فوتو: اقوردا
«پرەزيدەنت قاسىم-جومارت توقاەۆ ەكونوميكانىڭ ءتۇرلى سالالارىنا تسيفرلاندىرۋ مەن جاساندى ينتەللەكت قۇرالدارىن جەدەلدەتىپ ەنگىزۋ مىندەتىن جۇكتەدى. بۇل قادامنىڭ بارلىعى جيناقتالا كەلىپ, قازاقستاننىڭ جاڭا ۇلتتىق تسيفرلىق دامۋ ستراتەگياسىنا بىرىكتىرىلەدى. قازاقستان جاڭا تەحنولوگيالاردى دامىتۋ مەن ەنگىزۋدە كەشەندى ءارى جۇيەلى شەشىمدەر قابىلداعان الەمدەگى العاشقى ەلدەردىڭ ءبىرى بولىپ وتىر. بۇل رەتتە قازاقستان بولاشاقتا تەحنولوگيالىق تۇرعىدان دامىعان مەملەكەت اتانۋدى كوزدەيدى. وسىلايشا, بيىلعى جولداۋدا تسيفرلىق ترانسفورماتسيا مەن جاساندى ينتەللەكتىنى ەنگىزۋ ءبىزدىڭ ەل ءۇشىن جاڭا ۇلتتىق يدەيا رەتىندە ايقىندالدى», دەدى ەرلان قارين.
سونداي-اق ەرلان قارين مەملەكەت باسشىسىنىڭ جاڭا ساياسي باستامالارىنا توقتالدى.
«ۇسىنىلعان پارلامەنتتىك رەفورما پرەزيدەنتتىك ساياساتتاعى «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسىن دامىتادى. رەفەرەندۋم وتكىزۋ جونىندەگى ۇسىنىس مەملەكەت باسشىسىنىڭ ەل بولاشاعىن ايقىندايتىن ءتۇيىندى ماسەلەلەرگە قاتىستى تەك حالىقپەن كەڭەسە وتىرىپ شەشىم قابىلداۋ قاعيداتىن بەرىك ۇستاناتىنىن كورسەتتى. پرەزيدەنت بۇعان دەيىن دە 2022-2023 جىلدارداعى رەفورمالاردى, سونداي-اق اەس سالۋ جونىندەگى رەفەرەندۋمدى الدىن الا جاريالاپ, اشىقتىقتى قامتاماسىز ەتكەن ەدى. بۇل جولى دا اڭگىمە كونستيتۋتسياعا جەدەل وزگەرىستەر ەنگىزۋ نەمەسە پارلامەنت سايلاۋىن وتكىزۋ تۋرالى ەمەس. باستى ماقسات – ساياسي جۇيەنىڭ ينستيتۋتسيونالدىق نەگىزدەرىن ودان ءارى نىعايتۋ», دەدى ول.
مەملەكەتتىك كەڭەسشىنىڭ پىكىرىنشە, پرەزيدەنت ويلاستىرىلعان ءارى بىرىزدىلىككە نەگىزدەلگەن دايەكتى ءتاسىلدى قۇپتايدى.
«الدىمەن ساراپشىلار مەن قوعام اراسىندا جان-جاقتى ءارى تەرەڭ تالقىلاۋ جۇرگىزىلۋى ءتيىس. وسىلايشا, قازاقستان كەزەڭ-كەزەڭىمەن جانە جان-جاقتى جۇزەگە اسىرىلاتىن ساياسي جاڭعىرۋدىڭ ۇلگىسىن تاعى دا كورسەتتى», دەدى مەملەكەتتىك كەڭەسشى.
