قوستانايدا قازاقستان مەن رەسەي پرەزيدەنتتەرى تۋرالى كىتاپتىڭ تۇساۋكەسەرى ءوتتى

قوستاناي. 23 ماۋسىم. قوستانايدا جۋرناليست, اۋماقتىق «كوستانايسكيە نوۆوستي» گازەتىنىڭ باس رەداكتورى, الەۋمەتتانۋ عىلىمدارىنىڭ دوكتورى سەرگەي حارچەنكونىڭ «ەكى ەل, ەكى تاعدىر, ءبىر ماقسات» («دۆە سترانى, دۆە سۋدبى, ودنا تسەل») اتتى كىتابىنىڭ تۇساۋكەسەرى ءوتتى. وعان تاريحشىلار مەن الەۋمەتتانۋشىلار, فيلوسوفتار, زيالى قاۋىم وكىلدەرى جانە جۋرناليستەر شاقىرىلدى. بۇل تۋرالى egemen.kz ءتىلشىسى حابارلادى. سەرگەي حارچەنكونىڭ «ەكى ەل, ەكى تاعدىر, ءبىر ماقسات» كىتابى بيىل ماسكەۋدىڭ «پەرو» باسپاسىنان جارىق كورگەن بولاتىن. كىتاپتىڭ ەرەكشەلىگى, ونىڭ تەڭ جارتىسى قازاقستان پرەزيدەنتى نۇرسۇلتان نازارباەۆتىڭ, ەكىنشى جارتىسى رەسەي پرەزيدەنتى  ۆلاديمير ءپۋتيننىڭ ءومىر جولى, قىزمەتى, مەملەكەتتىك, قوعامدى قايراتكەرلىگىنە ارنالعان. كىتاپ ەكى جاقتان دا پاراقتالادى. اۆتور «نۇرسۇلتان نازارباەۆ: ۇلت كوشباسشىسى, ەۋرازيالىق ويشىل» دەگەن بولىمدە ەلباسى فەنومەنىنە ۇڭىلەدى. ونىڭ ءوسۋ جولىن, ءومىرىن, شىققان ورتاسىن ايتا وتىرىپ, ءىرى ساياساتكەر بولىپ قالىپتاسۋىنداعى العى شارتتاردى كورسەتەدى. «بارلاۋشى, ساياساتكەر, پاتريوت» دەگەن بولىمىندە رەسەي پرەزيدەنتىنىڭ قالىپتاسۋىن اڭگىمەلەيدى. اۆتور ەكى بولىمدە دە كورشى ەكى ءىرى ەلدىڭ پرەزيدەنتتەرىن  الەمدىك ساياساتكەر تۇلعالارمەن قاتار قويادى, ونى دالەلدەيدى. تۇساۋكەسەردە كىتاپ تۋرالى جىلى لەبىزدەر ايتىلدى. قازاقستاننىڭ ەڭبەك ەرى سايران بۇقانوۆ: «مەملەكەتتىڭ دامۋى مەن نىعايۋىندا ونىڭ باسشىلارىنا كوپ نارسە بايلانىستى. كەڭەس وداعى ىدىراعاننان كەيىن بارلىق رەسپۋبليكالار ءۇشىن وڭاي بولعان جوق, بارلىعى دا قيىن ۋاقىتتان ءوتتى. ءبىزدىڭ ەلباسىعا بارلىعىن قايتادان قۇرۋ, دامۋدىڭ جولىن تاڭداۋ وڭاي بولماعانى بەلگىلى. ەكونوميكالىق بايلانىستار ءۇزىلىپ, قالاي ءجۇرۋدى بىلمەي داعدارعاندا تىعىرىقتان جول تاپتى. ەڭ باستىسى ەلدە ساياسي داعدارىسقا جول بەرمەدى. مىسالى, بايقوڭىر ماسەلەسىن شەشۋ, ەلىمىز استاناسىن كوشىرۋ, جاڭا قالا كوتەرۋ   سەكىلدى ءىرى ماسەلەلەر شەشىمىن تاپتى. سونىڭ بارلىعىنىڭ ەڭ اۋىر جۇگى ەلباسىنىڭ يىعىنا تۇسكەنىن بىلەمىز. كىتاپتا وسىنىڭ بارلىعى پۋبليتسيستيكالىق سيپاتتا ادەمى بەرىلگەن. ءبىز ەلباسىنى بارلىعىمىز جاقسى بىلەمىز دەپ ويلايمىز, ال شىن مانىندە وسى ءىرى تۇلعا جونىندە بىلمەيتىنىمىزدىڭ وتە كوپ ەكەنىن سەرگەي ۆاسيلەۆيچتىڭ جاڭا كىتابىن پاراقتاعاندا ايقىن سەزىنەمىز», دەدى. كىتاپ اۆتورى سەرگەي حارچەنكو تۇساۋكەسەردە جينالعاندارعا جانە كىتاپ جونىندە پىكىر بىلدىرگەندەرگە راحمەت ايتتى جانە بۇل تاقىرىپقا بارعان سەبەبىنەن دە كوپشىلىكتى حاباردار ەتتى. سەرگەي حارچەنكو: «ماڭگى كورشى ەلمىز, ارىپتەسپىز. قازىر وتە كۇردەلى ۋاقىتتا ءومىر ءسۇرىپ وتىرمىز. مۇندايدا ءبىز پرەزيدەنتىمىزدى قولداۋىمىز كەرەك. مەن وسى جونىندە رەسەيدەگى جاعدايلارعا رەنجيمىن. مەن نەگىزى وپپوزيتسيالىق پىكىرلەرگە قارسى ەمەسپىن,. وپپوزيتسيا دا ەلدىڭ دامۋىنا, بولشاعىنا مۇددەلى بولۋى جانە پرەزيدەنتكە ءبىر ماسەلەنىڭ بالاما ءتۇرىن ۇسىنىپ وتىرۋى, ءوزىنىڭ پىكىرىن ءبىلدىرۋى ءتيىس. وپپوزيتسيالىق باعىت ول پرەزيدەنتىن سىيلاماي, قارالاۋ دەگەن ءسوز ەمەس» دەدى. كىتاپ جالپى كوپشىلىككە ارنالعان. ونىڭ 300 داناسى وبلىس كىتاپحانالارىنا تاراتىلدى. ءنازيرا جارىمبەتوۆا. دەرەك, سۋرەت: egemen.kz