مينيسترلەر كابينەتى جانىنداعى مەملەكەتتىك قىزمەت جانە جەرگىلىكتى ءوزىن-ءوزى باسقارۋ ىستەرى اگەنتتىگىنىڭ ديرەكتورى قۇدايبەرگەن بازارباەۆتىڭ ايتۋىنشا, زاڭ جوباسى ۇلتتىق يدەولوگيانى نىعايتۋعا, جالال-اباد قالاسىنا تاريحي تۇلعا, حالىق قاھارمانى, قىرعىز حالقىن ءتۇرلى باسقىنشىلىقتاردان قورعاۋشى ۇلى ماناستىڭ ەسىمىن بەرۋگە باعىتتالعان.
اتىن وزگەرتۋگە كەتەتىن شىعىن شامامەن 15 ميلليون سومدى قۇرايدى.
قىرعىز ساياساتكەرى فەليكس كۋلوۆ بۇعان دەيىن Facebook جەلىسىندەگى پاراقشاسىندا جالال-اباد قالاسىنىڭ اتىن وزگەرتۋ جانە وعان اكىمشىلىك استانا مارتەبەسىن بەرۋ تۋرالى ايتقان بولاتىن.
ونىڭ پىكىرىنشە, جالال-اباد اتىن ماناس دەپ وزگەرتكەننەن كەيىن ونىڭ مارتەبەسىن نىعايتۋ ءۇشىن بەلگىلى ءبىر شارالاردى قولعا الۋ كەرەك.
– مەن نيدەرلاند مەملەكەتىنىڭ جولىمەن ءجۇرۋدى ۇسىنامىن. بۇل ەلدىڭ استاناسى – امستەردام, بىراق گااگا – ۇكىمەتتىڭ, پارلامەنتتىڭ جانە مونارحتىڭ ورنى. تاعى ءبىر مىسال, ءۇش استاناسى بار وڭتۇستىك افريكانى ايتۋعا بولادى: پرەتوريا (اكىمشىلىك), كەيپتاۋن (زاڭ شىعارۋشى) جانە بلۋمفونتەين (سوت). نەلىكتەن ءبىز وسى نۇسقالاردىڭ ءبىرىن ۇستانبايمىز جانە ماناس قالاسىنا اكىمشىلىك استانا مارتەبەسىن بەرمەسكە؟! كەيبىر مينيسترلىكتەردى, ۆەدومستۆولاردى, ءىرى مەملەكەتتىك كورپوراتسيالاردى وڭتۇستىككە كوشىرۋگە دە بولادى. بۇل رەتتە بىشكەكتى دە ازداپ جەڭىلدەتەر ەدىك, - دەپ ءبولىستى ساياساتكەر.
