فوتو: اشىق دەرەككوز
ء«بىزدىڭ نارىقتاعى جاعداي – ۇياتتى جاعداي. ۇكىمەت ءادىل ەۋرازيالىق ساۋدانى قامتاماسىز ەتۋگە ءتيىس. ءبىزدىڭ كاسىپكەرلەر ەاەو اياسىنداعى وزگە ەلدەردىڭ كاسىپكەرلەرىندەي پرەفەرەنتسيالار مەن قولداۋلارعا يە بولماي وتىر. سونىڭ سالدارىنان ءوز نارىعىمىزدى وزىمىزدەن تارتىپ الۋعا ءماجبۇرمىز», دەدى پرەزيدەنت.
قاسىم-جومارت توقاەۆتىڭ ايتۋىنشا, وتاندىق كاسىپكەرلەر قازىر تەڭسىز جاعدايدا جۇمىس ىستەپ وتىر. بۇل ءوز كەزەگىندە ىشكى نارىقتاعى وتاندىق ءونىم وندىرۋشىلەردىڭ مۇمكىندىكتەرىن شەكتەپ, باسەكەگە قابىلەتتىلىگىن تومەندەتەدى.
مەملەكەت باسشىسى يمپورتتان تولىقتاي باس تارتۋ مۇمكىن ەمەس ەكەنىن, سونىمەن قاتار وعان قاجەتتىلىك تە جوعىن اتاپ ءوتتى. دەگەنمەن, باستى مىندەت – ىشكى نارىقتى قورعاۋ, وتاندىق ءونىم وندىرۋشىلەردىڭ ۇلەسىن ارتتىرۋ جانە ولاردىڭ مۇددەسىن حالىقارالىق دەڭگەيدە ءتيىمدى قورعاۋ.
پرەزيدەنت ۇكىمەتكە ءادىل ساۋدا تەتىكتەرىن قالىپتاستىرۋ, كاسىپكەرلەر ءۇشىن تەڭ جاعداي جاساۋ جانە قازاقستاندىق تاۋار وندىرۋشىلەردى قولداۋعا باعىتتالعان ناقتى شەشىمدەر ازىرلەۋدى تاپسىردى.
