فوتو: سۋ رەسۋرستارى مينيسترلىگى
ول مەملەكەت باسشىسىنىڭ «جاساندى ينتەللەكت داۋىرىندەگى قازاقستان: وزەكتى ماسەلەلەر جانە ونى تۇبەگەيلى تسيفرلىق وزگەرىستەر ارقىلى شەشۋ» اتتى جولداۋىندا ايتىلعان تاپسىرمالاردىڭ ورىندالۋ بارىسىنا توقتالدى.
سۋ سالاسىن جاڭعىرتۋ جانە ورنىقتى دامىتۋ جونىندەگى مىندەتتەردى جۇيەلى شەشۋ ءۇشىن مينيسترلىك 2030 جىلعا دەيىنگى سۋ رەسۋرستارىن باسقارۋ جۇيەسىن دامىتۋ تۇجىرىمداماسىن, سۋ سالاسىن دامىتۋدىڭ كەشەندى جوسپارىن جانە جاڭا سۋ كودەكسىن قامتيتىن قۇقىقتىق جانە ينستيتۋتسيونالدىق بازانى قالىپتاستىردى. بۇل قۇجاتتار گيدروتەحنيكالىق قۇرىلىسجايلاردى رەكونسترۋكتسيالاۋ مەن تەحنيكالىق قايتا جاراقتاندىرۋدان باستاپ وزىق تسيفرلىق تەحنولوگيالاردى ەنگىزۋگە دەيىنگى نەگىزگى نىسانالى ينديكاتورلار مەن ولارعا قول جەتكىزۋ جونىندەگى شارالاردى بەكىتەدى», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
مينيسترلىك دەرەگىنشە, كادر ماسەلەسىن شەشۋ ءۇشىن 2024 جىلى قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتى اشىلدى. جاڭا وقۋ ورنى ۆەنگريانىڭ كورۆينۋس ۋنيۆەرسيتەتىمەن بىرگە قوس ديپلومدى ماگيسترلىك باعدارلاما ۇسىنىپ وتىر. سونداي-اق ەرازمۋس مۋندۋس جوباسى اياسىندا ۋنيۆەرسيتەت بازاسىندا سۋ ديپلوماتياسى ورتالىعىن قۇرۋعا قارجى ءبولىندى.
«2025 جىلى سۋ سالاسىنىڭ 125 مامانى قىتاي حالىق رەسپۋبليكاسىندا قابىلداۋشى تاراپتىڭ ەسەبىنەن وقۋدان ءوتتى. 2026 جىلى تاعى 200 ماماندى دايارلاۋ جوسپارلانىپ وتىر, بۇل وتاندىق تاجىريبەگە وزىق شەتەلدىك تاجىريبەنى ەنگىزۋگە مۇمكىندىك بەرەدى. ەگەر 2023 جىلى سۋ سالاسىنا قاتىستى مامانداردى دايارلاۋ 9 جوعارى وقۋ ورنىندا جۇرگىزىلسە, 2025 جىلعا قاراي مۇنداي وقۋ ورىندارىنىڭ جەلىسى 13 جوعارى وقۋ ورنى مەن 8 تەحنيكالىق جانە كاسىپتىك ءبىلىم بەرۋ ۇيىمىنا دەيىن كەڭەيتىلدى. 2025 جىلعى 1 قىركۇيەكتەگى جاعداي بويىنشا ۋنيۆەرسيتەت پەن تەحنيكالىق جانە كاسىپتىك ءبىلىم بەرۋ ۇيىمدارىندا ءبىلىم الۋشىلاردىڭ جالپى سانى شامامەن 2 500 ادامدى قۇرايدى», دەلىنگەن حابارلامادا.
سونداي-اق مەملەكەت باسشىسىنىڭ تاپسىرماسىنا سايكەس, جەرۇستى جانە جەراستى سۋلارى تۋرالى مالىمەتتەردى بىرىكتىرەتىن ۇلتتىق اقپاراتتىق جۇيە ازىرلەنىپ جاتىر. جوبانى ەۋرازيالىق دامۋ بانكىنىڭ تسيفرلىق باستامالار قورى قولداپ وتىر. جۇيە 2026 جىلدىڭ سوڭىنا دەيىن تولىق ىسكە قوسىلادى دەپ جوسپارلانعان.
«سونىمەن قاتار نەگىزگى بارلىق وڭىردە ورنالاسقان 367 نىساندى قوسا العاندا, ۇزىندىعى 3,5 مىڭ كم-دەن استام سۋارۋ كانالىن اۆتوماتتاندىرۋ جۇمىستارى جۇرگىزىلىپ جاتىر. 2026 جىلدان باستاپ 103 كانالدىڭ رەكونسترۋكتسياسى مەن اۆتوماتتاندىرىلۋى باستالادى, ال 2028 جىلدىڭ قالعان 264 كانال جاڭعىرتىلىپ, اۆتوماتتاندىرىلادى. 2030 جىلعا دەيىن مينيسترلىك 14 مىڭ كم-دەن استام يرريگاتسيالىق كانالداردى جاڭعىرتۋ جانە رەكونسترۋكتسيالاۋدى جوسپارلاپ وتىر. بۇل سۋ جوعالتۋدى 50%-دان 35%-عا دەيىن تومەندەتۋگە مۇمكىندىك بەرەدى. يسلام دامۋ بانكىمەن بىرلەسكەن جوبانىڭ ءبىرىنشى كەزەڭى شەڭبەرىندە بيىل 96 كانالدى رەكونسترۋكتسيالاۋ باستالادى. 2024 جىلدان باستاپ فەرمەرلەردى سۋ ۇنەمدەۋ تەحنولوگيالارىن ەنگىزۋگە ىنتالاندىرۋ ءۇشىن سۋ ۇنەمدەۋ تەحنولوگيالارىن ساتىپ الۋ جانە ورناتۋعا جۇمسالعان ينۆەستيتسيالىق شىعىنداردىڭ 80%-ىنا دەيىن وتەۋ, سۋارۋ سۋىن نورمادان ارتىق پايدالانعانى ءۇشىن ءتاريفتى 20%-عا ارتتىرۋ جانە تاريف مولشەرىنە قاراي ديففەرەنتسيالدى سۋبسيديالاۋ تەتىكتەرى ەنگىزىلدى», دەلىنگەن حابارلامادا.
ۆەدومستۆونىڭ حابارلاۋىنشا, 2026–2028 جىلدارعا ارنالعان جالپى سيپاتتاعى ترانسفەرتتەردى قالىپتاستىرۋ اياسىندا سۋ ۇنەمدەۋ تەحنولوگيالارىن ەنگىزۋ كەزىندەگى ينۆەستيتسيالىق شىعىنداردى وتەۋگە 214,6 ملرد تەڭگە قاراستىرىلعان.
ونەركاسىپ سالاسىندا دا جاڭا تالاپتار قويىلعان. سۋ كودەكسىنە سايكەس, الداعى جەتى جىل ىشىندە كاسىپورىندار بىرتىندەپ اينالىمدىق جانە قايتا پايدالانىلاتىن سۋ جۇيەسىنە كوشۋگە مىندەتتى. ونىڭ العاشقى ەكى جىلى – بەيىمدەلۋ كەزەڭى, ال كەلەسى بەس جىل – تولىق ىسكە اسىرۋ ۋاقىتى.
