇمكىندىكتى پايدالانىپ, IT-سالاسىنا قادام باسىپ كەلەدى.
بيىل باعدارلاماعا 80 IT-مەكتەپ اككرەديتاتسيادان ءوتىپ, 160 ءتۇرلى كۋرس ۇسىندى. ولاردىڭ قاتارىندا ۆەب-ازىرلەۋ, 3D-ديزاين, AR/VR قولدانبالارى, وپەراتسيالىق جۇيەلەردى ازىرلەۋ, كيبەرقاۋىپسىزدىك, IoT (زاتتار ينتەرنەتى), «Big Data», ءموبيلدى قوسىمشالار مەن «GameDev» باعىتتارى بار. سونىمەن قاتار «Agile», ءونىم مەنەدجمەنتى جانە جاساندى ينتەللەكت سالالارى باسىم باعىت رەتىندە ايقىندالعان.
«Tech Orda» باعدارلاماسى مىڭداعان ازامات ءۇشىن شىنايى الەۋمەتتىك باسپالداققا اينالدى. بۇگىندە ەلدىڭ ءار وڭىرىنەن كەلگەن جاستار, ءتىپتى باستاپقى دايىندىعى بولماسا دا, قىسقا مەرزىم ىشىندە زاماناۋي IT-قۇزىرەتتەردى مەڭگەرىپ, مىقتى كومپانيالاردا جۇمىسقا ورنالاسىپ جاتىر. وتكەن جىلى 35 مىڭنان استام ءوتىنىم قابىلدادىق, ال ارنايى اعىمدار اياسىندا العاش رەت 1000 پەداگوگتى وقىتتىق. بۇل باعدارلامانىڭ كەڭ اۋقىمدا دامىپ كەلە جاتقانىن, وعان دەگەن سەنىمنىڭ ارتقانىن كورسەتەدى. كوپتەگەن قاتىسۋشى ءۇشىن «Tech Orda» تەك ماماندىق اۋىستىرۋ مۇمكىندىگى عانا ەمەس, ەلدىڭ تسيفرلىق ترانسفورماتسياسىنا ۇلەس قوسۋعا جاسالعان سانالى قادام بولدى», دەدى تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسۇلان ماديەۆ.
بىلتىر باعدارلاما اياسىندا 3 465 گرانت ءبولىندى, ونىڭ 2 465-ءى نەگىزگى اعىمعا, ال 1 000 گرانت مۇعالىمدەرگە ارنالعان ارنايى باعىتتار بويىنشا ءبولىندى (ونىڭ 300-ءى مەكتەپ مۇعالىمدەرىنە, 700-ءى جوعارى وقۋ ورىندارىنىڭ وقىتۋشىلارىنا).
«Tech Orda» باعدارلاماسىنا قاتىسىپ, ءومىرىن تۇبەگەيلى وزگەرتكەن جاندار بارشىلىق. ماسەلەن, ارۋنا سابىر ساياساتتانۋشى ماماندىعى بويىنشا ءبىلىم العان, مەملەكەتتىك باسقارۋ سالاسىندا ماگيستراتۋرانى ءتامامداپ, بىرنەشە جىل ۋنيۆەرسيتەتتە قىزمەت ەتكەن. دەگەنمەن IT سالاسىن مەڭگەرۋگە دەگەن ىقىلاسى بارىنەن باسىم تۇسكەن.
«بۇعان دەيىن ءتۇرلى ونلاين-كۋرستارعا قاتىسىپ كوردىم, بىراق كوبىن سوڭىنا دەيىن جەتكىزبەيتىنمىن. «Tech Orda» باعدارلاماسى جۇيەلىلىگىمەن, مەنتورلاردىڭ قولداۋىمەن جانە گرانت ارقىلى وقۋ مۇمكىندىگىمەن باۋراپ الدى. قازىر مەنىڭ ءومىرىم تۇبەگەيلى وزگەردى, «backend PHP» -ازىرلەۋشى بولىپ جۇمىس ىستەيمىن. بۇل باعدارلاما بولماسا, مۇنداي قادامعا بارار ما ەدىم, بىلمەيمىن», دەيدى ول.
بۇگىندە ارۋنا «Meteoro Ai» كومپانياسىندا ەڭبەك ەتىپ, IT سالاسىندا سەنىمدى مانساپ جولىن جالعاستىرىپ كەلەدى.
ال ءاليا راقىشەۆا SDU-دىڭ ەكونوميكا ماماندىعى بويىنشا تۇلەگى. بۇعان دەيىن «KPMG» كومپانياسىندا سالىق كەڭەسشىسى بولىپ ىستەگەن. كەيىن «Data Science» سالاسىنا بەت بۇرۋدى شەشىپ, «Tech Orda» باعدارلاماسى تۋرالى ەستيدى.
