فوتو: اشىق دەرەككوز
پرەزيدەنت اتاپ وتكەندەي, «كەلەشەك مەكتەپتەرى» ۇلتتىق جوباسى اياسىندا جوسپارلانعان 217 مەكتەپتىڭ 150-ءى قازىردىڭ وزىندە جۇمىس ىستەپ تۇر. قالعان مەكتەپتەردىڭ قۇرىلىسى الداعى ءۇش اي ىشىندە اياقتالۋى ءتيىس.
«تسيفرلىق تەحنولوگيالار جاھاندىق ەڭبەك نارىعىن جىلدام وزگەرتىپ جاتىر. الەمدە جاساندى ينتەللەكتىمەن جۇمىس ىستەۋدىڭ قىر-سىرىن بىلەتىن ماماندارعا دەگەن سۇرانىس جىل وتكەن سايىن ارتىپ كەلەدى. جۇمىس ۇدەرىستەرىنىڭ ەداۋىر بولىگى تسيفرلىق تەحنولوگيالاردى ەنگىزۋ ارقىلى اۆتوماتتاندىرىلاتىنى انىق», دەدى قاسىم-جومارت توقاەۆ.
سول سەبەپتى, قاسىم-جومارت توقاەۆتىڭ تاپسىرماسىمەن 100 مىڭعا جۋىق ستۋدەنتتى تەحنولوگيالىق جوبالارعا تارتۋدى كوزدەيتىن Al-Sana باعدارلاماسى جۇزەگە اسىرىلا باستادى. الايدا جاساندى ينتەللەكتىمەن جۇمىس ىستەۋ قۇزىرەتىن قالىپتاستىرۋ الدەقايدا ەرتە جاستان, ياعني مەكتەپ قابىرعاسىنان قولعا الىنۋعا ءتيىس ەكەنى اتاپ ءوتىلدى.
«وسىعان وراي بىرقاتار باستامانى جۇزەگە اسىرعان ءجون. ەڭ الدىمەن, مەكتەپ وقۋشىلارىنا ارنالعان جاساندى ينتەللەكت نەگىزدەرى تۋرالى باعدارلاما جانە وقۋ ماتەريالدارىن ازىرلەۋ قاجەت. ۇستازداردىڭ جاساندى ينتەللەكت تەحنولوگياسىن مەڭگەرۋ داعدىسىن دا قالىپتاستىرۋ كەرەك بولادى. قاشىقتان وقىتۋ ءتاسىلى جانە جاساندى ينتەللەكت تەحنولوگياسى نەگىزىندە «Qazaq Digital Mektebi» اتتى شاعىن جيناقتى مەكتەپ ۇلگىسىن ازىرلەۋىمىز قاجەت. مۇنداي پلاتفورما اۋىلداعى وقۋشىلاردى ساپالى وقۋ تاسىلدەرىمەن قامتاماسىز ەتۋگە مۇمكىندىك بەرەدى», دەدى مەملەكەت باسشىسى.
ەلوردادا بالالاردى دامىتۋ ورتالىقتارىن جەكە قاراجات تارتۋ ارقىلى سالۋ تاجىريبەسى بار. پرەزيدەنت مۇنى بارلىق ايماققا تاراتۋ قاجەتتىگىن ايتتى. كوپتەگەن كاسىپكەر ءدال وسى ماسەلە بويىنشا كومەك كورسەتۋگە ءازىر ەكەنىن ءبىلدىرىپ جاتىر. اكىمدەر وسىنداي جوبالاردى جۇزەگە اسىرۋعا كاسىپكەرلەردى بەلسەندى تۇردە جۇمىلدىرۋى كەرەك.
