قوستاناي. 23 ماۋسىم. «اتا» قورى ءوزىنىڭ 10 جىلدىق مەرەكەسىن اتاپ ءوتتى. سالتاناتقا ۇلى وتان سوعىسى, تىل جانە ەڭبەك ارداگەرلەرى نەمەرەلەرىمەن بىرگە كەلدى. سونىمەن قاتار رەسەيدەن دە قوناقتار شاقىرىلدى. بۇل تۋرالى egemen.kz ءتىلشىسى حابارلادى.
وبلىس ورتالىعىنداعى ءى.وماروۆ اتىنداعى وبلىستىق قازاق دراما تەاترىنىڭ كورنەكتى زالىندا «اتا» قورىنىڭ ونجىلدىعى جانە وسى مەرەيتويعا ارنالعان «قالدىرعان ءىزى ماڭگىلىك» اتتى كىتاپ پەن ءفيلمنىڭ تۇساۋكەسەرى ءوتتى. وعان «اتا» قورى قامقورلىق جاسايتىن ارداگەرلەر, قالا باسشىلارى قاتىستى.
«اتا» قورىنىڭ توراعاسى جانە جالعىز قۇرىلتايشىسى مارات قابدىسالىقوۆ: «ءبىز ۇلى وتان سوعىسىندا وتانىمىزدى قورعاعان جانە تىلدا مايدان ءۇشىن تىنىمسىز ەڭبەك ەتكەن, ودان كەيىنگى جىلدارى ەڭبەك ۇلگىسىن كورسەتكەن اعا بۋىن وكىلدەرى — ارداگەرلەرىمىز الدىندا ماڭگىلىك قارىزدارمىز. «اتا» قورى سول ءۇشىن قۇرىلعان بولاتىن. مىنە ون جىل. ءبىز شىعارعان كىتاپ پەن فيلمدە ارداگەرلەرىمىزبەن قاتار قوردىڭ تاريحى, ون جىل بويى ىستەگەن جۇمىسى تۋرالى ايتىلادى دەدى.
جينالعاندار ءفيلمدى تاماشالادى. «اتا» قورى ارداگەرلەرگە الەۋمەتتىك كومەك بەرۋمەن قاتار, سوڭعى جىلدارى ولاردىڭ دەمالىسىن ۇيىمداستىردى. ۇلكەن, جايلى اۆتوبۋسپەن قارتتاردى استاناعا, قوستاناي قالاسىنىڭ سىرتىنداعى تابيعات اياسىنا, بۋرابايعا, چەليابىگە اپاردى. اۋرۋحاناعا تۇسكەن قاريالارعا ءدارى-دارمەگىن, تاماعىن اپارىپ بەرەتىن دە «اتا» قورى بولدى, قارايتىنى جوق قاريالار و دۇنيەلىك بولعاندا ولاردى سوڭعى ساپارعا اتتاندىرۋدى دا ءوز مويىنىنا الىپ وتىرادى. فيلمدە سويلەگەن قاريالار «اتا» قورىنىڭ كورسەتكەن قامقورلىعىن كەيدە ءوز جاقىندارىنان دا كورمەيتىنىن اقجارىلىپ ايتتى. مۇنداي قوعامدىق قوردىڭ ەلىمىزدە بالاماسى جوق دەۋگە دە بولادى.
سالتاناتتا ءسوز العان وبلىستىق ارداگەرلەر كەڭەسىنىڭ توراعاسى كەنجەبەك ۋكين «اتا» قورىنىڭ جۇمىسى قازاقستاندىق ءپاتريوتيزمنىڭ ءبىر ۇلگىسى ەكەننى تىلگە تيەك ەتتى.
كەنجەبەك ۋكين: «ارامىزدا ۇلى وتان سوعىسىندا وسى بەيبىت زامان ءۇشىن وق پەن وت كەشكەن 300-دەن اسا مايدانگەرلەر جانە تىلدا ايانباي ەڭبەك ەتكەن 10 مىڭنان اسا تىل ەڭبەكككەرلەرى ءجۇر. سوعان شۇكىرلىك ەتەمىز. سوعىسقا قوستانايدان 73,5 مىڭ ادام كەتىپ, سونىڭ 27 مىڭنان استامى قايتىپ ورالمادى, 16 مىڭ جاۋىنگەر حابارسىز كەتتى. بۇگىن 22 ماۋسىم — ۇلى وتان سوعىسىنىڭ باستالعان كۇنى. كوڭىلگە اۋىر تيەتىن كۇن. ءبىز سوعىس قۇرباندارىن ۇمىتپاۋىمىز, ولاردىڭ ارۋاعىنا تاعزىم ەتۋىمىز كەرەك, ال ارامىزدا جۇرگەن مايدانگەرلەرگە قانداي قۇرمەت تە ارتىق ەمەس» دەدى. كەنجەبەك ۇكى ۇلى سونىمەن قاتار رەسەيدەگى 28 پانفيلوۆشىلار ەرلىگى تاريحىن جوققا شىعارعان قاۋەسەتكە رەنىشىن ءبىلدىردى. ونداي اڭگىمەلەر ەلدىڭ اراسىن ىرىتۋمەن قاتار, كەيىنگى ۇرپاققا دۇرىس تاربيە بولمايتىندىعىن ايتا كەلىپ, ەلدى قورعاۋ ءۇشىن جانىن قيعان اتالارىمىزدىڭ ارۋاعىنا قيانات ەكەنىن دە كۇيىنە ايتتى.
سالتاناتتان كەيىن «اتا» قورى مەن وبلىستىق ارداگەرلەر كەڭەسى بىرىگىپ, ارداگەرلەرگە داستارحان جايدى.
ءنازيرا جارىمبەتوۆا.
دەرەك, سۋرەت: egemen.kz
