فوتو: «بايتاق» پارتياسىنىڭ ءباسپاسوز قىزمەتى
پرەزيدەنت جولداۋىندا ساياسي جۇيەگە ەنگىزىلەتىن وزگەرىستەرمەن قاتار, «تازا قازاقستان» ۇلتتىق جوباسى, سۋ رەسۋرستارىن باسقارۋ, ەكولوگيالىق قاۋىپسىزدىك سىندى تاقىرىپتارعا ەرەكشە كوڭىل ءبولىندى. قاسىم-جومارت توقاەۆ سۋ تاپشىلىعى ماسەلەسىن شەشۋ – ەلدىڭ تۇراقتى دامۋى مەن ۇلتتىق قاۋىپسىزدىگى ءۇشىن اسا ماڭىزدى ەكەنىن اتاپ ءوتىپ, تسيفرلىق باسقارۋ جۇيەسىن قۇرۋ, بىلىكتى ماماندار دايارلاۋ جانە سۋ ديپلوماتياسىن نىعايتۋ قاجەتتىگىن العا تارتتى. سونىمەن بىرگە ارال تەڭىزىن قالپىنا كەلتىرۋ باعىتىنداعى جەتىستىكتەر مەن كاسپيدىڭ تارتىلۋىنىڭ عالامدىق قاۋىپكە اينالعانى ءسوز بولدى.
«جولداۋ – ەل دامۋىنىڭ ناقتى باعىتى. ءبىز تسيفرلاندىرۋدى, ينۆەستيتسيا تارتۋدى جانە جاسىل ەنەرگەتيكانى قولدايمىز. ەڭ باستىسى – ەكولوگيا مەن سۋ رەسۋرستارىن ۇتىمدى پايدالانۋ. پرەزيدەنت ۇسىنعان ءبىر پالاتالى پارلامەنت قۇرۋ باستاماسى دا دەموكراتيالىق وزگەرىستەرگە جول اشادى», دەدى پارتيا توراعاسى ازاماتحان امىرتاەۆ.
ولەگ پاك, پارتيا توراعاسىنىڭ ورىنباسارى, پارلامەنتتىك رەفورمانىڭ تەك قۇرىلىمدىق وزگەرىستەرمەن شەكتەلمەي, دەپۋتاتتاردىڭ دەربەستىگى مەن حالىق الدىنداعى جاۋاپكەرشىلىگىن ارتتىرۋعا باعىتتالۋى ءتيىس ەكەنىن ايتتى.
ايەلدەر كەڭەسىنىڭ استانا قالالىق ءتورايىمى روزا تەمىرقۇلوۆا قوعامداعى تۇراقتىلىق پەن تاتۋلىقتىڭ ماڭىزىن اتاپ ءوتتى.
«پرەزيدەنتتىڭ بۇل باستاماسى — تاريحي ءسات. ارينە, قوعامدا ءتۇرلى پىكىر بار. بىراق ەڭ باستىسى — ەلدەگى تۇراقتىلىق پەن تاتۋلىقتى ساقتاۋ. ءاربىر شەشىم بالالارىمىزدىڭ بولاشاعىنا اسەر ەتەدى. سوندىقتان ءبىز ايەلدەر قاۋىمى رەتىندە وسى ماسەلەنى اشىق ءارى سانالى تۇردە تالقىلاپ, قوعامدا كەلىسىم مەن ءوزارا قۇرمەتتى ساقتاۋعا شاقىرامىز. پرەزيدەنتتىڭ حالىققا دەگەن سەنىمى — ۇلكەن جاۋاپكەرشىلىك. بۇل سەنىمدى اقتاۋىمىز قاجەت», دەدى.
پارتيا جوبالارىنىڭ جەتەكشىسى قۋاندىق نۇرتاەۆ ەكولوگيالىق يدەولوگيا تۇجىرىمداماسى جولداۋداعى باسىم باعىتتارمەن ۇندەسەتىنىن, بۇل پارتياعا جاڭا ساياسي مۇمكىندىكتەر بەرەتىنىن جەتكىزدى.
«مەملەكەت باسشىسى 2025 جىلعى 8 قىركۇيەكتەگى جولداۋىندا ەلىمىزدىڭ جاڭا ساياسي ماۋسىمى باستالدى. ءبىز 2025 جىلعى 5 ماۋسىمدا پارتيانىڭ جاڭا ەكولوگيالىق يدەولوگيا تۇجىرىمداماسىن تانىستىرعان بولاتىنبىز. تۇجىرىمدامانىڭ بىرقاتار تارماقتارى پرەزيدەنت جولداۋىنان جولداۋىمەن ۇندەسەدى. «بۇل پارتيامىزعا ەكولوگيالىق كۇن ءتارتىبىن جۇزەگە اسىرىپ, الداعى پارلامەنت سايلاۋىندا جەڭىسكە جەتۋگە ناقتى مۇمكىندىك بەرەدى», دەدى ول.
سونىمەن قاتار جيىنعا Zoom ارقىلى ايماقتىق فيليال وكىلدەرى, ءماسليحات دەپۋتاتتارى مەن بۇقارالىق اقپارات قۇرالدارىنىڭ جۋرناليستەرى قوسىلدى.
قورىتىندىسىندا «بايتاق» جاسىلدار پارتياسى پرەزيدەنت جولداۋىن تولىق قولدايتىنىن جانە قازاقستاننىڭ ەكولوگيالىق تۇراقتىلىعى مەن جاسىل دامۋ جولىنا بەلسەندى ۇلەس قوساتىنىن مالىمدەدى.
