فوتو: ۇوك/ سالي سابيروۆ
كۇندىزگى سەسسيادا العاش بولىپ 55 كەلى ماحمۇد سابىرحان مەكسيكالىق برايان ورتيسپەن قولعاپ ءتۇيىستىردى. وتانداسىمىز ءبىرىنشى راۋندتى سەنىمدى تۇردە ءوز پايداسىنا شەشتى. ەكىنشى راۋندتا تورەشىلەر پىكىرى ەكىگە بولىنگەنمەن, 3-راۋند قورىتىندىسىندا ماحمۇد سابىرحاننىڭ قولى كوتەرىلدى.
ودان كەيىن پاريج وليمپياداسىنىڭ كۇمىس جۇلدەگەرى نۇربەك ورالباي ليۆەرپۋلدە ءوتىپ جاتقان جاھان بىرىنشىلىگىندەگى العاشقى كەزدەسۋىن وتكىزدى. 80 كەلىدە ەل نامىسىن قورعايتىن بوكسشىمىز 3 راۋندتا دا ۋكراينالىق ماتۆەي راجبادان باسىم بولدى. كەلەسى كەزەڭدە نۇربەك قىتاي اتىنان ونەر كورسەتەتىن ەتنيكالىق قازاق توقتاربەك تاڭاتقانمەن كىم مىقتىنى انىقتاسادى.
ايەلدەر قۇراماسى ساپىنان كارينا يبراگيموۆا 1/8 فينالدا جەڭىسكە جەتتى. 57 كەلىدە ونەر كورسەتەتىن كارينا بۇل كەزەڭدە ۇلىبريتانيالىق ەليس گليندى 5: 0 ەسەبىمەن قاپى قالدىردى.
جەڭىستى جولدى 70 كەلىگە دەيىنگى سالماقتا شارشى الاڭعا شىققان ناتاليا بوگدانوۆا دا جالعادى. ول ۇندىستاندىق ساناماچا چوكسومدى ايقىن باسىمدىقپەن جەڭدى.
كەشكى سەسسيانى 65 كەلىگە دەيىنگى سالماقتا باق سىناپ جاتقان ەرتۋعان زەينۋللينوۆ قورىتىندىلادى. ەرتۋعاننىڭ 1/16 فينالىندا قارسىلاسى فرانتسيالىق ۋگو گراۋ بولدى. العاشقى راۋندتا جەڭىس قارسىلاسقا بەرىلگەنمەن وتانداسىمىز كەيىنگى راۋنداتردا جەڭىستى ج ۇلىپ الدى.
ايتا كەتەيىك, World boxing ۇيىتقى بولعان بىرىنشىلىك 14 قىركۇيەكتە قورىتىندىلانادى.
