فوتو: اشىق دەرەككوز
ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتى ازىرلەگەن زاڭ جوباسى 2025 جىلعى 4 قىركۇيەكتە وتكەن كەڭەيتىلگەن وتىرىستا تالقىلانىپ, سەنات اپپاراتى قىزمەتكەرلەرى مەن زاڭ ازىرلەۋشى وكىلدەرىنىڭ قاتىسۋىمەن قارالعان بولاتىن.
زاڭنىڭ نەگىزگى ماقساتى – يننوۆاتسيالىق قىزمەتتى مەملەكەتتىك قولداۋ جۇيەسىن جەتىلدىرۋ, جاڭا تەحنولوگيالاردى ەنگىزۋ ءۇشىن قولايلى جاعداي جاساۋ جانە قازاقستان ەكونوميكاسىنىڭ باسەكەگە قابىلەتتىلىگىن ارتتىرۋ.
قۇجات 2 كودەكسكە جانە 10 زاڭعا وزگەرىستەر ەنگىزۋدى كوزدەيدى. اتاپ ايتقاندا:
- «استانا حاب» حالىقارالىق تەحنولوگيالىق پاركى مەن «يننوۆاتسيالىق تەحنولوگيالار پاركى» دەربەس كلاستەرلىك قورى بىرىكتىرىلىپ, بىرىڭعاي «استانا حاب» دەربەس كلاستەرلىك قورى قۇرىلادى.
- قوردى قارجىلاندىرۋ جۇيەسى قايتا قارالىپ, مۇشەلىك جارنالار ەسەبىنەن قالىپتاستىرۋ كوزدەلەدى.
- جەر قويناۋىن پايدالانۋشىلاردان تۇسەتىن مىندەتتى قارجىلاندىرۋ الىپ تاستالادى.
- ۆەنچۋرلىك نارىقتى دامىتۋ ءۇشىن مەملەكەتتىك قولداۋ شارالارىن باعالاۋ تەتىگى ەنگىزىلەدى.
- ۇلتتىق يننوۆاتسيالىق جۇيەنىڭ بىرىڭعاي تسيفرلىق تەرەزەسىن دامىتۋ قاراستىرىلعان.
- بايلانىس وپەراتورلارى مەملەكەتتىك ستاتيستيكا ءۇشىن ابونەنتتەر تۋرالى يەسىزدەندىرىلگەن دەرەكتەردى ۋاكىلەتتى ورگانعا ۇسىنۋعا مىندەتتەلەدى.
