مادەني ءىس-شارانىڭ اشىلۋىندا پرەزيدەنتتىك ورتالىقتىڭ ديرەكتورى باقىتجان تەمىربولات قىلقالام شەبەرىنىڭ شىعارماشىلىعى تۋرالى جىلى لەبىزىن ءبىلدىردى.
«بۇگىنگى كورمەگە ءداستۇرلى ۇلت ونەرىن زاماناۋي كوركەمدىكپەن ۇيلەستىرگەن انار اۋباكىر 35 جاڭا تۋىندىسىن ۇسىنىپ وتىر. بۇل ەڭبەكتەرىندە ول ابايدىڭ فيلوسوفيالىق يدەياسى مەن اعارتۋشىلىققا ۇمتىلىسىن قايتا پايىمداپ, تەرەڭ وي تۇيەدى», دەدى ول.
جالپى, كورمەگە اۆتوردىڭ باس-اياعى الپىستان استام جۇمىسى قويىلعان. ونىڭ شىعارماشىلىعىنىڭ ءبىر ەرەكشەلىگى – مەديتاتسيالىق تاجىريبە مەن كوركەمدىك زەرتتەۋلەردىڭ سينتەزىنە نەگىزدەلگەن. ءاربىر كەسكىندەمەسى ايشىقتى. ادامدى فيلوسوفيالىق ويعا تارتادى. سونداي-اق شەبەردىڭ كيىزدەن جاساعان دۇنيەلەرى, كيىمدەرى, ويۋ-ورنەكتەرى جانە باسقا دا تۇرمىس زاتتارى دا كەستەلى بەدەرلەنگەن. ايتالىق, «قاپسىرما» كارتيناسى مەن «سارىماي» ينستاللياتسياسى – «قوس وبراز» قاعيداسىمەن ورىلگەن.
كورمە بارىسىندا سۋرەتشى ءوز تۋىندىلارىندا اباي يدەياسىنىڭ بۇگىنگى تاڭدا دا وزەكتىلىگىن كورسەتكىسى كەلگەنىن ايتتى.
«حاكىم اتامىزدىڭ «قاراسوزدەرى» ادامعا شابىت سىيلايدى. مەن ءۇشىن اباي – تاريحي تۇلعا عانا ەمەس, ول – ءبىزدى جانە قورشاعان الەمدى تۇسىنۋگە كومەكتەسەتىن دانالىقتىڭ قاينار كوزى», دەيدى اۆتور.
بۇگىندە كورمە يەسىنىڭ ەسىمى ەلىمىزگە عانا ەمەس, الىس-جاقىن شەتەلگە دە تانىمال. بىرقاتار تۋىندىلارى گەرمانيا, رەسەي, تاتارستان مۋزەيلەرى مەن جەكە كوللەكتسيالارىندا ساقتاۋلى تۇر. حالىقارالىق كورمەلەردىڭ تۇراقتى قاتىسۋشىسى. ءبىر سوزبەن ايتقاندا, انار اۋباكىردىڭ كورمەسىنەن ۇلتتىق ءداستۇردى ساقتاي وتىرىپ, قازىرگى زاماناۋي ونەردىڭ كوكجيەگىنەن جول ىزدەگەن ىزدەنىستى بايقادىق.
