«Energy Solutions Center» جشس (ەكىباستۇز جەو) جىلۋ بەرۋ ماۋسىمىنا دايىندىق پاسپورتىن الۋ ءۇشىن قاجەتتى قۇجاتتامانى ازىرلەدى. قازىرگى ۋاقىتتا ءتيىستى قۇجاتتار پاۆلودار وبلىسىنىڭ ۋاكىلەتتى ورگانى تاراپىنان تەكسەرىلىپ, كەلىسىلگەن جانە 8 قىركۇيەككە دەيىن دايىندىق پاسپورتىن الۋ ءۇشىن ورتالىق مەملەكەتتىك ورگانعا ءوتىنىم بەرىلەدى.
- بيىل پايدالانۋشى ۇيىمنىڭ قاراجاتى ەسەبىنەن 7 قازاندىق اگرەگاتىندا وندەۋ جۇمىستارى اياقتالدى. وزگە جوندەۋ جۇمىستارى بەكىتىلگەن كەستەگە سايكەس جالعاسىپ جاتىر. ۇكىمەتتىڭ جانە وبلىس اكىمدىگىنىڭ قولداۋىمەن جالپى ۇزىندىعى 5 كم-دەن اساتىن ەكى جىلۋ ماگيسترالىن قايتا جاڭارتۋ جۇرگىزىلدى. قازىرگى تاڭدا بۇل ۋچاسكەلەردە قۇبىرلاردى مونتاجداۋ جۇمىستارى اياقتالدى. گيدراۆليكالىق سىناقتار مەن جىلۋ جەلىلەرىن شايۋ ءساتتى وتكىزىلدى. تۇتىنۋشىلارعا ىستىق سۋ تولىق كولەمدە بەرىلدى, - دەپ حابارلادى قالالىق اكىمدىكتەن.
جالپى جىل باسىنان بەرى ورامىشىلىك جەلىلەرگە اعىمداعى جوندەۋ جۇمىستارى شەڭبەرىندە بيۋدجەت ەسەبىنەن 345 ۋچاسكەدە جۇمىستار جۇرگىزىلىپ, 12 شاقىرىمنان استام جەلى اۋىستىرىلعان.
بۇدان بولەك, «ەكىباستۇز جىلۋ جەلىلەرى» جاۋاپكەرشىلىگى شەكتەۋلى سەرىكتەستىگىنىڭ كۇشىمەن ۇزىندىعى 5,5 كم جىلۋ جەلىلەرى كۇردەلى جوندەلگەن.
- شاھاردا كوپپاتەرلى 705 تۇرعىن ءۇي بار. 5 قىركۇيەكتەگى جاعداي بويىنشا 675 تۇرعىن ءۇي جىلۋ بەرۋ ماۋسىمىنا تولىق دايىن. قالعان ۇيلەردە ىشكى ينجەنەرلىك جۇيەلەرىن جوندەۋ جۇمىستارى جۇرگىزىلىپ جاتىر, ولاردى اياقتاۋ مەرزىمى 10 قىركۇيەككە جوسپارلانعان. جىلۋ بەرۋ ماۋسىمىنا دايىندىق بويىنشا بارلىق جۇمىستار كەستەگە سايكەس ورىندالىپ جاتىر, - دەپ قوستى اكىمدىكتەن.