«ماعان IT-مەكتەپتەردى تاڭداۋ مۇمكىندىگى مەن وقۋ اقىسىنىڭ تولىقتاي گرانت ەسەبىنەن جابىلاتىنى ۇنادى. «Data Science» بويىنشا ءبىلىمىمدى نىعايتىپ, ونى ناقتى تاجىريبەدە قولدانۋدى قالادىم. ەڭ پايدالىسى – قاراپايىم دەرەكتەردى تۇسىنىكتى مەتريكاعا جانە بيزنەسكە قاجەتتى ۇسىنىستارعا اينالدىرۋدى ۇيرەندىم», دەدى ءاليا.
باعدارلاما بارىسىندا ول كوماندالىق جوبالارعا قاتىسىپ, توپپەن جۇمىس ىستەۋ بويىنشا تاجىريبە جينادى. باعدارلامانى اياقتاعان سوڭ, ءاليا «Freedom Insurance» كومپانياسىنا «Junior Data Scientist» رەتىندە جۇمىسقا ورنالاستى.
ال باياشات توقمۇحامبەت KBTU-دىڭ 4-كۋرس ستۋدەنتى بولىپ ءجۇرىپ, «Tech Orda» تۋرالى دوستارىنان ەستىگەن. ونىڭ ايتۋىنشا, باعدارلامانىڭ باستى ارتىقشىلىعى – تەگىن وقۋ مۇمكىندىگى.
«IT-مەكتەپتەگى ورتا ءبىزدى ءاردايىم ىنتالاندىرىپ وتىردى. التى ايدىڭ سوڭىندا EPAM كومپانياسىنداعى تاجىريبەگە دايىندالا باستادىم, كوپ ۇزاماي حالىقارالىق جوباعا تاعىلىمدامادان وتۋگە قابىلداندىم. بۇل باعدارلاما تەك ءبىلىم بەرىپ قانا قويعان جوق, جاڭا دوستار سىيلادى, ورتامدى كەڭەيتتى», دەيدى ول.
قازىر باياشات EPAM «Solutions» كومپانياسىندا «Junior Software Engineer» قىزمەتىن اتقارادى. ونىڭ «GitHub» پلاتفورماسىندا «shanyrak.kz» پەن «Fox Paper» جوبالارى بار.
ارۋنا, ءاليا جانە باياشاتتىڭ وقيعالارى «Tech Orda» باعدارلاماسىنىڭ كومەگىمەن جاڭا ءومىر باستاعان جۇزدەگەن تۇلەكتىڭ قول جەتكىزگەن جەتىستىگىنىڭ ءبىر بولىگى عانا. باعدارلاما ازاماتتارعا جاڭا ماماندىق مەڭگەرىپ, سۇرانىسقا يە جۇمىس تابۋعا, IT سالاسىندا دامۋعا جول اشىپ وتىر. ويتكەنى «Tech Orda» – جەكە IT-مەكتەپتەردە ءبىلىم الۋعا بەرىلەتىن مەملەكەتتىك ۆاۋچەر. بۇل باعدارلاما ەڭ سۇرانىسقا يە IT-باعىتتاردى تەگىن مەڭگەرۋگە, بار بولعانى 6 ايدا جاڭا ماماندىق يەسى اتانۋعا, وزىڭىزگە ىڭعايلى وقۋ فورماتىن تاڭداۋعا جانە تاجىريبەدەن ءوتىپ, جۇمىس تابۋعا جول اشادى.
قازىرگى تاڭدا تىزىمدە 79 مەكتەپ پەن 159 كۋرس ۇسىنىلعان. بىردەن بەس كۋرسقا ءوتىنىش بەرۋگە بولادى, بىراق گرانت تەك ءبىر كۋرسقا بەرىلەدى.
ستاتيستيكاعا سۇيەنسەك, «Tech Orda» تۇلەكتەرىنىڭ 88%-ى جۇمىسقا ورنالاسقان, ولاردىڭ ورتاشا جالاقىسى 505 000 تەڭگەنى قۇرايدى. بۇگىندە باعدارلاما تۇلەكتەرى «Kaspi.kz», «Halyk Bank», «KPMG», «Ernst & Young», «تەڭىزشەۆرويل», «قازمۇنايگاز», «Freedom Finance», «Kcell», «Air Astana», «Kolesa Group» سىندى جەتەكشى كومپانيالاردا قىزمەت اتقارىپ جاتىر.
