«مەملەكەتتىڭ كوز الدىنداعىدان باسقانى كورمەي, بارىنە كونە بەرەتىن الەۋمەتتىك ساياساتى جۇزدەن استام ءتۇرلى جەڭىلدىكتىڭ پايدا بولۋىنا اكەپ سوقتىردى. وسى جەڭىلدىكتەردى اپەرەمىن دەپ «كومەك قولىن» سوزاتىن جىلپوستار دا كوبەيدى», دەدى پرەزيدەنت.
مەملەكەت باسشىسى كسرو ىدىراعانىنا 35 جىل وتسە دە, ءتۇرلى قاقتىعىستارعا قاتىسقان ازاماتتارعا ارنالعان تولەمدەر مەن جەڭىلدىكتەردىڭ ءالى جالعاسىپ كەلە جاتقانىن سىنعا الدى.
قاسىم-جومارت توقاەۆ الەۋمەتتىك تولەمدەردى قولدان كوبەيتۋ – ەلدىڭ دامۋ قارجىسىن بوسقا شاشۋ ەكەنىن اتاپ ءوتتى. ونىڭ ايتۋىنشا, مەكتەپ, اۋرۋحانا جانە ينفراقۇرىلىم سالۋعا باعىتتالۋى ءتيىس قوماقتى قاراجات الەۋمەتتىك جەڭىلدىكتەرگە ارتىق جۇمسالىپ جاتىر.
مەملەكەت باسشىسى كەزىندە ەنگىزىلگەن «تولىق ەمەس وتباسى» ساناتىنىڭ اجىراسۋلاردىڭ كۇرت وسۋىنە ىقپال ەتكەنىن مىسالعا كەلتىرىپ, مۇنداي قادامداردىڭ قوعامعا زيان تيگىزگەنىن ايتتى.
«الەۋمەتتىك سالادا وڭتايلى شەشىم قابىلداۋدىڭ ورنىنا, ۇكىمەت كەمىندە 15 جىل بويى الەۋمەتتىك ماسىلدىق پەن الەۋمەتتىك الاياقتىققا جول بەرىپ كەلدى», دەدى ول.
سونىمەن قاتار پرەزيدەنت دەموگرافيالىق ۇردىستەردى تەرەڭ زەرتتەۋ قاجەتتىگىن اتاپ ءوتىپ, ستراتەگيالىق جوسپارلاۋ جانە رەفورمالار اگەنتتىگىنىڭ بازاسىندا جاساندى ينتەللەكتىنى قولداناتىن دەموگرافيالىق ۇدەرىستەردى تالداۋ جانە بولجاۋ ورتالىعىن قۇرۋدى ۇسىندى.
مەملەكەت باسشىسى زەينەتاقى جۇيەسىنە دە توقتالدى. ونىڭ ايتۋىنشا, ءوز-ءوزىن جۇمىسپەن قامتىعان ازاماتتاردىڭ باسىم بولىگىندە جيناق از, بۇل جۇيەنىڭ بولاشاعىنا قاۋىپ توندىرەدى. سوندىقتان ۇكىمەتكە, ۇلتتىق بانككە جانە ستراتەگيالىق جوسپارلاۋ اگەنتتىگىنە زەينەتاقى جۇيەسىنىڭ قارجىلىق تۇراقتىلىعىن قامتاماسىز ەتۋ جونىندە ناقتى شارالار ازىرلەۋ تاپسىرىلدى.
پرەزيدەنت سونداي-اق ازاماتتاردىڭ قارجىلىق ساۋاتتىلىعىن ارتتىرۋدىڭ ماڭىزدىلىعىن ايتىپ, «AMANAT» پارتياسى ۇسىنىپ وتىرعان «قارىزسىز قوعام» جوباسىن جالعاستىرۋ قاجەتتىگىن اتاپ ءوتتى. ونىڭ اياسىندا وتكەن جىلى 845 مىڭ ادام كەڭەس الىپ, قارجىلىق ءبىلىمىن جەتىلدىرگەن.
«تۇپكى ماقسات – حالىقتىڭ موينىنداعى قارىزىن ازايتۋ عانا ەمەس, ازاماتتاردىڭ تابىسى تۇراقتى بولۋىن قامتاماسىز ەتۋ», دەدى قاسىم-جومارت توقاەۆ.
