فوتو: parlam.kz
دەپۋتاتتىڭ سوزىنشە, پرەزيدەنت قاسىم-جومارت توقاەۆ جولداۋىندا ەلىمىزدەگى اۋەجايلاردىڭ الەۋەتىن تولىق پايدالانۋدى تاپسىرعان بولاتىن. بۇعان قوسا, مەملەكەت باسشىسى 2022 جىلى پاۆلودار وبلىسىنا ساپارى بارىسىندا پاۆلودار اۋەجايىنداعى ۇشۋ-قونۋ جولاعىن جوندەۋدى ناقتى مىندەتتەگەن ەدى.
«پاۆلودار وبلىسى – ەلىمىزدىڭ ءىرى يندۋستريالىق ايماعىنىڭ ءبىرى. مۇندا اۋىل شارۋاشىلىعى سالاسى دا قارقىندى دامىپ كەلەدى, ءتۋريزمنىڭ الەۋەتى دە جوعارى. وڭىرگە كەلىپ-كەتەتىن ازاماتتار سانى جىلدان جىلعا ارتىپ كەلەدى. سونىڭ ىشىندە ىسكەرلىك ماقساتتا ساپارلايتىن وتاندىق جانە شەتەلدىك ينۆەستورلاردىڭ ۇلەسى دە كوبەيۋدە. اسىرەسە, قىسقى مەزگىلدە كولىك قاتناسى قيىنداعان تۇستا جۇرتشىلىققا ۇشاقپەن قاتىناۋعا قاجەتتىلىك ارتا تۇسەدى. وسىنداي جاعدايدا اۋە قاتىناسىنىڭ قولجەتىمدىلىگى مەن قاۋىپسىزدىگى ايرىقشا ماڭىزعا يە ەكەنى انىق», دەدى جارقىنبەك امانتاي ۇلى.
ونىڭ ايتۋىنشا, جوبانىڭ جالپى قۇنى – 16,9 ملرد تەڭگە, اياقتالۋ مەرزىمى 2024-2025 جىلدارعا بەلگىلەنگەن. قازىرگى تاڭدا جۇمىستاردىڭ 44 پايىزى ورىندالدى: ۇشۋ-قونۋ جولاعى, پەررون مەن رۋلەجدىك جولاقتاردىڭ جابىندىسى فرەزەرلەندى, جەر جۇمىستارى جۇرگىزىلدى, درەناجدىق جۇيە ورناتىلىپ, بەينەباقىلاۋ مەن قورشاۋ مونتاجى باستالعان. سونىمەن قاتار شامامەن 5 ملرد تەڭگەگە ماتەريالدار مەن جابدىقتار ساتىپ الىندى.
الايدا جوبانى تولىق اياقتاۋ ءۇشىن قوسىمشا 9,3 ملرد تەڭگە قاجەت. دەپۋتاتتىڭ ايتۋىنشا, پاۆلودار وبلىسىنىڭ اكىمدىگى بۇل ماسەلە بويىنشا كولىك مينيسترلىگىنە رەسمي حات جولداعانىمەن, تولىق قارجىلاندىرۋ ءالى بولىنگەن جوق.
«پاۆلودار اۋەجايىنداعى ۇشۋ-قونۋ جولاعىن قايتا جاڭعىرتۋ – تەك ايماق ءۇشىن عانا ەمەس, بۇكىل ەلىمىزدىڭ الەۋمەتتىك-ەكونوميكالىق دامۋ كورسەتكىشى ءۇشىن ماڭىزدى جوبا. بۇل ءوڭىردىڭ ينۆەستيتسيالىق تارتىمدىلىعىن ارتتىرىپ, ەكسپورتتىق الەۋەتىن كەڭەيتەدى, كولىك-لوگيستيكالىق ينفراقۇرىلىمدى جەتىلدىرەدى جانە ەڭ باستىسى حالىقتىڭ قاۋىپسىز ءارى قولايلى اۋە قاتىناسىنا قول جەتكىزۋىنە مۇمكىندىك بەرەدى. وسىعان بايلانىستى جوبانى اياقتاۋعا قاجەتتى قوسىمشا قارجى ءبولىنۋى ءتيىس», دەدى جارقىنبەك امانتاي ۇلى.
