مەملەكەت باسشىسىنىڭ ايتۋىنشا, وڭدەۋ ونەركاسىبىنىڭ جالپى قوسىمشا قۇنى ەكى ەسە ءوسىپ, 17 ترلن تەڭگەگە جۋىقتادى. ونىڭ ىشكى جالپى ونىمدەگى ۇلەسى 12,4 پايىزعا جەتكەن. وتكەن جىلى 163 جاڭا ءوندىرىس ىسكە قوسىلىپ, 12,5 مىڭ تۇراقتى جۇمىس ورنى اشىلعان ەكەن. اسىرەسە الماتى, قوستاناي, قاراعاندى جانە اتىراۋ وبلىستارىندا ءىرى كاسىپورىندار پايدالانۋعا بەرىلدى. بيىل الماتىدا ەلىمىزدەگى ەڭ ۇلكەن اۆتوكولىك ءوندىرىسى ىسكە قوسىلدى.
دەگەنمەن پرەزيدەنت قول جەتكىزىلگەن جەتىستىكتەر ءالى دە كوڭىل كونشىتەرلىك ەمەس ەكەنىن اتاپ ءوتتى. «ەكونوميكانى ءارتاراپتاندىرۋدى تىڭ قارقىنمەن جالعاستىرۋ كەرەك. ىشكى جانە سىرتقى نارىقتا باسەكەگە قابىلەتتى, تەرەڭ وڭدەلگەن ءونىم شىعارۋعا باسىمدىق بەرىلۋگە ءتيىس», دەگەن مەملەكەت باسشىسىنىڭ ءسوزىنىڭ استارىندا كوپ دۇنيە جاتىر. ال ساپالى ءونىم ءوندىرۋ ءۇشىن سالاعا الدىمەن وزىق تەحنولوگيا مەن بىلىكتى مامان اۋاداي قاجەت. ارينە, تاۋ-كەن ءوندىرىسى سەكتورى تۋرالى ايتسام, ەلىمىزدە جوعارى ءبىلىمدى ماماندار دايارلايتىن وقۋ ورىندارى جوق ەمەس. وسى باعىتقا مەملەكەتتىك گرانت كولەمىن كوبەيتسە, وتاندىق بىلىكتى ماماندار كوبەيە تۇسەر دەگەن سەنىمدەمىن.
جولداۋدا تاۋ-كەن مەتاللۋرگياسىنىڭ الەۋەتىن ارتتىرۋ, گاز-حيميا كەشەندەرىن دامىتۋ جانە سۇيىتىلعان گازدى تەرەڭ وڭدەۋ جوبالارىن جۇزەگە اسىرۋ قاجەتتىگى ايتىلدى. الداعى ءۇش جىلدا جوعارى تەحنولوگيالىق ءونىم شىعاراتىن كەمىندە ءۇش كاسىپورىن ىسكە قوسىلماق. بۇل دەگەنىمىز – الداعى جىلدارى ەلىمىزدە تاۋ-كەن ينجەنەرلەرىنە, گەولوگتەر مەن تەحنولوگتەرگە دەگەن سۇرانىس ارتادى دەگەن ءسوز.
تاعى ءبىر ماڭىزدى مىندەت – گەولوگيالىق بارلاۋ جۇمىستارىن كۇشەيتۋ. تسيفرلىق قۇرالداردى پايدالانا وتىرىپ, جەر قويناۋىنىڭ زاماناۋي كارتاسىن جاساۋ قاجەتتىگى اتاپ ءوتىلدى. بۇل كەن ورىندارىنىڭ الەۋەتىن جاڭا ساپالىق دەڭگەيدە باعالاۋعا مۇمكىندىك بەرەدى. وسى رەتتە پرەزيدەنت «جەر قويناۋىنا قاتىستى مالىمەتتىڭ ءبارىن, ەڭ الدىمەن, جاساندى ينتەللەكتىنى ەنگىزۋ ارقىلى جۇيەلەپ, تسيفرلاندىرۋ قاجەت», دەدى.
وڭدەۋ ونەركاسىبىن جاڭعىرتۋ, گەولوگيالىق زەرتتەۋلەردى كۇشەيتۋ جانە جاڭا تەحنولوگيالاردى ەنگىزۋ مەملەكەتىمىزدىڭ يندۋستريالىق دامۋىنداعى شەشۋشى قادامدار بولماق. جالپى, جولداۋدا بەلگىلەنگەن باستامالار ەلدى جاڭا يندۋستريالىق داۋىرگە جەتەلەۋدى كوزدەيدى. يننوۆاتسيا مەن زاماناۋي تەحنولوگيالارعا ارقا سۇيەۋ ارقىلى ەل ەكونوميكاسى شيكىزاتقا تاۋەلدىلىكتەن ارىلىپ, ەكسپورتتىق الەۋەتىن كۇشەيتپەك.
الىبەك ساتقانباەۆ,
«قازفوسفات» جشس «قاراتاۋ» تاۋ-كەن وڭدەۋ كەشەنىنىڭ مەحانيگى
